MİNSK QRUPUNUN DAĞILACAĞI REALDIR

SON XƏBƏRLƏR

MİNSK QRUPUNUN DAĞILACAĞI REALDIR

2021.10.20, 07:36

Gunaz.tv

“MİNSK QRUPUNUN DAĞILACAĞI REALDIR” Ekspertə görə, Rusiyanın münaqişələrin həllinə yanaşması davranışı beynəlxalq normalara uyğun gəlmir

Vaşinqtondakı Hudson İnstitutunun proqram direktoru Zeyno Baran Gürcüstanda baş verən hadisələrin Dağlıq Qarabağ münaqişəsinə təsirsiz qalmayacağını deyib. O bildirib ki, əgər Rusiya Kosovo presedentindən yararlanıb Cənubi Osetiyanın statusunun referendum yolu ilə müəyyən edilməsinə nail olsa, o zaman ermənilərin də Dağlıq Qarabağda referendum keçirmək haqda mövqeləri böyük dəstək almış olacaq. Burada bir ciddi məqamı qeyd etmək lazımdır ki, aparıcı dövlətlər Kosovonun müstəqiliyini tanıyanda bəzi ekspertlər bunun Qarabağ məsələsinə hansısa təsiri olmayacağını deyirdilər. Lakin bir çox ekspertlər ilk gündən bu qənaətdə idilər ki, Kosovonun müstəqilliyinin tanınması Qarabağ üçün də potensial təhlükədir. Artıq bu haqda deyilənlər öz təsdiqini tapmaqdadır. Kosovo presedentindən Qarabağ münaqişəsində birbaşa istifadə etmək mümkün olmasa da, buna zəmin hazırlandığı şübhə doğurmur... Z.Baran həmçinin qeyd edib ki, Rusiya artıq keçmiş sovet respublikalarındakı münaqişələrin həllində neytral vasitəçi deyil. Onun sözlərinə görə, bundan sonra Amerika və Rusiyanın regional münaqişələrin həllində vasitəçilik etməsini təsəvvür etmək çətindir. Çünki onların mövqeləri kəskin fərqlənir. Z.Baranın fikirlərindən aydın olur ki, Minsk Qrupunun dağılması ehtimalı böyükdür. Əslində ekspertlər dəfələrlə Minsk Qrupunun əhəmiyyətsiz bir quruma çevrildiyini deyərək, onun buraxılmalı olduğunu bildiriblər. Artıq elə bir situasiya yetişib ki, Minsk Qrupunda Amerika ilə Rusiyanın əməkdaşlığı mümkün deyil. Bu isə ən azı həmin qurumun formatının dəyişdirilməsinə səbəb ola bilər. Z.Baranın açıqlaması ilə bağlı fikirlərini öyrəndiyimiz politoloq, Müsavat başqanının müavini Qabil Hüseynli dedi ki, Minsk Qrupunun dağıla biləcəyi haqda proqnozlar kifayət qədər realdır: “Rusiya-Qərb qarşıdurması artıq elə bir həddə çatıb ki, münasibətlər sıfır nöqtəsinə qədər enə bilər. Bu halda onların Minsk Qrupu formatında işləmələri qeyri-mümkündür. Rusiyanın münaqişələrin həllinə yanaşması, regiondakı davranışı beynəlxalq normalara uyğun gəlmir. Bu səbəbdən Amerikanın Rusiya ilə birgə işləməsi qeyri-mümkün görünür”. Xanım Baranın Rusiyanın Kosovo presedentindən öncə Osetiyada, daha sonra isə Qarabağda yararlanacağı barədə açıqlamasının isə real olmadığını deyən politoloq söylədi ki, Z.Barandan əvvəl bunu nüfuzlu Qərb mətbuatı da yazıb: “Əslində, Zeyno Baranın Minsk Qrupunun dağıla biləcəyinə dair verdiyi açıqlaması ilə Kosovo presedentinin dolayısı ilə Qarabağ münaqişəsinə münasibətdə də tətbiq edilməsinin mümkünlüyü haqda fikirləri ziddiyyət təşkil edir. Amma bu fikirlərin tez-tez səslənməyə başlaması onu deməyə əsas verir ki, Qərbdə belə bir plan var. Görünür, onlar ideoloji-siyasi baxımdan buna zəmin hazırlayırlar. Lakin bu, yolverilməzdir və reallığa çevriləcəyi inandırıcı deyil”. Elşad MƏMMƏDLİ musavat

GUNAZ.TV

SON XƏBƏRLƏR