Minsk qrupunun taleyi sual altındadır Vaqif Abışov: "Bu qurumun fəaliyyətini dayandırmasının Azərbaycana mənfi təsiri olmayacaq" Vaşinqtondakı Hudson İnstitutunun proqram direktoru Zeyno Baran Gürcüstan ətrafında baş verənlərin Dağlıq Qarabağ münaqişəsinə təsirsiz qalmayacağını qənaətindədir. Onun sözlərinə görə, indi Rusiya Kosova presedentindən istifadə edərək Cənubi Osetiyanın statusunun referendum yolu ilə müəyyənləşdirilməsini tələb edir. Əgər onlar bu işdə uğur qazansalar, o zaman ermənilərin də Dağlıq Qarabağda referendum keçirmək haqda mövqeləri böyük dəstək qazanacaq. Ekspert vurğulayıb ki, Rusiya artıq keçmiş sovet respublikalarındakı münaqişələrin həllində neytral vasitəçi deyil. Bunun Minsk qrupu çərçivəsində aparılan prosesə təsiri də istisna deyil. Tural "Mən hələ bilmirəm nə baş verəcək, lakin Amerika və Rusiyanın regional münaqişənin həllində vasitəçilik etməsini təsəvvür etmək çətindir. Çünki onların mövqeləri kəskin fərqlənir". Milli Elmlər Akademiyasının Tarix İnstitutunun əməkdaşı Vaqif Abışov deyir ki, Rusiyanın Gürcüstana hərbi təcavüzü dünyada böyük rezonans doğurub. Digər tərəfdən, Azərbaycan özü də təcavüzə məruz qalıb, torpaqlarının 20 faizi 14 ildən çoxdur ki, işğal altındadır. Bu işğalı ermənilər məhz Rusiyanın köməyi və bilavasitə iştirakıyla həyata keçiriblər. Rusiya bu gün də Ermənistana hərtərəfli dəstək verir, elə bu səbəbdən BMT Təhlükəsizlik Şurasının məlum 4 qətnaməsi də yerinə yetirilməyib. Proseslərin gedişində BMT Dağlıq Qarabağ münaqişəsinin nizamlanmasını ATƏT-ə həvalə edib və ATƏT də Minsk qrupunu yaradıb. Dağlıq Qarabağ münaqişəsi həll olunarsa, Minsk qrupu da ləğv edilməlidir. Minsk qrupunun həmsədrləri ABŞ, Rusiya və Fransadır. Həmsədrlərin fəaliyyətsizliyi, BMT qətnamələrinin yerinə yetirilməsi yönündə səy göstərməmələri də Ermənistanın əl-qolunu açıb, Azərbaycanın haqq səsi dünyada eşidilməyib. Vaqif Abışovun sözlərinə görə, Gürcüstanda baş verənlər sanki Dağlıq Qarabağ problemini ikinci plana keçirib. BMT, ATƏT, NATO hazırda Gürcüstan məsələsiylə məşğuldurlar, Rusiyanın hərbi təcavüzünün qarşısını almaq istəyirlər. Gürcüstanda baş verənlər, yaranmış durum Azərbaycana təhlükəsizlik, iqtisadi, siyasi və digər aspektlərdə təsir göstərir. Moskva Gürcüstan və Azərbaycanı maksimum dünyadan təcrid etməyə çalışır. Azərbaycan faktiki bu gün Rusiyanın iqtisadi blokadasıyla üzləşib. Çünki 2008-ci ilin dövlət büdcəsinin 60 faizindən çoxu neft ixracı, daha doğrusu, Bakı-Tiflis-Ceyhan (BTC) kəmərilə neftin daşınması hesabına olmalıydı. Başqa sözlə, Rusiya tək Gürcüstana deyil, Azərbaycana da iqtisadi təcavüz edib. Bu, hərbi təcavüzə də çevrilə bilər. Tarixən Rusiya Qafqazda münaqişə ocağı yaradıb, münaqişədən bəhrələnərək özünə yeni dayaqalar yaradıb. İndi də həmin mərhələdir. Ona görə də cürbəcür proqnozlar verilir. ATƏT-in Minsk qrupunun fəaliyyətinin dayandırılması barədə proqnozlara gəlincə, Vaqif Abışova görə, bundan Azərbaycan uduzmaz. Çünki indiyə qədər Minsk qrupunun fəaliyyətindən heç nə qazanmamışıq. BAXCP də dəfələrlə hakimiyyəti Minsk qurupunun fəaliyyətindən imtinaya çağırıb: "Ona görə də mənə elə gəlir ki, Minsk qrupunun fəaliyyətini dayandırmasının Azərbaycana mənfi təsiri olmayacaq. Azərbaycan problemi BMT-nin 4 qətnaməsi və öz ərazi bütövlüyü çərçivəsində bərpa etməlidir. O səbəbdən hansısa dövlətin Minsk qrupunun həmsədrliyindən getməsi bizə hər hansı ziyan verməz. Düzdür, bu, münaqişənin tənzimlənməsiylə bağlı Bakıyla İrəvan arasındakı danışıqları müəyyən qədər dayandıra bilər, danışıqlarda uzun müddətli fasilə yaranar". xalqcebhesi