Fars rejiminin milli fəallara qarşı təzyiqi artıb Ağır işgəncələrə məruz qalmış Həmid Vəlayinin qolu və dişləri sındırılıb Güney Azərbaycanın Təbriz şəhərində həbs olunmuş tələbə fəal Əmir Mərdani Ağabəylinin saxlanıldığı yer bəlli olub. O, avqustun 17-də ailəsinə zəng edərək "Ettelaat"ın Təbrizdəki təcridxanasında olduğunu bildirib. Xatırladaq ki, Təbriz Universitetinin sonuncu kurs tələbəsi, 23 yaşlı Əmir Mərdani Ağabəylini "Ettelaat" əməkdaşları qaldığı evə gecə vaxtı basqın edərək tutub. Həmin vaxt soydaşımıza məxsus olan kompüter, CD və kitablar aparılıb. İndiyədək onun hansı ittihamla həbs olunduğu bildirilmir. Əslən Güney Azərbaycanın Sulduz şəhərindən olan milli fəal iki il əvvəl may hadisələri zamanı da həbs olunmuşdu. Turqut Soydaşımız həftələrlə "Ettelaat"ın Təbrizdəki təcridxanasında ağır işgəncələrə məruz qaldıqdan sonra girov müqabilində azadlığa buraxılmışdı. Bu arada milli fəallar Bəhram Vahidi və Surna Haşımidən heç bir xəbər yoxdur. Onların harada saxlanıldığı barədə ailələrinə də heç bir xəbər verilmir. Xatırladaq ki, Zəncan Universiteti Tələbə Dərnəyinin üzvü olan Bəhram Vahidini "Ettelaat" əməkdaşları avqustun 6-da həbs edərək naməlum istiqamətə aparıblar. O, avqustun 14-də ailəsinə zəng edərək sağ-salamat olduğunu xəbər verib. Zəncan Universiteti Tələbə Dərnəyinin digər üzvü Surna Haşıminin isə həbs edilməsi üçün avqustun 11-də "Ettelaat" əməkdaşları evinə basqın ediblər. Amma milli fəal evdə olmadığından onu tuta bilməyiblər. Ertəsi gün Surna Haşımi Zəncan İnqilab Məhkəməsinə müraciət edərək könüllü şəkildə İran rejiminin hüquq-mühafizə orqanlarına təslim olub. İndiyədək onların taleyi naməlum olaraq qalır. Bundan əlavə, milli fəal Qulami Nəcəfinin ailəsi iqtisadi çətinliklərlə üzləşib. Çünki fars şovinist rejimi iyulun 4-də həbs etdiyi təbrizli hərəkatçının mağazasının valideynlərinin işlətməsinə hələ də icazə vermir. Xatırladaq ki, bir müddət milli fəalın mağazasını işlətsə də, ancaq sonradan onun ailəsini iqtisadi məhrumiyyətlərə məruz qoymaq istəyən rejim mağazanı qapadıb. Bu arada 40 gün əvvəl həbs edilmiş milli fəal Həmid Valayinin vəziyyəti ağır olaraq qalır. Çünki təcridxanada ağır işgəncələrə məruz qalmış soydaşımızın qolu və 4 dişi sındırılıb. Beynəlxalq hüquq müdafiə təşkilatlarının müdaxiləsindən sonra xəstəxanaya köçürülən Həmid Valayi hazırda müalicə olunur. Xatırladaq ki, ifadə verməsi üçün iyulun 15-də "Ettelaat"ın Təbrizdəki şöbəsinə çağrılan milli fəal həbs edilib. Azərbaycanlı Tələbə və Müəllimlər Birliyinin üzvü, Təbriz Universitetinin hüquq fakültəsinin məzunu olan 27 yaşlı Həmid Valayi indiyədək azərbaycanlı tələbələrin buraxdığı bir sıra nəşrlərdə məqalələrlə çıxış edib. Bundan əlavə, təxminən 34 gün öncə həbs edilmiş Tehran universitetlərinin Qadın Haqları Komissiyasının üzvü Bəharə Hidayət və Tələbə birliklərinin fəallarından olan Məhəmməd Haşımi avqustun 16-da azadlığa buraxılıblar. Tehrandakı Evin həbsxanasında təkadamlıq kameralarda ağır işgəncələrə məruz qalan tələbələr hakimiyyət əleyhinə mübarizə aparmaqda və müxalifət təşkilatlarıyla əməkdaşlıqda ittiham olunurlar. xalqcebhesi