Azərbaycan tolerantlığına zərbə vurmaq cəhdi Əbu Bəkr məscidinə qumbara atan cinayətkarın və təhrikçi qüvvələrin tez bir zamanda ifşa olunmaları zəruridir Nərimanov rayonu Cümə məscidində (Əbu Bəkr) baş verən terror aktını Bakı Şəhər Prokurorluğunda yaradılmış xüsusi istintaq qrupu təhqiq edir. Dünən Bakı şəhər prokurorunun köməkçisi Ramiz Rzayev istintaq qrupunun rəhbərinin prokurorluğun istintaq idarəsinin mühüm işlər müstəntiqi Akif Rzayev oldğunu bildirib. Cinayətin açılması və təqsirkar şəxslərin məsuliyyətə cəlb edilməsi istiqamətində müvafiq istintaq hərəkətləri və əməliyyat-axtarış tədbirləri davam etdirilir. Terror aktı ilə bağlı şübhəli şəxs qismində kimlərinsə saxlanıb-saxlanmamasına gəldikdə, prokurorun köməkçisi hazırda hadisə yerində istintaq aparıldığını və əməliyyatın nəticələri barədə hələ ki, yeni məlumat olmadığını söyləyib. Rəvan Məmmədli Xatırladaq ki, avqustun 17-də saat 20:50 radələrində nməlum şəxsin məscidin pəncərəsindən atdığı partlayıcı maddə nəticəsində 2 nəfər ölüb, 14 nəfər müxtəlif dərəcəli xəsarət alıb. Xəsarət alanlar içərisində Cümə məscidinin (Əbu Bəkr) imamı Qamət Süleymanov da var. Dünən bir sıra islam təşkilatlarının təmsilçiləri, ilahiyyatçı alimlər və ağsaqqallar (ümumilikdə 41 nəfər) avqustun 17-də Əbu Bəkr məscidində baş vermiş terror aktı ilə əlaqədar birgə bəyanatla çıxış ediblər. Bəyanatı imzalayanlar Nərimanov rayonunda yerləşən məsciddə baş verən qanlı olayı qətiyyətlə pisləyir və bunu müsəlman kimliyinə uyğun gəlməyən, islamın gözəl mahiyyətinə zidd olan bir cinayət kimi qiymətləndirirlər. Bu, birmənalı olaraq Azərbaycanın milli-mənəvi təhlükəsizliyinə ciddi təhdiddir: "Bunun qarşısında Azərbaycan toplumu vahid prinsipial mövqe sərgiləməli və bu üsulların heç bir vəchlə məqbul olmaması barədə aydın və birmənalı mesajlar verməlidir. Hesab edirik ki, cəmiyyətin bütün təbəqələri bu əməllərin Azərbaycan üçün destabilizə faktoru rolunu oynamağa imkan verilməyəcəyi barədə dəqiq mövqe nümayiş etdirməlidir. Terrorun müəllifləri və icraçıları bu fəlakətin önündə bütün Azərbaycan ictimaiyyətini görməlidir. Belə olsa, vətənimizi öz eksperimental oyunlarının poliqonuna çevirmək istəyən ünsürlər birdəfəlik öz niyyətlərindən daşınarlar". Ümumilikdə, hadisəyə münasibətdə Azərbaycanda mövqe yekdildir. Hesab olunur ki, bu, ölkədə tolerant, dözümlü mühitə zərbə vurmaq və qeyri-stabillik yaratmaq istəyən xarici qüvvələrin əməlidir. Məsələn, hadisədən dərhal sonra BAXCP-nin yaydığı bəyanatda bildirildi ki, Azərbaycan regionda və dünyada yüksək dini tolerantlığın mövcud olduğu, Tanrıya tapınanların azad, firavan və təhlükəsiz yaşadığı bir ölkə kimi böyük nüfuz qazanmış, əsl mədəniyyət göstəricisi olan dini dözümlülüyün simvollarından birinə çevrilmişdir. BAXCP hesab edir ki, Əbu Bəkr məscidində baş verən hadisə bölgədə gərginliyin yaradılmasında maraqlı olan, dinlər və təriqətlər arasında nifaq salmağa çalışan qüvvələrin Azərbaycanın beynəlxalq nüfuzuna zərbə vurmaq niyyəti kimi qiymətləndirilməlidir. Bu hadisəni həyata keçirən, yaxud stimullaşdıran düşmən dairələr Azərbaycan haqqında "qeyri-sabit ölkə" imici formalaşdırmaqla öz iyrənc maraqlarını həyata keçirmək istəyirlər. Hadisəni həmin məsciddəki iki qrup arasındakı narazılığın nəticəsi hesab edən Qafqaz Müsəlmanları İdarəsinin sədri Şeyxülislam Hacı Allahşükür Paşazadə də burada düşmən qüvvələrin əli ola biləcəyini istisna etmir. O bildirib ki, bu gün bütün dünya Azərbaycanın tolerant ölkə olduğunu bilir. Ölkədə dini sahədə problem olsaydı, belə hadisələr başqa dinlərin nümayəndələrinə-yəhudilərə, xristianlara qarşı törədilərdi. Maraqlı xarici qüvvələrin kimliyi barədə də açıqlamalar verilib. Dini Etiqad və Vicdan Azadlıqlarının Müdafiə Mərkəzinin rəhbəri İlqar İbrahimoğlu Əbu Bəkir məscidindəki partlayışa Rusiyanın həddindən çox maraqlı tərəf kimi yanaşdığını dilə gətirib. "Atlas" Araşdırmalar Mərkəzinin rəhbəri Elxan Şahinoğluya görə, Əbu Bəkri vəhabiliyə düşmən münasibət bəsləyən başıpozuq fanatik də partlada bilərdi, bu olayın arxasında məmləkətimizdə məzhəblərarası münasibətləri qızışdırmaqla xaos planını hərəkətə gətirmək istəyən və bununla Azərbaycanı zəiflətməyi planlayan mərkəz və ya mərkəzlər də dayana bilərdi: "Fanatik və ya məkrli mərkəz - fərq etməz, variantların hər ikisi təhlükəlidir. Vəhabiləri hədəf alan fanatik peyda olubsa, şiələri də hədəf ala biləcək fanatikin peyda olmasından sığortalanmamışıq. Yox, əgər həmin fanatiki tapşırığa hansısa mərkəz göndəribsə, demək bu olay həmin mərkəzin Azərbaycanla bağlı məkrli planının sadəcə ilk bəndidir. Buna görə də məscidə partlayıcı maddəni atanın qısa zamanda həbsi, ailə münaqişəsi zəminində qətl törədən və ya soyğunçuluq edənin həbsindən daha önəmlidir". Təhlükəsizlik Araşdırmaları Mərkəzinin rəhbəri İlham İsmayıl Əbu Bəkr məscidində insanların ölümü və yaralanması ilə nəticələnən partlayışın bütün hallarda terror aktı olduğunu vurğulayıb. Dinşünas alim Altay Göyüşov hesab edir ki, bu cür hadisələr müxtəlif səbəblərdən baş verə bilər. Ancaq məsələnin kökündə ölkədə dini maarifləndirmə işinin lazımi səviyyədə olmaması dayanır. Dini Qurumlarla İş üzrə Dövlət Komitəsi də Əbu Bəkr məscidində baş verən partlayışı terror aktı adlandırıb. Bütün bunlar da göstərir ki, dövlətin və cəmiyyətin məsələyə yanaşmasında birmənalı yekdillik var. Olay isə kifayət qədər narahatlıq doğurur və xarici qüvvələrin gələcəkdə həyata keçirməyə çalışacaqları məkrli planların qarşısını almaq üçün hadisənin hərtərəfli araşdırılması, cinayətkarın və təhrikçi qüvvələrin tez bir zamanda ifşa olunmaları üçün təxirəsalınmaz addımların atılması zəruridir. Prezidentin məsələni xüsusi nəzarətinə götürməsi bu baxımdan müsbət haldır. Digər tərəfdən, Azərbaycan cəmiyyətində dini maarifləndirməyə də xüsusi diqqət ayrılmalıdır ki, bu yolla ölkəmizdə dini tolerantlıq mühitinə zərbə vura biləcəklərini düşünən xarici qüvvələr niyyətlərinin baş tutmayacağını dərk etsinlər. xalqcebhesi