Moskvanın "atəşipoz" planı Cənubi Qafqazda artan gərginlik fonunda "forpost" Ermənistanın atəşkəsi intensiv şəkildə pozması təsadüfi sayılmır Rusiya Gürcüstana hərbi qüvvələrini yeritməsindən sonra ermənilər də atəşkəsi tez-tez pozmağa başlayıblar. Müdafiə Nazirliyinin mətbuat xidmətinin rəhbəri Eldar Sabiroğlu da rəqəmləri söyləməkdə çətinlik çəksə də, atəşkəsin son vaxtlar daha intensiv şəkildə pozulduğunu təsdiqlədi. Qeyd edək ki, ABŞ-da respublkaçı prezidentliyə namizəd Con Makkeyn də Cənubi Qafqazda proseslərin gedişinin təhlükəli olduğunu vurğulayıb. Rusiyanın enerji dəhlizi üzərində nəzarəti ələ keçirməyə çalışdığını söyləyən Con Makkeyn təklif edib ki, ABŞ Bakı-Tiflis-Ceyhan (BTC) neft kəmərinin təhlükəsizliyini qorumaq üçün təcili Bakı və Ankarayla danışıqlara başlamalıdır. Ramiz Mikayıloğlu Gürcüstan olayları fonunda Türkiyənin baş naziri Rəcəb Tayyib Ərdoğanın bu həftə Azərbaycana gələcəyini bildirməsi də diqqət çəkməyə bilməzdi. Bütün bunlar göstərir ki, Qərb və Türkiyə artıq Rusiyanın növbəti hədəfinin BTC və Azərbaycan ola biləcəyindən ehtiyatlanır, bunu hansısa yolla önləmək üzərində baş sındırırlar. Atəşkəsin pozulması da bu baxımdan Rusiya üçün məqsədini həyata keçirməkdə bəhanə rolunu oynaya bilər. Yəni Azərbaycanın sərt reaksiyası və erməni işğalçılarını tutduqları mövqedən geri oturtmağa qərar verməsi "erməni" adıyla rus qoşunlarının hərəkətə keçməsinə zəmin yaradar. Politoloq Vəfa Quluzadənin də bu aspektdə yanaşması diqqət çəkir. O, mətbuata açıqlamasında bildirib ki, Cənubi Qafqazda Qərbin maraqlarına zərbə vurmağı qarşısına məqsəd qoymuş Moskvanın iki planı olub. Birinci plana görə, Gürcüstana zərbə endirilməli, Mixail Saakaşvili hakimiyyəti devrilməli, bununla da Qərbin Mərkəzi Asiyaya və Qara dənizə çıxış yolları bağlanmalıydı. İkinci plan erməniləri yenidən Azərbaycanın üzərinə "qısqırtmaq" olub. Yəni Rusiyanın tapşırığıyla Ermənistan atəşkəsi daha güclü şəkildə pozub, Azərbaycanı da güclü cavab verməyə sövq edə bilərdilər. Sonra da bir-iki gün gözləyirdilər ki, bəlkə Azərbaycan ordusu irəliləyə, bir-iki kəndi alar. Bundan sonra da erməni qoşunları adı altında rus ordusu Azərbaycana hücum etmək barədə çoxdan düşünür. Vəfa Quluzadə o qənaətdədir ki, Azərbaycanın bəxti gətirib, Rusiya birinci planı işə salıb. Bununla belə, politoloq hesab edir ki, Moskva Azərbaycanla bağlı planı da kənara atmayıb, nəzərdə tutduqlarını yenə də həyata keçirməyə çalışa bilər. Düzdür, bəzi müşahidəçilər son günlər cəbhə xəttində atəşkəsi ermənilərin pozması hallarında yenilik və xüsusi bir hal görmür. Məsələn, politoloq Hikmət Hacızadə həmin müşahidəçilər sırasındadır. Ancaq o da etiraf edir ki, hazırda Rusiya Cənubi Qafqaz uğrunda vuruşur və bu proseslərdə Azərbaycana da ciddi zərbələr dəyə bilər. Ona görə də politoloq ehtiyatlı olmağın, hər bir addımı kifayət qədər ölçüb-biçməyin tərəfdarıdır Qısası, Azərbaycan da artıq real təhlükə qarşısındadır. Bütün bunlar isə göstərir ki, Azərbaycanın NATO-ya üzvlüyü prosesini sürətləndirməklə bağlı BAXCP-nin zamanında ortaya qoyduğu mövqe doğru olub. Əgər ötən dövr ərzində rəsmi Bakı Alyansa inteqrasiya ilə bağlı birmənalı mövqe ortaya qoysaydı, üzvlüklə bağlı prosedur başa çatsaydı, vəziyyət fərqli olardı. Başqa sözlə, Azərbaycanda əsasını qardaş Türkiyənin hərbi qüvvələri təşkil edən NATO bazası yerləşdirilsəydi, bu gün rus işğalı kimi bir təhlükə barədə danışmazdıq. Bununla belə, hələ də gec deyil və rəsmi Bakının NATO-ya üzvlüklə bağlı qəti hərəkətə keçməsi gərəkdir. Ən azı qardaş Türkiyəylə qarşılıqlı hərbi yardımla bağlı müqavilə imzalanmalıdır. Əks təqdirdə, zaman Ermənistanın strateji müttəfiqi olan, qarşılıqlı hərbi yardım barədə müqavilə imzalamış, Kollektiv Təhlükəsizlik Müqaviləsi Təşkilatı çərçivəsində İrəvanla əməkdaşlıq edən Rusiyanın lehinə işləyəcək. Qərbi Cənubi Qafqazdan sıxışdırmağa və Mərkəzi Asiyaya buraxmamağa çalışan Rusiyanın yaranmış bu boşluqdan yararlanmayacağı isə az inandırıcıdır. Təmas xətində intensivləşən atəş bizləri indidən hərəkətə gətirməlidir... xalqcebhesi