Ankara Sərkisyanın dəvətini götür-qoy edir Novruz Məmmədov: "Ermənilər idmandan da siyasi məqsədləri üçün yararlanmaq istəyirlər" Bir müddət əvvəl Ermənistan prezidenti Serj Sərkisyanın Türkiyə prezidenti Abdulla Gülü sentyabrda İrəvanda keçiriləcək iki ölkə komandalarının görüşünə dəvət edib. Ancaq bu dəvətə hələ də cavab verilməyib. Xatırladaq ki, qardaş ölkəyə ərazi iddiaları, qondarma "soyqırım" kompaniyası və Azərbaycan ərazilərinin işğalı səbəbindən 14 ildən çoxdur ki, Ankara İrəvanla diplomatik münasibətlərə son verib, quru sərhədlərini bağlayıb. ABŞ və Avropa Birliyi isə zaman-zaman Türkiyəni şərt irəli sürmədən Ermənistanla sərhədləri açmağa, diplomatik münasibətlər qurmağa çağırıb. Bu çağırışlar isə hər zaman Azərbaycanda narahatlıqla qarşılanıb. Çünki Türkiyə üzərindən Ermənistan dünyaya çıxış əldə edərsə, işğalçılıq siyasətindən əl çəkəcəyi inandırıcı görünmür. Rəvan Məmmədli Bu baxımdan Türkiyə prezidentinin Serj Sərkisyanın dəvətinə necə cavab verəcəyi diqqət çəkməyə bilməz. Əgər cavab müsbət olarsa, bu, diplomatik əlaqələrin qurulması istiqamətində atılan ilk ciddi addım anlamını verəcək. Seçki marafonunda sabiq prezident Levon Ter-Petrosyanla mübarizədə çətinliklə üzləşən, Moskvanın dəstəyilə və qan tökməklə hakimiyyətə yiyələnən Serj Sərkisyanın Türkiyəyə yönəlik manevrlər etməsi həm də cəmiyyətin diqqətini yayındırmağa yönəlib. Çünki erməni cəmiyyəti də iqtisadi problemlərdən yaxa qurtarmaq üçün Türkiyənin kommunikasiya imkanlarının nə dərəcədə əlverişli olmağından xəbərdardır və istər-istəməz diqqət bu proseslərə yönəlir. Məsələylə bağlı fikirlərini öyrəndiyimiz Prezident Aparatının Beynəlxalq əlaqələr şöbəsinin müdiri Novruz Məmmədov deyir ki, o, bu təklifə Türkiyə prezidenti əvəzindən cavab verə bilməz. Onun sözlərinə görə, üstündən xeyli keçməsinə baxmayaraq, Türkiyə bu məsələni hələ də hərtərəfli götür-qoy edir. Türkiyənin müxtəlif dairələrində bununla bağlı ilkin mövqelər sərgilənir, bildirilir: "Serj Sərkisyanın dəvətini qəbul edib-etməmək Türkiyə prezidentinin səlahiyyətində olan bir məsələdir, son qərarı onun özü qəbul edəcək. Bu təklifi qəbul edib-etməməsi üçün də onun əlində hərtərəfli əsaslar var. Digər bir tərəfdən, burada diqqəti cəlb edən başqa məsələdir. Ermənilərin indiki, belə bir mürəkkəb siyasi vəziyyətdə hansı metodlara əl atmaları maraqlıdır". Novruz Məmmədov vurğuladı ki, ermənilər hər hansı bir situasiyada bu cür incə məqamları tutmağa səy göstərirlər. İdman elə bir sahəddir ki, onu siyasətə qatmamaq, qarışdırmamaq da olar. Ancaq ermənilər "idman siyasətə qarışdırılmamalıdır" prinsipini kənara qoyaraq, idmandan da birbaşa siyasi məqsədləri üçün istifadə etmək istəyirlər. Onlar da yaxşı bilirlər ki, türklər idmanı, xüsusilə futbolu çox sevirlər: "Şahidsiniz ki, bir müddət öncə keçirilən futbol üzrə Avropa çempionatını izləmək üçün Türkiyə rəhbərləri İsveçrəyə və Avstriyaya getmişdilər. Odur ki, ermənilər də, Ermənistan rəhbərliyi də bu cür həssas, incə məqamlardan öz maraqları üçün istifadə etmək cəhdində bulunurlar. Ermənilər, ümumiyyətlə, bu cür hallara alışıblar. Belə demək mümkünsə, qadağan olunmuş metodlardan istifadə etmək ona sanki ləzzət verir". Prezident Aparatının şöbə müdiri Ermənistandakı proseslərin gələcək inkişafı ilə bağlı da fikirlərini açıqladı. Nəzərə çatdıraq ki, özünü fevralda keçirilən prezident seçkilərinin qalibi sayan Levon Ter-Petrosyanın tərəfdarları yeni kütləvi aksiyalar keçirmək fikrindədirlər. Novruz Məmmədov bildirdi ki, son dövrlərə kimi Ermənistanda daxili vəziyyət həddindən artıq mürəkkəb olub və belə demək mümkünsə, vəziyyət hələ də mürəkkəb olaraq qalmaqdadır. Əslində bu gün Sərkisyan elə seçkilərdə əsas opponenti, rəqibi olmuş Levon Ter-Petrosyanın şüarlarından, fikirlərindən istifadə edərək, onları həyata keçirərək, sabiq prezidentin tərəfdarlarının, bütövlükdə müxalifətin mövqeyini yumşaltmaq istəyir. Digər tərəfdən, ümumiyyətlə, o, özünün vəziyyətini yaxşılaşdırmaq üçün müxtəlif ağla gələn və gəlməz addımları atır: "Amma bununla belə, indi hələlik dəqiq bir fikir söyləmək, proqnoz vermək olmaz. Qarşıdan gələn aylar, dəqiq desək, ilin sonuna qədər baş verəcək proseslər vəziyyəti tamamilə aydınlaşdıracaq və yaxud aydınlaşdırmağa kömək edəcək. Vəziyyət aydınlaşacaq ki, proseslər hansı istiqamətdə gedib, gedir, gedəcək və ermənilər öz riyakarlıqları, öz hiylələrilə hansı dividendlər qazanmağa nail olacaqlar. Əgər onlar üçün belə bir imkan yaranarsa, bu, onların az da olsa vəziyyətini yaxşılaşdıra bilər. Odur ki, mən hələlik konkret bir fikir söyləyə bilmirəm". xalqcebhesi