“QƏRB-RUSİYA QARŞIDURMASI AZƏRBAYCANIN XEYRİNƏDİR” Vəfa Quluzadə: “Üçüncü dünya müharibəsi xəbərdarlığı var” Rusiyanın Gürcüstanı bombalaması əslində Kremlin Cənubi Qafqazı yenidən tam nəzarətə almaq planının tərkib hissəsi idi. Kreml yetkililəri özləri də bəyanatlarında dolayısı ilə olsa da, region uğrunda savaş apardıqlarını etiraf edirlər. Amma sözsüz ki, Rusiyanın hərəkətləri cavabsız qalmayacaq. Artıq yaxın günlərdə bölgəyə Amerika qüvvələrinin gətiriləcəyi haqda informasiyalar da öz təsdiqini tapıb. Bu arada İranla Amerika arasında çoxdandır gözlənilən savaş da başlanılsa, heç şübhəsiz ki, Qafqazda Qərblə Rusiya arasında konflikt yaranarsa, ölkəmiz ayaqlar altında qalacaq. Bir tərəfdən Rusiya, bir tərəfdən də İran Azərbaycanda öz məkrli planlarını icra etməyə başlaya bilərlər. Hər halda bu bir ehtimaldır və kifayət qədər real görünür. Mövzu ətrafında söhbət etdiyimiz politoloq Vəfa Quluzadə ilk öncə onu qeyd etdi ki, regionda baş verən hadisələr baxımından Azərbaycanın bəxti gətirib: “Söhbət ondan gedir ki, Rusiya çoxdandır Cənubi Qafqaz planlarına haradan başlamağı düşünürdü. Rusiya Cənubi Qafqaz ölkələrini yox, Amerikanın maraqlarına zərbə vurmaq istəyirdi. Bununla bağlı iki plan vardı. Birincisi, Gürcüstanı dağıtmaq, orada hakimiyyəti dəyişmək və bununla Qərbin Mərkəzi Asiyaya və Qara dənizə çıxış yollarını bağlamaq idi. Rusiyanın ikinci variant isə erməniləri yenidən Azərbaycanın üstünə qısqırtmaq idi. Burada təxribat törətmək və aranı qarışdurmaq Rusiya üçün asan idi. Onsuz da ermənilər hər gün atəşkəsi pozurlar, cəbhə kəndlərini gülləbaran edirlər, əsgərlərimizi öldürürlər. Rusiyanın tapşırığı ilə atəşkəsi daha güclü şəkildə pozub, Azərbaycanı da güclü cavab verməyə sövq edə bilərdilər. Sonra bir-iki sutka da gözləyirdilər ki, bəlkə Azərbaycan ordusu irəliləyər, bir-iki kəndi alar. Bundan sonra da erməni qoşunları adı altında rus ordusu Azərbaycanı darmadağın etmək barədə də çoxdan düşünürdü. Azərbaycanın bəxti gətirdi ki, Rusiya Gürcüstanla bağlı planı işə saldı. Amma Azərbaycanla bağlı planı da kənara atmayıblar. Gürcüstandan sonra Rusiya bizə qarşı da belə təxribatlara əl ata bilər”. Politoloq hesab edir ki, Gürcüstanda baş verənlərdən sonra Qərb oyanacaq: “Qərb çox ciddi hərəkətə keçməlidir. Onlar bilməlidirlər ki, Azərbaycanı da xilas etmək lazımdır. Hələlik onların başı Gürcüstana qarışıb. Rusiya öz qoşunlarını oradan çıxarmır. Azərbaycan da təhlükə içərisindədir. Mən neçə ildir deyirəm ki, Azərbaycana NATO bazalarını yerləşdirmək lazımdır. Amma bunu etmirdilər. Rusiyanın nazı ilə oynayırdılar, orada demokratiya yaratmaqdan danışırdılar. Amma mən inanıram ki, artıq Qərb, NATO rəhbərliyi oyanacaq. Heç olmasa Türkiyədən bir-iki bazanı gətirib Azərbaycanda yerləşdirmək lazımdır. İncirlikdən bir-iki təyyarə gəlib “Nasosnı”da yerləşə bilər, türk ordusu Naxçıvanda dayana bilər. Qərb isə bunu etmirdi, mənasız işlərlə məşğul olurdu. Rusiya isə boş sözləri qulaqardına vurur. Rusiya məhz Qərbin bu cür davranışlarının nəticəsində güclənib. İndi onun xeyli pulu var və bütün imkanlarını silahın inkişafına yönəldib. Artıq Rusiyanın istefada olan generalları, konkret olaraq, İvaşov deyir ki, üçüncü dünya müharibəsi başlaya bilər, çünki Qərb Rusiyanı Qara dənizdən sıxışdırır. Təsəvvür edin, Qərbin gücləndirdiyi Rusiya artıq onu üçüncü dünya müharibəsi ilə hədələyir”. Politoloqun dediklərindən belə başa düşülür ki, regionda qarşıdurma realdır. Bəs bu halda Azərbaycanın taleyi necə olacaq? V.Quluzadə “Azərbaycan yalnız xilas olacaq” deyə qeyd etdi: “Neçə illərdir başımızın üzərində olan buludlar çəkiləcək. Bilirsiz, biz təhlükəyə öyrəşmişik və eyni zamanda o qədər laqeyidik ki, ermənilər cəmi 360 km aralıda başımıza bomba yağdırır, biz restoranlarda yeyib-içib kef edirik. Bunu yalnız azərbaycanlılar bacarar. Bu baxımdan mən düşünürəm ki, Qərb-Rusiya qarşılaşmasında nəticə etibarilə Azərbaycan xilas olacaq”. “Bəs bu qarşıdurmada region, o cümlədən Azərbaycan Rusiya ordusu tərəfindən xarabalığa çevrilməyəcəkmi” sualına isə politoloqun cavabı belə oldu: “Qərbin gücü o qədərdir ki, bundan istifadə etsə, Rusiya onun qarşısında bir gün də dayana bilməz. Mən hesab etmirəm ki, qarşıdurma ən pik həddə qədər gəlib çatacaq. Adətən bu kimi məsələlərdə tərəflər öz gücünü, silahını, imkanlarını ortalığa qoyurlar, zəif tərəf avtomatik geri durur. Odur ki, bu məsələdə Rusiyanın geri çəkiləcəyi şübhəsizdir”. Elşad MƏMMƏDLİ musavat