TÜRKİYƏ NÖVBƏDƏNKƏNAR SEÇKİLƏRƏ HAZIRLAŞIR

SON XƏBƏRLƏR

TÜRKİYƏ NÖVBƏDƏNKƏNAR SEÇKİLƏRƏ HAZIRLAŞIR

2021.10.20, 07:36

Gunaz.tv

TÜRKİYƏ NÖVBƏDƏNKƏNAR SEÇKİLƏRƏ HAZIRLAŞIR Bələdiyyə və parlament seçkilərinin eyni gündə keçirilməsi üçün texniki hazırlıqlar artıq başa çatdırılıb

Türkiyədə bu il ərzində növbədənkənar parlament seçkiləri keçirilə bilər. Bu ehtimal ölkənin Yüksək Seçim Komissiyasının (YSK) başqanı Muəmmər Aydın tərəfindən dünən verilən açıqlamadan sonra daha da möhkəmlənib. M.Aydın jurnalistlərə bildirib ki, YSK bələdiyyə və parlament seçkilərinin eyni gündə keçirilməsini təşkil etməyə hazırdır. Onun sözlərinə görə, artıq bu yöndə texniki hazırlıqlar başa çatdırılıb: “Əgər növbədənkənar seçkilər qərarı alınsa, biz bu il ərzində seçkiləri təşkil edib keçirməyə hazırıq”. Qeyd edək ki, növbədənkənar seçkilər ehtimalı ilk dəfə hakim Ədalət və İnkişaf Partiyasının (AKP) bağlanması iddiasının qaldırılmasından sonra gündəmə gəlib. Məlumatlara görə, AKP hazırda növbədənkənar seçkilərə getməyi ölkədə yaranmış siyasi gərginlikdən mümkün çıxış yollarından biri kimi müzakirə edir. Əgər Konstitusiya Məhkəməsi AKP-ni bağlasa, o zaman partiya parlamentdə dərhal növbədənkənar seçkilər haqda qərar çıxara bilər. Məhz bu səbəbdən hakim çoxluq parlamentin yay istirahətinə çıxmasını ləngidib. Konstitusiya Məhkəməsi AKP-nin işi üzrə qərar çıxarmaq üçün iyulun 28-də toplaşacaq. Hazırda AKP-də bütün diqqətlər məhkəmənin hansı qərarı çıxaracağına yönəlib. Baş nazir Rəcəb Tayyib Ərdoğan bugünlərdə çıxışlarının birində deyib ki, rəy sorğularına görə, onun partiyası azı 48 faiz səs ala bilər. Müşahidəçilərə görə, AKP hökuməti növbədənkənar seçkilərdə yenidən güclənərək, lakin bu dəfə başqa ad altında ortaya çıxacağına arxayındır. Türkiyədə parlament seçkiləri cəmi bir il əvvəl keçirilib və AKP 47 faiz səs alaraq ikinci dəfə təkbaşına hökumət qurub. Həmin seçkilərlə bağlı qərar Türkiyə Silahlı Qüvvələrinin hökumətə qarşı dünyəvi dövlətə yönələn təhlükələr və Atatürk ideyalarına qarşı fəaliyyətlə bağlı sərt ultimativ bəyanatından sonra alınmışdı. Həmin vaxt Ərdoğanın taktikası özünü doğrultdu və Silahlı Qüvvələr tərəfindən sıxışdırıldığı haqda imici formalaşan AKP səslərini artırdı. Bu dəfə isə AKP dünyəvi dövlətin prinsiplərini müdafiə edən prokurorluq və yüksək məhkəmə tərəfindən sıxışdırılır. Ona görə də AKP özünün məzlum obrazını formalaşdırmaqla səslərini daha da artıra bilərdi. Lakin bir çox müşahidəçilər hesab edir ki, əgər AKP bağlansa, növbədənkənar seçkilər variantı özünü doğrultmaya bilər. Çünki bu zaman partiyanın Ərdoğan kimi xarizmatik lideri siyasətdən kənarlaşmış olacaq, AKP-də isə onun kimi xarizmaya və nüfuza sahib olan ikinci adam yoxdur. Bu səbəbdən AKP-nin bazasında qurulan yeni partiya seçkilərdə gözlənildiyi qədər səs almaya bilər. Xəbər xidməti musavat

GUNAZ.TV

SON XƏBƏRLƏR