Türkiyənin ölkəmizdəki səlahiyyətli elçisi Hülusi Klıca açıq məktub Azərbaycan Xarici İşlər Nazirliyinin diqqətinə Sayın Hülusi bəy! Türkiyə-Azərbaycan qardaşlığı biz azərbaycanlılar tərəfindən hər zaman çox yüksək qiymətləndirilir. «Türkün türkdən başqa dostu yoxdur» kimi deyimlər hər zaman bizim iftixar duyduğumuz hissləri əks etdirib. Ancaq təəssüf ki, «iki dövlət bir millət» deyərək zəifləməsini əsla istəmədiyimiz bu dostluğa qibtə edənlər, ona kölgə salmağa və onu pozmağa çalışan pis niyyətlilər mövcud olub və nə yazıq ki, olacaq da. Bu gün də belə pis niyyətlilərdən birinin Türkiyyədə dərc olunan «Hüriyyət» qəzetində yayınladığı və biz azərbaycanlılar üçün ən böyük təhqir, dövlətçiliyimizə zərbə, zatən dünya toplumu tərəfindən tapdanmaqda olan haqlarımıza sayqısızlıq kimi qəbul edilə biləcək məlumat dərc olunub. Qəzetin 8 iyul (Temmuz) 2008 sayındakı iqtisadiyyat səhifəsində «Türkiye elektrikli ev eşyası fiyatında Avrupaya fark attı» başlıqlı materialda adları sadalanan 37 dünya dövləti sırasında Qarabağ bir ayrı dövlət kimi təqdim olunub ki, bu da zatən ermənilər tərəfindən işğal olunmuş Azərbaycana aid ərazinin qəbul olunmamış statusda tanıtılmasıdır. Qarabağı Almanya, Danimarka, Fransa ilə bir sırada ayrı bir dövlət kimi göstərməyin arxasında çox böyük bir təxribat dayanır. Bu yanaşmanı təkcə Azərbaycana, onun ərazi bütövlüyünə qarşı sayqısızlıq və təhqir kimi deyil, həm də iki türk dövləti arasında nifaq salmaq, onlar arasındakı dostluğu pozmaq istəyənlərin çirkin əməli kimi qiymətləndirir və buna kəskin şəkildə etiraz edirik. Materialda həmçinin Türkiyə üçün maraq nöqtəsi olan Kıprısla bağlı da sətiraltı eyham yer alıb. Belə ki, yazıda Kıprıs bütün bir dövlət kimi təqdim olunub ki, bu da Kıprıs Türk Cümhüriyyətinin statusuna qarşı sayğısızlıq və həqarət kimi qiymətləndirilə bilər. Qəzet məişət əşyaları ilə bağlı statistik məlumatların hazırlanmasında Türkiyə Statistik Qurumunun da iştirak etdiyini vurğulayıb. Biz qardaş və dost olan qanımız bir türklərin belə bir hərəkət etdiyinə inanmamaqla yanaşı, bu pis niyyət arxasında duranların cəzalandırılmasını tələb edirik. Türkiyə-Azərbaycan dostluğu bizim üçün olduqca dəyərli və əvəzolunmazdır. Bu dostula kölgə salmaq istəyən mənfur niyyətli insanların Türkiyə basınında belə hərəkətlərə yol verməsinə şərait yaradan qəzet rəhbərliyinin də məsuliyyət cəlb edilməsini tələb edirik. Əks halda belə kiçik detallara göz yummaq, düşmənlərimizin əl-qol açmasına və iki qardaş xalq arasında nifaq yaranmasına səbəb ola bilər. Sayın Hülusi bəy! Türkiyəni ölkəmizdə layiqincə təmsil edən bir elçi olaraq etirazımızın Türkiyə Cümhuriyyətinin yetkililərinə çatdırılacağına və bu sorunun ədalətli şəkildə çözüləcəyinə, günahkarların bulunaraq cəzalandırılacağına inanaraq bu məktubu Sizə yazırıq. Böyük türk dostluğunu pozmaq niyyətində olanlara qarşı bərabər mücadilə edək. Şəhla Əbusəttər Araşdırmaçı Jurnalistlərin Azərbaycan Şəbəkəsinin üzvü Qeyd: Cənab səfirə ünvanlanmış açıq məktubun Azərbaycan Respublikası Xarici İşlər Nazirliyi tərəfinin də diqqətində olacağına inanırıq və ümid edirik ki, analoji halların qonşu dost dövlətdə təkrarlanmaması üçün hər iki dövlətin aidiyyatı orqanları bəbarbər tədbir görəcək. bizimyol