Rusiya telefonlarımızı dinləmək niyyətindədir "Rostelekom"un Azərbaycanın rabitə xidmətləri bazarına buraxılması yolverilməzdir" Rusiyanın rabitə nəhəngi olan "Rostelekom" Azərbaycanın rabitə xidmətləri bazarına girmək istəyir. Bu şirkətin 2008-2012-ci illər üçün strategiyasının təsdiqlənərkən prioritet istiqamət qismində MDB bazarları da götürülüb. "Rostelekom"un potsovet məkanıyla bağlı planlarında "Aztelekom"un da adı keçir. Mütəxəssislərin fikrincə, Rusiya "Aztelekom" İstehsalat Birliyinə yiyələnməklə faktiki olaraq Azərbaycanın elektron rabitə, telefon və internet rabitəsinə nəzarəti ələ keçirmiş olacaq. Politoloq İlqar Məmmədova görə, "Rostelekomun" şirkətinin "Aztelekom" İB-yə göz dikməsi təhlükəli görünür. Tural Amma ən təhlükəli məsələ Azərbaycan iqtisadiyyatının rəqabətə əsaslanmamalıdır: "Bu gün qəti şəkildə demək olmaz ki, Rusiya şirkətləri Azərbaycana gəlməsin, hansısa bir sahədə pay sahibi olmasınlar. Məsələ ondadır ki, müxtəlif iqtisadi sektorların o cümlədən, telekommunikasiya sahəsinin inhisarlaşması başqa ölkələrin nəhəng şirkətlərinin Azərbaycanda rahat fəliyəti üçün də rahat imkan yaradır. Yəni "Rostelekom" gəlir, bazarda özündən başqa heç kimi görmür, ölkəmizdə rəqabət imkanının olmaması isə bu şirkətə geniş imkanlar aça bilər. Bu monopoliyalar olmasa, rəqabət yaransa, kim gəlir gəlsin, bizə o qədər də təhlükə törətməz. Əgər rəqabətli iş qurulsa, bütün sahələrdə xarici ölkə təmsilçilərinin fəaliyyəti təhlükəsi olmaz. Amma istənilən halda hər hansı bir ölkə şirkətinin Azərbaycanda nəhəng bir sektoru nəzarətə götürməsi arzuolunmazdır. Çünki bir çox hallarda bu nəhəng şirkətlər ölkəmizin ictimai-siyasi həyatına təsir göstərə bilərlər". Politoloq Məhərrəm Zülfüqarlı Azərbaycanın Cənubi Qafqaz respublikalarından fərqli olaraq strateji cəhətdən əlverişli mövqedə yerləşməsinin və təbii sərvətlərə malik olan bir ölkə olmasının "Rostelekom" kimi şirkətlər üçün cəlbedici olduğunu bildirdi. Ekspert imperialist ideyalarla yaşayan Rusiyanın Azərbaycanda "Rostelekom"un əliylə müəyyən sektorlara nəzarət etməyə çalışdığını bildirir: "Təəssüf ki, Rusiya sovet ənənəsini davam etdirir və Azərbaycanı da öz təsir dairəsinə salmaq istəyir. Yəni əgər Rusiyada demokratik rejim bərqərar olarsa, bərabər səviyyəli qonşuluq siyasəti yürüdülərsə, bu kimi təşəbbüslərdən ehtiyatlanmağa dəyməz. Amma bilirik ki, Azərbaycanın iyirmi faiz torpağı işğal olunub və bu da bilavasitə Moskvanın Ermənistana hərbi-siyasi köməyilə baş tutub. İndi də ərazilərimizi işğal etmiş, Rusiyanın forpostu olan Ermənistana şimal qonşumuz hərtərəfli dəstək verir. Yəni Moskvanın apardığı siyasət imkan verir ki, deyək ki, Rusiyanın Azərbaycan telefon bazarına girmək niyyəti xoşməramlı deyil". İnformasiya əsrində yaşadığımızı nəzərə alsaq, Moskvanın Azərbaycanda elektron rabitə, telefon və internet rabitəsinə nəzarəti ələ keçirməsi Ermənistanda yaranan Rusiya asılılığının nisbətən bizə də sirayət etməsindən xəbər verəcək: "Əgər Ermənistan sabah NATO-ya üz tutsa Moskva ona imkan verməyəcək. Buna görə Azərbaycan bütün sahələrdə Qərb ölkələrilə, xüsusən də qardaş Türkiyə ilə əməkdaşlığı gücləndirməlidir. "Rostelekom"un rabitə xidmətləri sektoruna buraxılması ənənəvi rus siyasətinin davamı ola bilər. Yəni belə bir təhlükə var ki, bu yolla Azərbaycanda mövqelərini gücləndirən Moskva gələcəkdə Bakının müstəqil siyasət yürütməsinə mane ola bilər". xalqcebhesi