Qafqazda "siyasi-hərbi temperatur" artır Rauf Mirqədirov: "Bəzi siyasətçilər Rusiyanın Azərbaycanı iki dəfə işğal etməsini unutdurmağa çalışırlar" Rusiya separatçı Abxaziya ilə sərhəddə "Qafqaz-2008" adlı hərbi təlimlərə başlayıb. Kremlin "antiterror təlimləri" adlandırdığı bu manevrlərdə 8 min hərbçinin və 700-dən çox hərbi texnikanın iştirakı nəzərdə tutulub. ABŞ da Gürcüstanda Rusiya ilə eyni vaxtda hərbi təlimlərə başlayıb və bu təlimlərə 3 həftə davam edəcək. Mütəxəsislərin fikrincə, Qafqazda "siyasi-hərbi temperaturun" artması Azərbaycanın xarici siyasət sahəsində diqqətli olmağa vadar edib. Politoloq Rauf Mirqədirov Kremlin Qafqazda güc nümayişinə başlamasını təhlükəli amil sayır, belə təlimlərin region üçün narahatlıq yaratdığını bildirdi. Tural Ekspert Gürcüstanın ABŞ hərbçilərilə birgə hərbi manevrlərə əl atmasını isə Rusiyaya cavab addımı kimi qiymətləndirdi: "Bu hər iki ölkənin güc nümayişidir və bir-birinə hədə qorxu gəlmək məqsədilə atılmış addımlardır. Belə geniş miqyaslı təlimləri ABŞ və İranın, Ermənistan və Azərbaycanın da keçirdiyinin şahidi olmuşuq. Yəni bu münaqişə halında olan dövlətlərin əl atdığı bir üsuldur. Sözsüz ki, bu cür təlimlər artıq münaqişənin bir qədər açıq mərhələyə keçdiyini nümayişidir". Ekspert Gürcüstan və Rusiyanın münaqişəni açıq müstəviyə keçirməsini təhlükəli məqam sayır. O tərəflərin güzəşt əvəzinə, əzələ nümayişinə əl atmasının ağır nəticələrə gətirib çıxaracağını istisna saymadı. Əgər dünənə qədər səylər münasibətlərin yumşalmasına, münaqişənin həllinə yönəlirdisə, indi bu səylər ziddiyyətlərin hərbi qarşıdurma mərhələsinə keçməsinə yönələcək. Rauf Mirqədirov belə addımın Rusiyanın regionda yeni rolunu müəyyənləşdirdiyini, bu məsələnin Azərbaycan üçün də çox ciddi əhəmiyyət daşıdığını söylədi: "Narahat doğuran hal isə odur ki, bu gün Azərbaycanda açıq şəkildə rusiyapərəst olduğunu bəyanlayan insanlar çoxalıb. Fikrimcə, bu özü də çox ciddi təhlükədir. Çünki bəzi siyasətçilər bizə Rusiyanın Azərbaycanı iki dəfə işğal etməsini unutdurmağa çalışırlar. Bu gün hesab edirlər ki, guya Moskvayla normal münasibətlər Bakı üçün kifayət qədər yaxşı təminatdır. Guya Azərbaycan özü üçün sabit hərbi- siyasi təhlükəsizlik sistemi axtarmamalıdır, neytral qalmalıdır. Məqsəd Azərbaycanın Avropaya, NATO-ya inteqrasiyası prosesini saxlamaq, ən azı ləngitməkdir". Politoloq Gürcüstanın NATO-ya üzvlüklə bağlı açıq addımlar atmasından sonra Rusiyanın faktiki surətdə separatçı Abxaziya və Cənubi Osetiyanı ilhaq etdiyini və Çexiyada ABŞ-ın Raketdən Müdafiə Sistemi elementlərinin quraşdırılmasıyla bağlı müqavilədən dərhal sonra Moskvanın Praqaya neftin ixracını azaltdığını xatırlatdı. Azərbaycan imperialist ideyalarla yaşayan Rusiyanın təhdidlərilə hər an üzləşəcəyini unutmamalıdır: "Yəni belə bir yaxın qonşudan özünü maksimum qorumaq lazımdır. Amma təəssüf ki, hazırda Azərbaycan belə xətti yeritmir. Hər halda bu proseslər Bakı üçün gələcəkdə çox ciddi problemlər yarada bilər. Ümumiyyətlə, Rusiyanın separatçı Abxaziya sərhədləri yaxınlığında "Qafqaz-2008" adlı hərbi təlimlərin keçirilməsi təkcə Gürcüstan üçün xəbərdarlıq sayılmamalıdır". xalqcebhesi