“ERMƏNİSTAN ORDUSUNDA PARÇALANMA VƏ ACLIQ HÖKM SÜRÜR” Eldar Sabiroğlu: “Onların baş naziri ilə müdafiə nazirinin cəbhə xəttində olmalarına əhəmiyyət vermək lazım deyil” Ermənistan hökumətinin iyulun 12-də tam tərkibdə Azərbaycanla həmsərhəd Tavuş vilayətinə səfər edərək cəbhə xəttində yerləşən hərbi hissələrdə əsgərlərlə görüşməsi barədə məlumat vermişdik. Ermənistan informasiya mənbələrinin yaydığı məlumatda vurğulanırdı ki, müdafiə naziri Seyran Ohanyan, baş nazir Tiqran Sərkisyan başda olmaqla, hökumətin üzvləri əsgərlərlə söhbət edib, xidmət şəraiti ilə maraqlanıblar. Baş nazirlə müdafiə naziri əsgərlər qarşısında atıcılıq məharətlərini də nümayiş etdiriblər. Oxucularımız bizə müraciət edərək Azərbaycanın baş nazirinin və müdafiə nazirinin cəbhə xəttinə nə vaxt gedəcəyi ilə maraqlanırlar. Suallar da eynidir: Azərbaycanın baş naziri ilə müdafiə naziri Ermənistan hökumətinin addımına cavab olaraq, səngərə getməyi planlaşdırırmı? Dünən gün ərzində Nazirlər Kabinetinin mətbuat xidmətinə dəfələrlə zəng etsək də, dəstəyi qaldıran olmadı. Müdafiə Nazirliyindən isə sualımıza ictimaiyyətlə əlaqələr şöbəsinin rəisi Eldar Sabiroğlu cavab verdi. E.Sabiroğlu bildirdi ki, Ermənistanın baş naziri və müdafiə naziri cəbhə xəttində iyulun 12-də olublar: “Bundan əvvəl Azərbaycan silahlı qüvvələrinin Ali Baş Komandanı İlham Əliyev dəfələrlə cəbhə xəttində, səngərdə əsgərlərlə görüşüb. Azərbaycanın müdafiə naziri Səfər Əbiyev də cənab prezidentlə birlikdə səngərdə olub. Digər dövlət və hökumət rəsmiləri, deputatlar dəfələrlə cəbhə xəttində olublar. Biz yarış keçirmirik ki, Ermənistan hansı addım atsa, dərhal ona uyğun olaraq biz də həmin addımı atmalıyıq. Belə şeylərə əhəmiyyət vermək lazım deyil. Dövlət rəsmilərinin və ali baş komandanın, müdafiə nazirinin cəbhə xəttinə səfərlərinin sayına görə də Azərbaycan Ermənistandan üstün vəziyyətdədir”. E.Sabiroğlunun sözlərinə görə, İrəvanda bu ilin martında baş verən qanlı hadisələrdən sonra Ermənistan ordusunun daxilində parçalanma baş verib. Ordu iki tərəfə bölünüb. Tərəflərdən biri ölkə rəhbərliyini qəbul etmir. Baş nazirin və nazirlərin cəbhə xəttinə gəlməsi və əsgərlərlə görüşməsi bu acınacaqlı vəziyyətin aradan qaldırılması üçündür: “Ermənistan ordusunda parçalanma davam edir, fərarilərin sayı sürətlə artır. Bunu Ermənistanın qeyri-hökumət təşkilatları da bəyan edirlər. Ermənistan ordusunda aclıq hökm sürür. Bir sıra hərbi hissələrdə əsgərlər aclıq ucbatından evlərinə qaçırlar. Valideynlər hərbi hissəyə övladlarına yemək daşımaqdan təngə gəliblər. Əsgərlər və valideynlər bu vəziyyətin günahkarı kimi hökuməti görürlər. Hökumət bu vəziyyətin fərqindədir”. Etibar SEYİDAĞA musavat