“ERGENEKON” İTTİHAMI QİSMƏN AÇIQLANDI General Vəli Kiçik da daxil olmaqla, həbs edilənlərin bir çoxuna ömürlük həbs tələb ediləcək Türkiyədə ölkənin siyasi gündəmində uzun müddətdir əsas yeri tutan “Ergenekon” istintaqı, nəhayət, qismən başa çatıb. Dünən istintaqı aparan İstanbul cümhuriyyət baş prokuroru Aykut Cengiz Engin mətbuat qarşısında tutulanlara və şübhəli şəxs qismində istintaqa cəlb olunanlardan bir hissəsinə qarşı rəsmi ittiham aktını açıqlayıb. Prokuror 2500 səhifəyə yaxın olan ittiham aktının ancaq qısa məzmunu haqda mətbuata məlumat verib, daha sonra sənəd baxılmaq üçün məhkəməyə göndərilib. Pokuror məlumat verib ki, 2007-ci ilin iyulunda İstanbulun Umraniyə səmtindəki gecəqondulardan birində tapılan əl qumbaraları və partlayıcı maddələrlə bağlı aparılan istintaqın əsas hissəsi tamamlanıb. İstintaqı 3 prokuror aparıb. Prokuror deyib ki, istintaqın bu qədər uzanması işlə bağlı yüz minlərlə sənədin araşdırılması, minlərlə dəlilin nəzərdən keçirilməsi və çoxsaylı şahidlərin, şübhəli şəxslərin ifadələrinin alınması ilə bağlı olub. Onun sözlərinə görə, hazırda işlə bağlı 48 nəfər həbsdədir, 38 nəfər isə şübhəli şəxs qismində azadlıqda olmaq şərti ilə istintaqa cəlb edilib. Engin məlumat verib ki, istintaqa cəlb olunanlar terror təşkilatı qurmaqda və ona yardım etməkdə, hökuməti zor gücüylə devirmək planları hazırlamaqda, məxfi dövlət məlumatlarını əldə edib saxlamaqda, hərbi itaətsizliyə təşviq etməkdə, xalqı kin və nifrətə təşviq etməkdə və ölkədə xaos formalaşdırmaq planlarında ittiham olunurlar. Onun sözlərinə görə, tutulanlar ayrı-ayrı mühakimə olunacaq. Çünki cinayətkar təşkilat qurub ona rəhbərlik etmək ittihamı bu təşkilata üzv və yardım edənlərə şamil edilmir. Açıqlanan ittihamlar əsasən istefada olan jandarma generalı Vəli Kiçik və digərlərinə aiddir. Əgər bu ittihamlar üzrə cinayətləri sübut olunsa, onları ömürlük həbs cəzası gözləyir. Prokuror deyib ki, istefada olan dəniz qüvvələri komandanı, ordu admiralı Özden Örnekə aid olduğu iddia edilən və hərbi çevriliş planlarından bəhs edən gündəliklər işə əlavə olunmayıb. Bu isə o deməkdir ki, prokurorluq saxlanılanları hərbi çevriliş planlarında ittiham etmir. Engin deyib ki, “Ergenekon” istintaqı ilə bağlı mətbuatda neçə vaxtdır yazılanların böyük qismi uydurmadır və bununla da ictimai fikir yönləndirilməyə çalışılıb. O, saxlanılanların “Ergenekon” adlı terror təşkilatına mənsub olması barədə də istintaq sənədlərində heç nə deyilmədiyini bildirib. Prokuror deyib ki, həmin təşkilatın adının “Ergenekon” kimi göstərilməsi prokurorların yox, bu təşkilata mənsub olanların seçimidir. Ergin məlumat verib ki, aralarında istefada olan ordu generalları Xurşud Tolon və Şener Eruyğurun da olduğu 1 iyul əməliyyatlarında həbs edilənlər haqqında rəsmi ittiham hələ hazır deyil. O, həmin qrupa dair rəsmi ittihamın daha sonra hazırlanaraq işə əlavə ediləcəyini deyib. Qaydalara görə, İstanbul ağır cəza məhkəməsinin ittiham aktını dəyərləndirmək üçün 15 gün vaxtı var. Bu müddət ərzində məhkəmə ya işi ibtidai istintaqa qaytara, ya da baxılmaq üçün qəbul edə bilər. Məhkəmə prosesinin isə kifayət qədər uzun olacağı ehtimal edilir. Çünki məhkəmə dəlil kimi təqdim edilən minlərlə sənədi, çoxsaylı ifadələri nəzərdən keçirməlidir. Görünən odur ki, “Ergenekon” işi Türkiyənin neçə vaxtdır gərginlik içərisində olan siyasi gündəmini hələ uzun müddət məşğul edəcək. F.MƏMMƏDOV musavat