Saxta və ölü siyasət O. ARAS Son zamanlar Türkiyə ilə Ermənistan arasında yumşaq münasibətlər yaranmaqdadır. Xüsusilə də Türkiyədə "ermənipərəst" jurnalistlər tərəfindən yayılan şayiələr və mübahisəli seçkilərdə qalib gələn Serj Sərkisyanın "normal prezident" kimi türk ictimai rəyinə təqdim olunması cəhdi şərh edilməkdədir. Guya Sərkisyan və onun əhatəsindəkilər artıq "soyqırım" sözünü deyil, "Keçmişin acı hadisələri", "Tarixi həqiqətlər" kimi Türkiyənin xeyrinə olan şüarlar səsləndiriblər. Hətta bir zamanlar Tayyib Ərdoğanın irəli sürdüyü "hadisələri tarixçilər araşdırsın!" şüarına belə Sərkisyan müsbət münasibət bəsləyib. Bunları Türkiyənin bəzi mətbuat orqanlarında oxuyarkən adam gözlərinə inanmır. Bütün türklərə qatil gözüylə baxan millətin birdən-birə belə yumşalması və Tayyib Ərdoğana, Abdullah Gülə mesaj göndərməsi ağlasığmaz haldır. Serj Sərkisyan sentyabrın 6-da Yerevanda oynanılacaq Türkiyə-Ermənistan matçına Abdullah Gülü də dəvət edib. Təbii ki, Abdullah Gülün oyuna gedib-getməyəcəyi hələ məlum deyil. Amma ermənilərdən çox "ermənipərəst" olan bəzi köşə yazıçıları indidən "getsin" deyə kampaniyaya başlayıblar. Ermənistan Qarabağ mövzusunda addım atmayınca, "soyqırım" ifadəsindən imtina etməyincə, hələ də həzm edə bilmədiyi Türkiyə sərhədlərini tanımayınca, onlara qarşı atılan hər addımın hədər olduğunu bu kor yazarlar görmürlərsə, siyasətçilər mütləq bunların fərqinə varmalı və münasibət göstərməlidirlər. Türkiyəni ölümə sürükləyən bu ölü siyasət davam etdikcə, Türkiyənin və türk dünyasının heç bir məsələsinin həlli mümkün deyil. Təbii ki, bu hadisələrin fərqinə varan diqqətli yazıçı və jurnalistlərimiz də var. Onlardan Ərdal Şəfəq "İrəvan məsələsi"ni çox gözəl şəkildə analiz edib. Ərdal Şəfəqin fikrincə, heç bir yumşaq münasibət, heç bir güzəşt "Bir millət, iki dövlət" sayılan Türkiyə ilə Azərbaycanın qardaşlığından üstün ola bilməz! Onun diliylə desək, Türkiyə ilə Azərbaycan qardaşlığından daha vacib heç nə yoxdur! Keçmişləri kimi gələcəkləri də ortaq olan bu iki dövlətin qardaşlıq münasibətləri heç nəyə fəda edilə bilməz! Ərdal Şəfəq bunları yazır: "Qarabağ problemi Azərbaycanın xeyrinə çözülməsə, Türkiyə nə Ermənistanla sərhədini aça, nə də İrəvanla diplomatik əlaqələr qura bilər". Şübhəsiz ki, Ərdal Şəfəqi və onunkimiləri alqışlamaq lazımdır. Bu qarışıq və süni şəraitdə onların soyuqqanlı təhlilləri və hadisələrə milli ruhda baxışları, az da olsa, adama təsəlli verir. Gün gələcək, Türkiyə və Azərbaycan Ermənistanla da sağlam qonşuluq münasibətləri quracaq. Amma bütün bunlar yalnız və yalnız Ermənistanın irqçilik və işğalçılıq siyasətindən imtina etdiyini açıqlamasından, dava yerinə barışıq münasibətlərini qəbul etməsindən və qonşu torpaqlara göz dikməkdən yayınmasından sonra həyata keçə bilər. O zaman biz də barışıq siyasətini və dostluq münasibətlərini səmimi şəkildə dəstəkləyəcəyik. Orxan ARAS Almaniyadan yazır [email protected]/* */ 525