“Yəhova şahidləri” bölgələrdə ailələr dağıdır Nəsibə Quliyeva adlı qadının başçılıq etdiyi dəstə Bərdədə missionerlik fəaliyyətini genişləndirir Bölgələrdə “Yəhova (Yeqovo) şahidləri” dini sektasına üzv olanların sayı artır. Bu dini sektaya qoşulanlar arasında xüsusilə qadınlar çoxluq təşkil edir. Dini qurumun sıralarına cəlb olunan zərif cinsin nümayəndələri dini rəhbərləri tərəfindən boşanmaya məcbur edilir, daha sonra isə dini ədəbiyyatların yayılması işinə və təbliğatçılığa təhrik olunurlar. Həmçinin həmin qadınlara öz qız övladlarını bu dini sektadan olmayanlara ərə vermək də yasaq edilir. Lent.az-ın Qarabağ bürosunun araşdırmalarına görə, “Yəhova şahidləri”nin ən çox artdığı rayonlardan biri Bərdədir. Dini sektanın üzvləri bu rayonda balacadan-böyüyə hamını öz əqidədaşı etməyə çalışırlar. Küçəbəküçə dolaşan təbliğatçılar xüsusilə məktəbləri hədəf seçirlər. Vətəndaşlarla söhbətdən məlum olur ki, onlara yaxınlaşan sekta üzvləri kitab açır, həmsöhbətlərinə Cənnət və Cəhənnəmdən bəhs edirlər. Deyirlər ki, sənə Tanrıdan xoş xəbər var. Məlumatlara əsasən, sektanın Bərdə nümayəndəliyinin rəhbəri 1959-cu ildə anadan olan Bərdə rayon sakini Nəsibə Sədi qızı Quliyevadır. Məsələ ilə bağlı fikirlərini öyrənmək istədiyimiz Nəsibə Quliyeva bizim polis tərəfindən öyrədildiyimizi iddia etdi: “Mən dedim sizə, əgər sizin başınız cəncəl çəkmək istəmirsə, məndən uzaqlaşın. Bax, mən sizə deyirəm. Onlar hamını mənə protiv öyrədirlər”. Daha sonra kitab açır: “Bax, bu saat Allahın hökuməti qurulub. Bu kitab bunların açıqlamasını sənə öyrədir. Daniel İki 44-ə bax. Eramızdan çox-çox əvvəl yaşayıb Daniel İki 44. Bu gün haqda deyib: “O padşahların dövründə - yəni bu padşahların dövründə - insanlar olan padşahların dövründə göylərin Allahı heç vaxt dağılmayan bir hökumət quracaq”. Allahın hökuməti şeytanla bərabər bu saat idarə eləyir”. Bərdə rayon sakini Elman Məmmədovun ailəsi xanımının “Yəhova şahidləri”nə qoşulması üzündən dağılıb. Həyat yoldaşı 17 illik ailə həyatını özünün dərk edə bilmədiyi inanca dəyişib. Ərindən gizli şəkildə Nəsibə Quliyevanın yaratdığı sektanın məclislərinə qoşulandan sonra övladlarını və ərini tərk edib. Elman Məmmədovun dediklərindən: “Anası, bacısı-qardaşı hamısı bundan imtina etdilər, evdən qovdular. Mən də məcbur olub qovdum. Bir ildir ayrı yaşayırdı. Əvvəllər Yevlaxda bacısının evində qalırdı. Sonradan həmin Nəsibə Quliyeva burdan onu pulla təmin elədi ki, bura gəlib getsin. Əsasən ora gəncləri, qız və oğlanları cəlb edirlər. Oğlan uşağının əsgərlik məsələsi var. Bunlar da deyir ki, biz Azərbaycan Ordusuna uşaq verməyəcəyik əsgərliyə, nə də erməniyə biz güllə atmarıq. Onlar bizim dövlətçiliyimizi şübhə altına alırlar”. Övladının bu kimi sektalara qoşulacağından qorxan valideynlər missionerlərin ifşa olunmasını istəyirlər. Elman Məmmədov deyir ki, Nəsibə Quliyeva hər yanda Ədliyyə Nazirliyindən lisenziyalarının olduğunu deyir: “Bunun qarşısını niyə alan yoxdur, bilmirəm. Ədliyyə Nazirliyindən lisenziyası varsa, ədliyyə naziri niyə ayda bir dəfə yoxlamır bunları ki, görüm bu qurum nə işlə məşğuldur? Bağlı qapı arxasında din olur? Bizim də məscidlərimiz var, qapıları hamının üzünə açıqdır. Hamı da sərbəst gedir-gəlir. Amma bunlar bağlı qapı arxasında məxfi işlərlə məşğuldurlar. Dövlət əleyhinə çalışırlar. Bu, nəinki Bərdədə, Azərbaycanın bütün bölgələrində gənc ailələrin dağılmasına səbəb olan bir işdir”. Bərdə Rayon Polis Şöbəsinə bir neçə rayon sakinindən oxşar şikayət daxil olub. Araşdırmalar zamanı Nəsibə Quliyevadan və onunla birlikdə məclis keçirən 16 nəfərdən çoxlu sayda dini kitab və təbliğat vasitələri götürülüb. Məlumatlara görə, sözügedən Nəsibə Quliyevanın bu fəaliyyətə başlaması Amerikadan gəlmiş rəfiqəsinin rayon məktəblərinin birində ingilis dili müəlliməsi işlədiyi tarixə təsadüf edir. Başqa bir məlumatda isə bildirilir ki, “Yəhova şahidləri” dini sektasının əsas qurumlarından biri Gürcüstan paytaxtında yerləşir. Həmin qurumun rəhbərlərindən biri milliyyətcə ermənidir və Ermənistan xüsusi xidmət orqanlarının mayor rütbəli zabitidir. “Azərbaycanda fəaliyyət göstərən “Yəhova şahidləri” adlı dini təriqət dövlət qeydiyyatından keçdiyindən və qanun çərçivəsində fəaliyyət göstərdiyindən onların fəaliyyətinə heç bir qadağa qoyulmayıb”. Bunu Lent.az-a açıqlamasında Dini Qurumlarla İş üzrə Dövlət Komitəsinin şöbə müdiri Gündüz İsmayılov deyib. Onun sözlərinə görə, “Yəhova şahidləri” dini icması Ədliyyə Nazirliyində rəsmi qeydiyyatdan keçib. Əsas fəaliyyət mərkəzi isə Bakı şəhəridir və bu, onların nizamnaməsində də öz əksini tapıb: “Hansısa dini təriqətin bölgələrdə genişlənməsinə gəldikdə, bundan narahat olmağa dəyməz”. “Yəhova şahidləri” dini sektasının əsas fəaliyyət mərkəzlərindən birinin Gürcüstan Respublikası olması və onlara erməni əsilli vətəndaşın başçılıq etməsi faktına gəldikdə, şöbə rəhbəri bununla bağlı məlumatsız olduğunu deyib. LENT.AZ