Rusiya NATO-nun genişlənməsilə "barışır" "Yaxın on ildə dünyanın birqütblü mahiyyəti genişlənəcək" Rusiyanın tanınmış siyasi eksperti Andrey Federov Azərbaycanın üç ildən sonra NATO-ya üzv olacağını bildirib. "Böyük Qaradəniz regionu: NATO-nun Buxarest sammitindən sonra regional təhlükəsizliyin perspktivləri" mövzusunda keçirilən dəyirmi masada çıxışında Rusiyalı ekspert sözügedən alyansın nüfuz dairəsinin Özbəkistan və Türkmənistana qədər genişlənəcəyini bəyanlayıb. Tural Mütəxəssislərin fikrincə, rusiyalı siyasi ekspertin belə sensasiyalı açıqlama verməsi erkən səslənən proqnoz olsa da, son vaxtlar oxşar bəyanatların geniş yayılmasının Moskvanın NATO və Avropa Birliyinin genişlənməsilə barışmasından xəbər verir. Politoloq Qabil Hüseynli Azərbaycanın alyansa qəbulu vaxtını müəyyənləşdirilməsinin ekspertlərin imkanı xaricində olduğunu deməklə yanaşı, proseslərin ölkəmizin NATO-ya üzvlüyünə açıq addımlar atması istiqamətində getdiyini söylədi: "Vaxt məsələsini təxminən o zaman müəyyən etmək olardı ki, Azərbaycan heç olmasa ərizə ilə NATO-nun yuxarı orqanlarına müraciət etsin. Amma hələ ki, ölkəmiz bu alyansla ikili əməkdaşlığa üstünlük verir və NATO-ya daxil olmaq barədə qəti bir mövqe sərgiləmir. Bu səbəbdən də belə mülahizələr hələ ki, özünü doğrultmayacaq". Azərbaycanın Qərbyönümlü siyasət yürütdüyünü və Qərb strukturlarına inteqrasiya xəttini tutduğunu deyən Qabil Hüseynli bu ölkənin hələlik NATO-ya inteqrasiya etməsi barədə də hər hansı bir konkret fikir irəli sürmədiyini xatırlatdı: "Ona görə də Rusiya ekspertinin bu fikrini mülahizə kimi qəbul etmək istəsək də, onda azacıq da olsa reallığa əsaslandığını demək lazımdır. Andrey Federovun NATO-nun genişlənməsinin heç də məkrli niyyət deyil, bunu təşkilatın hərbi ittifaqdan həqiqi təhlükəsizlik sisteminə çevrildiyini deməsi də, kifayət qədər səmimi etirafdır. Çünki Varşava müqaviləsinin, yəni ikiqütblü dünyanın mövcud olduğu dövrdə həm sözügedən müqavilə, həm də NATO hərbi pakt idi. Hər iki qurum bir qütbün o birinin üzərində qələbəsi və ya qarşılıqlı hücumların dəf edilməsi üçün yaradılmış hərbi ittifaqıydı. Amma indi birqütblü dünya mövcuddur. NATO isə hərbi təşkilatdan çox siyasi quruma çevrilib və onun hərbi strukturları olsa da, təşkilat daha çox siyasi məsələlərlə məşğul olur. Bu mənada alyansın kimlər üçünsə təhlükə kəsb edəcəyini söyləmək absurd olar. Əksinə, bu gün NATO daha çox təhlükəsizlik məsələləri ilə məşğul olan və dünya miqyasında təhlükəsizlik sistemlərinin qurulmasına can atan bir təşkilat kimi qavranılır. Çox yaxşı haldır ki, bu gün Rusiyanın içərisindən də məsələni bu cür ayıq başla qiymətləndirənlər tapılır". Qabil Hüseynli rus ekspertinin yaxın 10-15 ildə region ölkələrinin fərqli geosiyasi vəziyyətdə yaşayacağını deməsilə də razılaşır: "Bu gün yeni dünya düzəni deyilən bir anlayış var. Belə düzən də öz içərisində daha təhlükəsizlik dünya ideyasını ehtiva edir. Bu mənada yaxın on ildə dünyanın daha təhlükəsiz olacağını, onun birqütblü mahiyyətinin genişlənəcəyini, Azərbaycanın da bu təhlükəsizlik dünyasında aparıcı rollardan birini oynayacağını şübhə etmədən söyləmək olar. Çünki Azərbaycan geosiyasi əhmiyyəti durmadan artan, dünya siyasətinə təsir etmək imkanları yaranan və bu mənada dünyanın siyasi arenasında xüsusi çəkisi artan ölkələrdəndir. Əminəm ki, yaxın 10 il ərzində Azərbaycan tamamilə başqa keyfiyyətdə və siyasi anlamda dünyada layiqli yerini tutacaq". xalqcebhesi