”Dağlıq Qarabağ münaqişəsi regionun ən böyük münaqişəsidir” Ölkəmizdə rəsmi səfərdə olan Çexiyanın xarici işlər naziri Karel Şvartsenberq Dağlıq Qarabağ münaqişəsinin Azərbaycanın ərazi bütövlüyü çərçivəsində həll olumasının vacibliyini vurğulayıb. Dünən Azərbaycan Xarici İşlər Nazirliyində Azərbaycan və Çexiya xarici siyasət idarələri arasında əməkdaşlıq haqqında saziş imzalanıb. Bu münasibətlə keçirilən brifinqdə Çexiyanın xarici işlər naziri Karel Şvartsenberq: “Dağlıq Qarabağ münaqişəsi Azərbaycanın ərazi bütövlüyü çərçivəsində, sülh yolu ilə həll olunmalıdır”,- deyib. “Hazırkı dövrdə münaqişələr iki tərəf arasında aparılan danışıqlar yolu ilə həll olunmalıdır, beynəlxalq ictimaiyyət münaqişənin yenidən alovlanmasına imkan verməyəcək”. O, rəsmi Praqanın Dağlıq Qarabağ münaqişəsinin iki tərəf arasında danışıqlar yolu ilə həll oluna biləcəyinə əmin olduğunu dilə gətirib. “Dağlıq Qarabağ münaqişəsi regionun ən böyük münaqişəsidir” deyən XİN başçısı ölkəsinin Dağlıq Qarabağ münaqişəsinin həllində lazımi köməklik göstərməyə hazır olduğunu da bəyan edib. “Çexiya Azərbaycanın ərazi bütövlüyünü hər zaman dəstəkləyir. Dağlıq Qarabağ münaqişəsinin həlli zamanı Azərbaycanın suverenliyi və ərazi bütövlüyü mütləq nəzərə alınmalıdır” Karel Şvartsenberq Elmar Məmmədyarovla çox açıq və ətraflı danışlar apardığını bildirib: “Biz ikimiz də hadisələri öz adı ilə adlandırdığımız üçün dialoqumuz çox rahat alındı”. İkitərəfli münasibətlərdə heç bir problem olmadığını deyən çexiyalı nazir iqtisadi və siyasi sahələrdə ölkələrimiz arasında ümumi marağın olduğunu söyləyib. Onun sözlərinə görə, danışıqlarda Avropa İttifaqında hazırkı vəziyyət, Azərbaycanın bugünkü qurumu, NATO-ya daha da yaxınlaşması, ölkələrimiz arasında qarşılıqlı səfər mübadilələri müzakirə olunub. ABŞ-ın raket hücumundan müdafiə sisteminin elementlərinin quraşdırılmasına dair jurnalistlərin sualalrını cavablandıran Karel Şvartsenberq deyib ki, belə qərar verilib və iyulun sonunda ABŞ-la müvafiq sənəd imzalanacaq: “Qəbələ radiolokasiya stansiyasına gəldikdə, bu stansiyanın hazırkı vəziyyəti Avropa İttifaqının tələblərinə cavab vermir, lakin gələcəkdə bu obyekt bərpa edib istifadə oluna bilər”. Ölkəsinin Nabucco layihəsinə münasibətini açıqlayan nazir deyib ki, Çexiya bu layihədə iştirak etmir, amma prosesi çox maraqla izləyir: “Bu, Avropa üçün çox maraqlı layihədir”. Xarici işlər naziri Elmar Məmmədyarov həmkarı ilə danışıqlarda iqtisadi məsələlərə xüsusi yer ayrıldığını bildirib. O, Çexiya iş adamlarının Azərbaycana çox böyük marağı olduğunu, Azərbaycan biznesmenləri tərəfindən də Çexiyaya maraq olduğunu söyləyib: “Gələn il yanvarın 1-də Avropa İttifaqında sədrlik Fransadan Çexiyaya keçməsi ilə əlaqədar də müzakirələr apardıq. Nazir bildirib ki, sədrlik dövri bitəndən sonra Çexiyanın Azərbaycanda səfirliyi açılacaq, hazırkı səfirin rezidensiyası isə Praqada yerləşir”. zaman