Rusiya Ermənistanı itirməkdən ehtiyatlanır Şimal qonşumuz Qarabağ konfliktinin dondurulmuş vəziyyətdə, "Domokl qılıncı" kimi ermənilərin də başı üzərində qalmasını istəyir Ötən gün Kremldə erməni həmkarı Serj Sərkisyanla görüşən Rusiya prezidenti Dimitri Medvedyev iki ölkə arasında geniş əhatəli məsələlərin müzakirə olunduğunu söyləyib və Moskva-İrəvan münasibətlərini müttəfiqlik kimi qiymətləndirib. Keçirilən mətbuat konfransında Dmitri Medvedyev Dağlıq Qarabağ münaqişəsindən də danışıb. O deyib ki, Dağlıq Qarabağ münaqişəsinin hərbi çözümə malik olmadığına əmindir, konflikt Minsk qrupunun vasitəçiliylə, beynəlxalq hüquq əsasında, Azərbaycanla Ermənistan arasında güzəştlərlə həll olunmalıdır. Hər iki prezident münaqişə məsələsinin öz aralarında apardıqları danışıqlarda "aparıcı mövzu" olduğunu dilə gətiriblər. Ramiz Mikayıloğlu O da diqqət çəkib ki, Serj Sərkisyan bundan əvvəl Moskvada erməni diasporunun inümayəndələri qarşısında çıxışı zamanı bəyanlayıb ki, Dağlıq Qarabağ müstəqil olmalı və statusda bundan başqa bir şey nəzərdə tutulmamalıdır. Ancaq Kremldə Ermənistan prezidenti sərt bəyanatlardan yayınıb, daha çox Moskvayla İrəvan arasında hərbi-texniki əməkdaşlıqdan danışıb. Medvedyev də ehtiyatlı davranıb və ona yönələn sualların əksəriyyətini xarici işlər naziri Sergey Lavrova istiqamətləndirib. Erməni jurnalistin Bakıdan səslənən "müharibə bəyanatları" barədə sualına cavabda Sergey Lavrov deyib ki, o, Azərbaycan rəhbərliyinin belə çağrışlarını eşitməyib. Rusiyanın xarici işlər naziri əmindir ki, gələn ilin ilk ayından münaqişənin nizamlanması üzrə səylər davam etdiriləcək. Rusiya mətbuatı Serj Sərkisyanın səfərinin gündəliyindəki yenilikləri göstərərək Kollektiv Təhlükəsizlik Müqaviləsi Təşkilatı (KTMT) çərçivəsində birgə sülhməramlı qüvvələrin yaradılması məsələsini də xüsusi qeyd edib. KTMT-də sədrlik bu yaxınlarda Ermənistana keçəcək, sentyabrda isə Ermənistanda geniş miqyaslı hərbi təlimlər başlayacaq. Onu da deyək ki, səfərin sonunda birgə bəyanat imzalanıb. Sənəddə yazılır ki, tərəflər qarşılıqlı hərbi-siyasi əməkdaşlığı inkişaf etdirəcəklər. Görüşdə hər iki ölkə prezidentinin davranışları, səslənən bəyanatlar, imzalanan sənədlər müəyyən qənaətə gəlməyə əsas verir. Dağlıq Qarabağ münaqişəsinin görüşdə əsas müzakirə mövzusu olduğu halda Dmitri Medvedyevin "müharibə çözüm variantı deyil" ifadəsini dilə gətirməsi, KTMT çərçivəsində birgə sülhmaramlı qüvvələrin yaradılması, sentyabrda Ermənistanda KTMT-nin geniş miqyaslı hərbi təlimlərinin keçiriləcəyinin bəyanlanması iki məqsədə hesablana bilər. Birincisi, söhbət hərbi qüdrəti artan və öz torpaqlarını hərbi yolla azad edəcəyini son zamanlar daha tez-tez bəyanlayan Bakıya mesaj verilməsindən gedir. Daha çox isə Rusiya bununla ermənilərə onları Azərbaycandan qoruyacağına inandırmağa çalışır. Rusiya prezidentinin, xarici işlər nazirinin Azərbaycanla bağlı ehtiyatlı davranış sərgiləməsi də bu bəyanat və davranışların daha çox ikinci məqsədə yönəldiyini təsdiqləyir. Sergey Lavrovun "gələn ilin ilk ayından münaqişənin nizamlanması üzrə səylər davam etdiriləcək" sözlərini dilə gətirməsi isə göstərir ki, Moskva zamanı mümkün qədər uzatmağı daha məqbul sayır. Bu halda regionda rolu və əhəmiyyəti günü-gündən daha da artan Azərbaycanla münasibətləri qaydasında saxlamaq daha asandır. Payızda Azərbaycanda prezident seçkilərinin keçirilməsi ATƏT-in Minsk qrupunda həmsədrlərdən biri olan Rusiyanın manevr imkanlarını artırır. Rusiyanın Ermənistanın üzərində belə əsməsi isə səbəbsiz deyil. Ermənistanın itirilməsi faktiki Rusiya üçün Cənubi Qafqazın itirilməsi demək olardı. Bunu rus politoloqları da etiraf edirlər. Ona görə də şimal qonşumuz Qarabağ konfliktinin dondurulmuş vəziyyətdə Ermənistanın da başı üzərində bir "Domokl qılıncı" kimi daim qalmasını və ermənilərin onların dəstəyinə ehtiyacı olmasını məqsədəuyğun hesab edir. Məsələn, Rusiya Xarici İşlər Nazirliyi yanında Moskva Beynəlxalq Münasibətlər Dövlət İnstitutunun Qafqaz Tədqiqatlar Mərkəzinin direktoru Vladimir Zaxarov deyib ki, əgər Rusiya Ermənistandan gedərsə, bir daha Cənubi Qafqaza qayıda bilməyəcək. Vladimir Zaxarov ermənilərin rusların onlara tarixən etdikləri "yaxşılıqları" yaddan çıxarmayacaqlarını və buna görə heç vaxt Moskvadan üz döndərməyəcəkləri barədə düşünənləri də sadəlöv sayır: "Rusiyada bəzi siyasətçilər sadəlövcəsinə fikirləşirlər ki, onları xilas etdiyimizə görə ermənilər həmişə bizim sadiq dostumuz və yoldaşlarımız olaraq qalacaqlar. Ancaq Ermənistanda tarixi faktları çoxları unudub. Ermənistanda ABŞ aktiv işləyir. Orada çoxları düşünürlər ki, Ermənistan məqsədyönlü şəkildə Qarabağ münaqişəsinə cəlb olunub və nəticədə Ermənistanın vəsaitləri Rusiyaya axır...". xalqcebhesi