Sərkisyanın həyasız şərti "Türkiyənin prezidentinin Ermənistanın ayağına gəlməsini mümkünsüz sayıram" Azərbaycan torpaqlarının işğalı siyasətinə son qoymaq, qondarma "soyqırım" iddialarının dünyada qəbul etdirilməsi yönündə səylərini dayandırmaq, Türkiyəyə qarşı ərazi iddialarından əl çəkmək istəməyən həyasız Ermənistan hakimiyyəti və diplomatiyası üçün bir məsələ əsas sayılır. Söhbət Türkiyəylə quru sərhədlərinin açılmasına nail olmaqdan gedir. Ermənilər ABŞ və Avropadakı havadarlarını da tez-tez bu işə qoşmağa cəhd edir, Dövlət Departamenti və Avropa Birliyinin Ankaraya tövsiyyələrində bu məqam yer alır. Rəvan Məmmədli Sərhədlərin açılmasıyla bağlı bu canfəşanlıq da təsadüfi deyil. Gürcüstanla Ermənistanı birləşdirən dağ yolları iqtisadi baxımdan əlverişli deyil, qış aylarında bu yollar keçilməz olur. Ermənilərin əsas ümidi sayılan və hər zaman onları ərzaq, digər zəruri vasitələrlə təmin edən İranın fars-molla rejiminin durumu isə ağırlaşmaqdadır. Qərb mərhələ-mərhələ nüvə proqramını dayandırmamaqda israrlı Tehrana qarşı iqtisadi sanksiyaları sərtləşdirməkdədir. Belə olan bir vəziyyətdə hələ də Azərbaycan və Türkiyəyə qarşı bəd niyyət və siyasətinə son qoymaq istəməyən Ermənistan hakimiyyəti və yeni prezident Serj Sərkisyan sosial-iqtisadi durumu çətin və gələcəyə ümidini itirməkdə olan erməni ictimaiyyətini aldatmaq üçün manevr etməkdədir. Ermənistan prezidenti Serj Sərkisyan da Moskvada Rusiyadakı erməni icmasının təmsilçilərilə görüşündə "soyqırımı" araşdırmaq üçün Türkiyənin birgə komissiya yaradılması təklifini xatırladıb və bunun əleyhinə olmadıqlarını söyləyib. Ancaq şərt də irəli sürüb: "Gərək ölkələrimiz arasında sərhədlər açıq olsun. Əks təqdirdə, belə bir komissiya vəziyyətdən sui-istifadə və məsələnin uzun illər uzadılması vasitəsinə çevrilə bilər". Serj Sərkisyan yaxın gələcəkdə Ankarayla münasibətlərin qurulması istiqamətində yeni addımlar atacağını, Türkiyə prezidenti Abdulla Gülü iki ölkənin milli komandalarının dünya çempionatının seçmə mərhələsi çərçivəsində keçirəcəkləri ilk matça dəvət edəcəyini açıqlayıb. Qarşılaşma sentyabrda İrəvanda olacaq. Məsələylə bağlı fikirlərini öyrəndiyimiz politoloq Qabil Hüseynli deyir ki, Ermənistanın dövlət başçısı qəsdən yerinə yetirilməsi mümkün olmayan ilkin şərtlər irəli sürür və bununla da qeyri-konstruktiv mövqedə dayanmalarını nümayiş etdirir. Ermənistan unudur ki, Türkiyə kimi böyük dövlətlə bu cür şərtlərlə danışmaq olmaz. Sərhədin açılması məsələsi təkcə "erməni soyqırımı", yaxud "soyqırım"ın tarixinin araşdırılmasıyla bağlı deyil. Sərhədlərin bağlanması həm də Dağlıq Qarabağ probleminin həlli və Türkiyəyə qarşı ermənilərin ərazi iddialarıyla bağlıdır. Ermənistanın gerbində də Türkiyə ərazisindəki Ağrıdağ (Ararat) göstərilməklə bu iddia faktiki dövlət səviyyəsində ortaya qoyulur:"Ona görə də Serj Sərkisyanın irəli sürdüyü şərt, yəni sərhədlər açılması, sonra tarixi araşdırmaq üçün birgə komissiyanın yaradılması mümkün olan şey deyil. Digər tərəfən, Ermənistan prezidentinə lazımdırsa, ilk növbədə onun özü Türkiyəyə getməlidir. Dövlətlərarası münasibətlərdə formalaşmış qeyri-rəsmi bir praktika var. Niyə Serj Sərkisyan uça-uça Moskvaya iki dəfə getdi?! Türkiyə öz nüfuz dairəsinə, sanbalına görə Rusiyadan əskik dövlət deyil. Bu mənada Türkiyənin prezidentinin Ermənistanın ayağına gəlməsini də mümkünsüz sayıram. Ermənistan bəri başdan yerinə yetirilməsi mümkün olmayan şərtlər irəli sürməklə ümumiyyətlə, mükalimə prosesini və iki dövlət arasındakı münasibətlərdə həlimləşmə prosesini pozur". xalqcebhesi