Terrorçu Sərkisyanın arzusu ATƏT-in sorğusu və şəhidlərin sızlayan ruhu Ermənistan rəhbərliyinin ən başlıca məqsədlərindən biri də Türkiyə ilə sərhədlərini açmaq, bu ölkə ilə gediş-gəlişi rəsmi qaydada yoluna qoymaqdır. Bu məqsədlərini isə həyasızcasına hər bir məclisdə, səfərə getdikləri ölkələrdə dilə gətirirlər. Digər tərəfdən "erməni soyqırımı" məsələsini dünya dövlətlərinin qanunverici orqanlarında qaldırılması üçün səylər göstərir, bəzi hallarda istəklərinə nail olurlar. Arzu Şirinova Bütün mənalarda super dövlətlərin əllərində oyuncağa çevrilən Ermənistan Türkiyə ilə münasibətlərini qurmaq üçün müxtəlif variantlara əl atır. Həmin variantlardan birini də qondarma prezident Serj Sərkisyan sentyabrda həyata keçirmək istəyir. Rusiyaya səfəri zamanı Serj Sərkisyan erməni icmasının nümayəndələri qarşısında çıxış edərək bildirib ki, o, Türkiyə prezidenti Abdulla Gülü iki ölkənin futbol üzrə milli yığma komandalarının İrəvanda keçiriləcək oyununa baxmağa dəvət edəcək. Serj Sərkisyan güman edir ki, Abdulla Gül bu dəvəti müsbət qarşılayacaq. Bir daha xatırladaq, Türkiyə dəfələrlə bildirib ki, Ermənistan öz silahlı qüvvələrini işğal etdiyi Azərbaycan torpaqlarından geri çəkməyincə, Ermənistan "erməni soyqırımı" xülyalarından əl götürməyincə sərhədlər açılmayacaq. Bunlardan isə heç birinə Ermənistan rəhbərliyi əməl etməyib. Yenə də "erməni soyqırımı" cəfəngiyatını dünya dövlətlərinə tanıtdırmaq istiqamətində fəaliyyət göstərir, Dağlıq Qarabağla bağlı mövaqeyini bir qədər də sərtləşdirərək bu yerlərin Azərbaycana məxsus olmadığını bildirir. Serj Sərkisyanın Moskva səfərində ağası sayılan Dmitri Medvedyevlə görüşü zamanı dedikləri buna bariz misaldır. Saxta prezident özü kimi tarixi də saxtalaşdıraraq bildirib ki, Dağlıq Qarabağ heç vaxt Azərbaycanın tərkibində olmayıb. Bütün bunlardan sonra Türkiyə ilə sərhədlərin açılmasından danışmaq, münasibətlərin qurulmasını arzulamaq, hətta regionda reallaşan layihələrdən bəhs etmək sadəcə abırsızlıqdır ki, bu da ermənilərin alınlarına vurulan damğadır. O ki, qaldı Türkiyə prezidenti Abdulla Gülün Serj Sərkisyanın təklifini qəbul etməsinə, şəxsən mən buna inanmıram. Türk dövlətinin başında duran şəxs heç vaxt erməninin bu cəfəng oyununda iştirakçı olmaz. Və heç vaxt erməninin ayağına gedib, millətini və kimliyini aşağılamaz. xxx Azərbaycanın həmsədrlərin dəyişdirilməsi mexanizmiylə bağlı bir müddət əvvəl ATƏT-ə göndərdiyi sorğuya cavab verilib. Ölkəmizin ATƏT-də daimi nümayəndəliyinin rəhbəri, səfir Fuad İsmayılovun verdiyi məlumata görə, məlum sorğu bu cür cavablandırılıb: "ATƏT-in prinsip və normalarını əsas tutaraq ATƏT-in Minsk qrupuna həmsədrlik edən diplomatlar dəyişdirilə bilər". Tutaq ki, həmin diplomatlar-fransalı Bernar Fasye, amerikalı Metyu Brayza, rusiyalı Yuri Merzlyakov-yeniləri ilə əvəzlənsə, bu nələrisə dəyişəcəkmi? Təbii ki, yox. Toplananların yerini dəyişəndə cəm dəyişmədiyi kimi, sözügedən diplomatları da yeniləri ilə əvəzləyəndə Dağlıq Qarabağ problemi ilə bağlı bu neçə illərdir aparılan danışıqlarda heç bir dəyişiklik olmayacaq. Əksinə, bir müddət yeni diplomatların problemi öyrəndikləri bəhanə gətiriləcək. Ona görə də əsas odur ki, həmsədr ölkələr dəyişsin. Heç olmasa indiki tərkibin şüurlarında, düşüncələrində dəyişiklik olsun. Və nəhayət anlasınlar ki, Dağlıq Qarabağ Azərbaycan torpağı olub və bundan sonra da olacaq. Bu yerləri isə Ermənistan silahlı qüvvələri işğal yoluyla zəbt edib. Bir sözlə, həmsədr ölkələr haqq yolunu tutsalar, heç bir dəyişikliyə ehtiyac qalmaz. xxx Millət vəkili Sabir Rüstəmxanlı Milli Məclisin son iclasında həmkarlarının və parlament rəhbərliyinin nəzərinə çatdırıb ki, İmişlidə Şəhidlər Xiyabanı sökülərək yerində bina tikilir. Millət vəkili deyib ki, parlamentin 90 illiyi qeyd olunan bir zamanda İmişlidə özbaşınalığa yol verilib: "18 il bundan əvvəlki faciələrimizin qurbanlarının abidələri qoyulan xiyaban dağıdılıb. Həmin ərazidə hündürmərtəbəli bina tikilir". Hər gün demək olar ki, ermənilərin həyasızlığından danışırıq, onların insanlığa yaraşmayan hərəktlərini açıb göstəririk. Elə öz içimizdə də erməni xislətlilər az deyilmiş. Baxın, Şəhidlər Xiyabanı yerlə-yeksan edilir ki, yerində hündürmərtəbəli bina tiksinlər və bundan da para qazansınlar. Bu əməllə erməninin işğal altındakı ərazilərimizdə yerləşən qəbristanlıqlarımızı dağıtmaları arasında fərq görürsünüzmü? Heç bir fərq yoxdur. Məktəblərin, bağçaların ərazilərini pulun gücünə alaraq bina tikən iş adamları indi də Şəhidlər Xiyabanına girişib. xalqcebhesi