“Dağlıq Qarabağ məsələsində dəstəyimiz gün keçdikcə daha da artmaqdadır” Türkiyə Böyük Millət Məclisinin (TBMM) başqanı Köksal Toptanın ölkəmizə rəsmi səfəri davam edir. TBMM başqanı Köksal Toptan: “Dağlıq Qarabağla bağlı mövqeyimiz çox açıqdır. Bu problem həll olunmadıqca Türkiyə-Ermənistan əlaqələri yoluna girməyəcək. Yeganə həll yolu azərbaycanlı qardaşlarımızın irəli sürdüyü təklifdir”, - deyib. Türkiyə Böyük Millət Məclisinin (TBMM) başqanı Köksal Toptanın ölkəmizə rəsmi səfəri davam edir. Azərbaycan parlamentinin qurulmasının 90 illik yubileyi münasibətilə keçiriləcək rəsmi tədbirdə də iştirak edəcək TBMM başqanı dünən Azərbaycan Prezidenti İlham Əliyevin qəbulunda olub, eyni zamanda azərbaycanlı həmkarı Oqtay Əsədovla görüşüb. Rəsmi görüşləri ərəfəsində jurnalistlərə açıqlama verən TBMM başqanı Azərbaycanda böyük inkişaf yaşandığını söyləyib. “Sonuncu dəfə Azərbaycana 15 il əvvəl gəlmişdim. Ötən dövr ərzində bura çox dəyişib. Əhalinin rifah halı xeyli yüksəlib, Azərbaycan demokratiya yolunda önəmli addımlar atıb”. K. Toptan Dağlıq Qarabağ məsələsində Türkiyənin mövqeyinin dəyişmədiyini bir daha xatırladıb. “Dağlıq Qarabağla bağlı mövqeyimiz açıqdır. Bu problem həll olunmayınca Türkiyə-Ermənistan əlaqələri yoluna girməyəcək. Yeganə həll yolu azərbaycanlı qardaşlarımızın irəli sürdüyü təklifdir. Əvvəla işğal olunmuş ərazilər Azərbaycana qaytarılmalıdır”, - deyə o qeyd edib. TBMM başqanı deyib: “Türkiyə hər platformada Azərbaycanın Dağlıq Qarabağ siyasətini ürəkdən dəstəkləməkdədir. Hər keçən gün bu dəstək daha da artmaqdadır. Ümid edirəm ki, dünyanın gözləri önündə baş verən bu olaylar hər kəs tərəfindən doğru dəyərləndiriləcək”. Ölkə başçısı ilə görüşdə İlham Əliyev iki ölkə arasındakı bütün sahələrdə əməkdaşlığın müntəzəm olaraq inkişaf etdiyini və gücləndiyini vurğulayıb. Parlamentlərarası münasibətlərə də toxunan Azərbaycan Prezidenti hər iki ölkənin qanunverici orqanlarının başqanlarının daim ünsiyyətdə olduqlarını söyləyib. K. Toptan isə öz növbəsində “bir millət, iki dövlət” devizinin ölkələrarası əməkdaşlığın bütün sahələrində özünü büruzə verdiyini bildirib. İqtisadi münasibətlərdən söz açan TBMM başqanı: “Türk iş adamları Konyada, İzmirdə investisiya yatırdıqları kimi, Bakıya da investisiya qoyurlar”, - deyib. Azərbaycan və Türkiyə parlament sədrlərinin görüşündə də əməkdaşlığın yüksək səviyyədə olduğu vurğulanıb. Milli Məclisin sədri Oqtay Əsədov dövlət rəsmilərinin qarşılıqlı səfərlərinin ölkələr arasındakı münasibətlərin daha da möhkəmlənməsinə xidmət etdiyini söyləyib. O, türkiyəli iş adamlarının Azərbaycan iqtisadiyyatına 2 milyard dollar investisiya qoyduqlarını, eləcə də iki ölkə arasında ticari əlaqələrin həcminin 1 milyard 680 milyon dolları keçdiyini deyib. Azərbaycanın Dağlıq Qarabağ problemini sülh yolu ilə həll etmək istədiyini deyən O. Əsədov: “Bu məsələdə Türkiyə bütün beynəlxalq platformalarda Azərbaycana dəstək verir. Qondarma soyqırımı məsələsində də Azərbaycan Türkiyənin yanındadır”,- söyləyib. ”Sadəcə Dağlıq Qarabağ məsələsində deyil, bütün məsələlərdə eyni mövqedən çıxış etməyimiz əlaqələrimizin nə qədər sağlam zəminə oturduğunu göstərir”, - deyən K. Toptan ortaq şəhidlər xiyabanlarımızı buna nümunə göstərib. Qeyd edək ki, K. Toptan Azərbaycan parlamentinin 90 illiyi münasibətilə iyun ayının 19-da keçiriləcək mərasimdə də iştirak edəcək. Bu gün isə TBMM başqanı Heydər Əliyev Fondunda, Səngəçal terminalında və Qafqaz Universitetində olacaq. Türkiyə spikerinə Qafqaz Universitetinin fəxri doktoru adı veriləcəyi gözlənilir. Natiq Pənahlı zaman