Azərbaycan müxalifəti hakimiyyətə dialoq təklif edib Azərbaycan, Bakı, 11 iyun/ «Trend News», müxbir E.Babayev/ Müxalif Azərbaycan Demokrat Partiyası (ADP) müxalifət və iqtidar partiyaları arasında dialoqun başlanmasını istəyir. «Biz hesab edirik ki, siyasi münasibətləri inkişaf etdirmək üçün seçki imkanları itib və müxalifət olaraq, inqilab etmək istəmirik. Belə bir vəziyyətdə dialoqun başlanması vacibdir», - deyə çərşənbə günü Trend News-a ADP sədri Sərdar Cəlaloğlu bildirib. Trend News-un arayışı: Azərbaycanda siyasi partiyalar arasında dialoq sonuncu dəfə 2005-ci il seçkiləri ərəfəsində olub. Bundan sonra dialoqla bağlı bir sıra təşəbbüslər olsa da, həmin təşəbbüslər gerçəkləşməyib. Cəlaloğlu hesab edir ki, müxalifət dialoqa hazırdır. «Dialoqdan imtina etmək destruktivliyin, antidemokratikliyin əlaməti ola bilər» deyən Cəlaloğlu bildirib ki, ADP radikal siyasi kursdan imtina etdikdən sonra, bir neçə dəfə hakimiyyətə dialoq təklifi göndərib. «Lakin bir irəliləyiş yoxdur. Biz dialoqda heç də müxalifəti təkbaşına təmsil etmək iddiasında deyilik. Hakimiyyət «hə» deyərsə, biz digər müxalifət partiyaları ilə birgə bu prosesə başlaya bilərik» - deyən Cəlaloğlu bildirib ki, ADP dialoqun başlanması üçün üzərinə düşən addımları atıb. Partiya siyasi xəttində köklü dəyişiklik edib və hakimiyyəti qıcıqlandıran addımlardan imtina edib. Cəlaloğlu düşünür ki, dialoqun mövzusu Dağlıq Qarabağ, siyasi münasibətlər və digər ümummilli problemlər ola bilər. Trend News-un arayışı: Sağ mərkəzçi, müxalifətyönlü ACP bu ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Bu ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq ADP-dən imtina edib, özlərinin Açıq Cəmiyyət Partiyasını yaradıblar. Hakim Yeni Azərbaycan Partiyasının (YAP) icra katibinin müavini Siyavuş Novruzov isə, Trend News-a bildirib ki, hazırda müxalifətlə dialoq üçün zəmin yoxdur. «Qarşıdan prezident seçkisi gəlir. Seçki vaxtı hansı dialoqdan söhbət gedə bilər?» - deyən Novruzov əlavə edib ki, müxalifət, əsasən, Seçki Məcəlləsi və Dağlıq Qarabağ münaqişəsi ilə bağlı dialoqun aparılmasını qaldırır. Seçki Məcəlləsinə əlavə və dəyişiklikləri nəzərdə tutan qanun layihəsi qəbul olunub. «Bundan sonra dialoqa ehtiyac yoxdur. Dağlıq Qarabağ münaqişəsinə gəldikdə isə, buyurub təkliflərini versinlər. 2002-ci ildə Milli Məclisdə Dağlıq Qarabağla bağlı müzakirələr olmuşdu və müzakirələrə müxalifət də dəvət edilmişdi. Həmin vaxt müxalifətə öz təkliflərini vermək təklif olunmuşdu . Digər tərəfdən, Dağlıq Qarabağ münaqişəsi ilə bağlı Azərbaycan xalqının və siyasi qüvvələrin rəyi yekdildir» - deyə o bildirib. YAP 1992-ci ildə, o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir. trend