“Azərbaycan türkcəsi ilə tanışlıq” dərsliyi Azərbaycan Mədəni Universitetinin dərsliklərinə əlavə edilib

SON XƏBƏRLƏR

“Azərbaycan türkcəsi ilə tanışlıq” dərsliyi Azərbaycan Mədəni Universitetinin dərsliklərinə əlavə edilib

2021.10.20, 07:36

Gunaz.tv

GünAz TV: Azərbaycan Mədəni Universiteti öyrəncilərinin tələblərindən biri təmin olunmaqdadır.

Son məlumata görə, Azərbaycan Mədəni Universitetinin rektoru “Azərbaycan türkcəsi ilə tanışlıq” dərsliyinin universitetdə tədris olunacağını açıqlayıb.

Həsən Vəlizadə bu barədə yerli “Nəsr” xəbər agentliyinə məlumat verib.

“Elm, Tədqiqat və Texnologiyalar Nazirliyinin razılığı və Universitetin təlim-tərbiyə şurasının təsdiq etməsindən sonra universitetə cari semestrdə (term) “Azərbaycan türkcəsi ilə tanışlıq” dərsliyinin tədrisi haqda icazə verilib. Azərbaycan türkcəsi iki dərslik şəkilində könüllü öyrəncilər üçün tədris olunacaq. Bunun üçün hələlik bir sinif nəzərdə tutulub, lakin gələcək semestrlərdə siniflərin sayı artırılacaq”- deyə o bildirib.

Universitet rektorunun sözlərinə görə, türk dili dərsliyi həftədə iki dəfə ustad İsmayıl Mədədi Osalu tərəfindən tədris olunacaq. İ.Mədədi Osalu hazırda Urmiyə və Urmiyə Texnologiya universitetlərində bu dərsliyi tədris edir.

Azərbaycan Mədəni Universitetinin rektoru fevralın 12-də universitetdə etiraz yığıncağı keçirən öyrəncilərin digər tələbləri haqda danışmayıb.

Türk dili və ədəbiyyatının Azərbaycan Mədəni Universitetində tədris olunması və konstitusiyanın ana dilinin tədrisi ilə bağlı 15-ci maddəsinin icra olunmasını tələb edən öyrəncilər gur səslə “Ruhani, Ruhani – Vədlərin bəs hanı?!” və “Öz dilində mədrəsə - Olmalıdır hər kəsə” şüarı səsləndirmişdir.

Etiraz yığıncağında “Dilsiz millət – Çəkər zillət”, “Azərbaycan var olsun – İstəməyən kor olsun”, “Urmu gölü dolmadı – Öz dilimizdə mədrəsəmiz olmadı”, “Günəş hələ sönməyib – Ana dili ölməyib”, “Biz ölməyə hazırıq – Səttarxan sərbazıyıq”, “Haray, Haray mən türkəm”, “İşıq hələ sönməyib – Azərbaycan ölməyib” və s. kimi şüaralar da dilə gətirilmişdir.

Hal-hazırda uzun illər mübarizədən sonra yalnız Təbriz, Azad Təbriz, Urmiyə, Marağa və Urmiyənin Texnologiya Universitetlərində türk dili və ədəbiyyatı fənni tədris olunur. Türk dili dərsi öyrəncilər üçün məcburi deyil, buna baxmayaraq çox sayda öyrənci bu dərsliyi könüllü şəkildə seçir.

Konstitusiyanın 15-ci maddəsinin icrası, Türk Dili və Əədəbiyyatı Mədəniyyət Evinin yaradılması və Urmu gölünün canlandırılması İran prezidenti Həsən Ruhaninin seçkiqabağı təbliğat-təşviqat dönəmində azərbaycanlılara verdiyi əsas vədlər olub, 5 il müddətdən sonra verilən vədlərdən heç biri yerinə yetirilməyib.

N.S