Zəncanlı məşhur aşığın 120 kaseti işıq üzü görəcək

SON XƏBƏRLƏR

Zəncanlı məşhur aşığın 120 kaseti işıq üzü görəcək

2021.10.20, 07:36

Gunaz.tv

GünAz TV: İran islami irşad və mədəniyyət naziri Seyid Abbas Salehi qocaman aşıq Müslim Əsgərinin 120 kasetinin nazirliyin yardımı ilə işıq üzü görəcəyini bildirib.

Nazir bu barədə avqustun 16-da Zəncanda aşıq M.Əsgəri ilə görüşdə məlumat verərək bildirib ki, bu kasetlər Zəncanın klassik aşıq musiqisi mədəniyyətini ictimaiyyətə nümayiş etdirməlidir.

Görüşdə azərbaycanlı qocaman aşıq incəsənət sahəsindəki fəaliyyətlərinə toxunaraq bu günə qədər 16 ölkədə aşıq musiqisi ifa etdiyini və 170 kaset doldurduğunu deyib. Hal-hazırda 120 kasetinin buraxılış üçün hazır olduğunu nazirin diqqətinə çatdıran aşıq 28 folklor dastanı yazdığına da işarə edib. O bildirib ki, dastanlar 10 cild kitab üçün nəzərdə tutulub, lakin onların nəşri üçün böyük məbləğdə vəsait tələb olunur.

Aşıq Müslim Əsgəri 1938-də Zəncanın Badamistan kəndində dünyaya göz açıb. O “Zəncan Aşıq Məktəbi”nin tanınmış ustad sənətkarlarındandır və türk ölkələrinin əksəriyyətində ən çətin qədim mahnıları ifa edib.

Türk dünyasında “aşıq”, “ozan”, “bamsı” və “baxşı” adı ilə tanınan saz-söz adamları türk millətinin qədim mədəniyyəti və ənənələrinin qorunub saxlanılmasında hər zaman böyük rol oynayıblar. Bu sənət bütün türk ölkələrini bir-birinə bağlamaqla yanaşı digər dövlətlərin tərkibində yaşayan türk toplumlarının adət-ənənəsinin qorunması üçün də önəmli vasitədir.

N.S

GUNAZ.TV

SON XƏBƏRLƏR