GünAzTv: İran əhalisinin çoxunluğunun müsəlman olmasına, Tehran hökumətinin özün “islam dövləti” adlandırmasına rəğmən, hökumətin ölkədə olan məscidlərə, xüsusilə tarixi əhəmiyyət daşıyan məscidlərə qarşı laqeyd münasibəti təəcüb doğurur.

 Uzun zamandır Güney Azərbaycanın müxtəlif şəhərlərində əhali, dindarlar və ictimai qurumlar hökumətə onlarla müraciət ünvanlayıblar.Müraciətlərdə tarixi məscidlərə qarşı göstərilən etinasızlığın dayandırılmasını, onların dağıdılmasının önlənməsi yönündə tədbirlərin görülməsi tələb edilib.

Həmin müraciətlərdə ibadət ocaqlarına, dini yerlərə və başqa bu kimi mərkəzlərə keşmiş şah rejimi dönəmində indikindən daha çox hörmət edildiyi və qayğı göstərildiyi vurğulanıb. Ancaq nədənsə “islam hökuməti” məscid adı altında özünün yaratdığı “cəza” və “provakasiyya” mərkəzlərindən başqa heç bir ibadət ocağının, məscidin dağılmasından qayğılanmayıb.

Güney Azərbaycanda, Təbriz şəhərində tarixi abidə “Ərk” qalasını özləri məscid adlandırıb, onun tarixən məscid olduğu haqda kitablar yazdırmaqlarına baxmayaraq “Ərk”in durumu göz qabağındadır. 1979-cu ildən üzü buyana bu abidə dəfələrlə hökumət məmurları tərəfindən müxtəlif “layihələr” adı altında uçurdulub.

Dünyanın, özəlliklə islam dünyasının nadir incilərindən olan Təbrizin “Göy məscid”in ətrafında çeşidli qazıntılar aparmaqla bu abidəni məhv olmaq təhlükəsilə üz-üzə qoyublar.

Şərqdə ən qədim və böyük ibadət ocaqlarından və memarlıq abidələrindən biri olan “Sahibul Əmr” məscidinin yarıdan çox hissəsinin dağıdılaraq yerində yol və “yaşıllıq” salınmasıda “islam hökuməti”nin insanların inancına göstərdiyi “sayqı”nın dərəcəsin göstərir.

Təbrizin quzeyində, “Eynalı” dağının zirvəsində tarixi məscid və ibadətgah olan “Eynalı” məscidindən isə gəzinti və iaşə məsələləri üçün istifadəyə verilməsin müsəlman deyil, sadəcə başqa insanların inanclarına hörmət edən heç bir hökumət və şəxs özünə sığışdırmaz. Ancaq Tehran hökuməti nədənsə bütün bunları etməkdən çəkinmir.

Bunlarla yanaşı, Təbriz şəhərində yerləşən tarixi“Came” məscidi, “Usta-şagird” məscidi, “Seyid Həmzə” məscidi, “Qara Məlik” məscidi, “Eynalı” və başqa bir neçə məscidlərin hazırkı durumu özün müsəlman adlandıran hər bir şəxsin vicdanın narahat edə biləcək qədər pis gündədir.

 Bütün bunlarla yanaşı ötən həftə Urmiya şəhərinin "Gülüstü" məhəlləsində yerləşən "Lütfəli xan məscidi"nində təxrib olunması ilə bağlı məlumat yayıldı.

Tehran hökumətinin müsəlmanların ibadət ocaqlarına bu qədər laqeyd yanaşması, edilən müraciətlərə cavab verməməsi yəqin ki insanları başqa müsəlman ölkələrin din xadimlərindən, beynəlxalq təşkilatlardan yardım istəmək məcburiyyətində qoyacaq. Axı adı çəkilən məscidlər “Allah evi” olmaqla yanaşı həmdə tarixi əhəmiyyətli abidələr, nadir memarlıq inciləridirlər.

PS: Bütün Qafqaz Müsəlmanlarının Şüyxülislamı ,dini rəhbəri və bir azərbaycanlı kimi Allah Şükür Paşazadənin Tehran hökumətinin Güney Azərbaycanda məscidlərə, ibadət ocaqlarına və tarixi abidələrə qarşı bu hörmətsizliyinə münasibət bildirməlidir. Bu bir insan, azərbaycanlı və müsəlman kimi onun borcudur. Cavidan