GünAzTv: Qabil Hüseynlinin fikrincə, Ermənistan bu vəziyyətdə çox duruş gətirə bilməyəcək.

Dağlıq Qarabağ münaqişəsinin həlli prosesində hələ bir neçə ay öncə əldə olunmuş razılığa rəsmi İrəvan tərəfindən əməl olunmur. Belə ki, Ermənistan prezidenti Serj Sarkisyanın ABŞ səfərindən sonra bu ölkə üzərinə düşən və razılaşdığı şərtləri yerinə yetirməkdən imtina edib.    Xarici işlər nazirinin müavini, Dağlıq Qarabağ münaqişəsi üzrə xüsusi nümayəndə Araz Əzimovun açıqlamasına görə, Türkiyə-Ermənistan sərhədləri Azərbaycanın 5 rayonunun qaytarılması və Laçın dəhlizi qarşılığında açıla bilər. Amma Ermənistan bu şərtləri dəyərləndirmək üçün rəsmi Bakıdan vaxt istəyib.    A.Əzimovun bu açıqlamasından sonra Ermənistan tərəfi təkzib xarakterli çıxış edib. Ermənistanın xarici işlər naziri Edvard Nalbandyan bildirib ki, ortada elə bir razılıq yoxdur və torpaqların qaytarılmasından hələlik söhbət getmir.    Sarkisyanın ABŞ səfərindən sonra Ermənistan tərəfinin münaqişə ilə bağlı sərt açıqlamalar verməsi ekspertlər tərəfindən birmənalı qiymətləndirilmir.    Bir ehtimala görə, Sarkisyan ABŞ-da o qədər də yaxşı qarşılanmayıb. Qeyd olunur ki, Ağ Ev Sarkisyana Azərbaycan torpaqlarını qaytarmağı və bundan sonra Türkiyə ilə münasibətləri normallaşdırmağı məsləhət görüb. Bu cür yanaşmadan qıcıqlanan Sarkisyan ABŞ-dan incik düşərək mövcud münaqişələri daha da gərginləşdirmək, barışıq siyasətindən imtina xəttini götürüb.    Digər ehtimala görə, Sarkisyana Ağ Evdə dəstək nümayiş olunub. Qeyd olunur ki, Vaşinqton İrəvana danışıqlarda özünü necə aparmaqla yanaşı yaşıl işıq yandırıb. Bundan yararlanan Ermənistan hazırda Azərbaycan və Türkiyə ilə yuxarı tonlarda danışır. Təhlillər birinci ehtimalın daha real olduğunu deməyə əsas verir.    Politoloq Qabil Hüseynlinin sözlərinə görə, Vaşinqtonda daha çox Türkiyə-Ermənistan sərhədlərinin açılması məsələsi müzakirə olunub: "Müşahidələr göstərir ki, son vaxtlar Qərbdən Ermənistana təzyiqlər başlayıb. Bu təzyiqlərin qarşısında Ermənistan, hələ ki, dirəniş göstərir. Amma bu dirənişin uzun müddət davam etməsi mümkün deyil. Gec-tez ermənilər işğal olunmuş torpaqları qaytaracaq. İki aydan sonra olmasa da, iki ildən sonra bu reallaşacaq. Açığı, Vaşinqtonda Sarkisyana hansı göstərişlərin verildiyindən xəbərsizəm. Məncə, orada məsələ belə qoyulub ki, Ermənistan özü Türkiyə ilə dil tapıb bütün məsələləri, o cümlədən Dağlıq Qarabağ münaqişəsini həll etsin. Burada əsas məsələ Türkiyə və Azərbaycanın birgə fəaliyyətindən və Ermənistana təzyiq mexanizmlərindən ibarətdir. Ermənistan çox pis vəziyyətdədir. Bu cür vəziyyətdə bu ölkənin nə vaxta qədər duruş gətirəcəyi mənim üçün də maraqlıdır".