GünAzTv: Ərdoğan PKK-nın hücumlarında “Ergenekon” izinin olduğunu deyir, Silahlı Qüvvələrin Baş Qərargah rəisi isə xainlərə sərt mesaj göndərib.

Türkiyədə PKK terror təşkilatının təhlükəsizlik qüvvələrinin mövqelərinə bir-birinin ardınca baş verən hücumları və ötən həftə ərzində 6 hərbçinin həlak olması siyasəti də gərginləşdirib. Hücumların ardınca hökumətə bağlı və silahlı qüvvələrə qarşı ən ağır ittihamlara yer verən bəzi qəzetlər iddia ediblər ki, hərbçilərin şəhid olmasında Baş Qərargahın günahı var. Həmin qəzetlər PKK-nın hücumlarına qarşı ordu komandanlığını gərəkli tədbirlər görə bilməməkdə ittiham edib, bəziləri isə daha da uzağa gedərək hücumların ordu içərisindəki qruplarla PKK arasında işbirliyinin nəticəsi olduğunu irəli sürüb.

Baş nazir Rəcəb Tayyib Ərdoğan da terror hücumlarına görə PKK-nı ittiham etməkdənsə bu hadisənin arxasında dayanan “qaranlıq güclər” barədə danışıb. Ərdoğan çıxışında deyib ki, ölkənin cənub-şərqində ötən həftə təşkil edilmiş hücumların arxasında Ankarada yüksək məhkəmə instansiyası Danıştaya hücumu təşkil edən qüvvələr dayanır. O, həmin “qaranlıq güclərin” ölkədə vəziyyəti gərginləşdirməyə xidmət edən bu cür əməllərlə istədiklərinə nail ola bilməyəcəyini deyib. Qeyd edək ki, Danıştaya edilən hücuma görə aralarında istefada olan hərbçilər və silahlı terror təşkilatı olaraq təqdim edilən “Ergenekon” ittiham olunur. Hücumlar Türkiyə parlamentində AKP tərəfindən irəli sürülən konstitusiya düzəlişləri paketinin müzakirə edildiyi bir vaxta təsadüf edib. Müxalifət hesab edir ki, bu düzəlişlər yüksək məhkəmə qurumlarını hakim partiyadan asılı duruma salacaq.Silahlı Qüvvələrin Baş Qərargah rəisi İlkər Başbuğ isə PKK-nın son hücumlarının arxasında hansısa qaranlıq qüvvələrin dayandığı və komandanlığın əsgərləri qorumaq üçün lazım olan addımları atmadığı haqda iddialara cavab olaraq deyib ki, Türkiyədə ordunu gözdən salmağa çalışan xain mətbuat var. O, iddiaları qərəzli və əsassız adlandıraraq deyib ki, son hücumları kimin təşkil etdiyi məlumdur. Başbuğun dediyinə görə, hücumlara əmr verən terror təşkilatının Tunceli bölgəsi üzrə məsul şəxsidir. Onun radiodanışıqları qeydə alınıb və hücumlar barədə təlimatın İraqın şimalından, Qəndil düşərgəsindən verildiyi təsdiqlənib: “Bu qədər xainlik olmaz. Mənim əsgərlərim terrorçuların hücumu qarşısında saatlarla döyüşüb, şəhid verib, ancaq bunun arxasında hansısa başqa səbəblər axtarmaq, fərziyyələr irəli sürmək xainlikdir. Türkiyədə bir qisim xain media fəaliyyət göstərir və orduya qarşı misli görünməmiş qərəzli mövqenin içərisindədir” deyə general əlavə edib. Başbuğ bildirib ki, kimlərsə ordunun bu cür ittihamlar qarşısında sarsılıb geri çəkiləcəyini gözləyirsə, yanılır". musavat