GünAzTv: Kürün səviyyəsinin qalxması nəticəsində çayın sahilində yerləşən Salyan, Kürdəmir, Sabirabad, Hacıqabul, Neftçala rayonlarında və Şirvan şəhərində böhran vəziyyəti yaranıb. Bu barədə APA xəbər yayıb.   bir çox yaşayış məntəqələri su altında qalıb. Hacıqabul Rayon İcra Hakimiyyəti başçısının müavini, rayon Fövqəladə Hallar Komissiyasının sədri Sahib Aslanov APA-nın əməkdaşına bildirib ki, rayon ərazisində çayın səviyyəsi 36 sm qalxıb. Hazırda rayon ərazisindən keçən 46 kilometrlik sahil boyunun 3 istiqamətində 4 ekskavator, 8 "KamAZ" markalı yük maşını və 50 nəfər işçi qüvvəsi sahil bərkitmə işlərinə cəlb olunub. Hacıqabulun Xilə kəndində vəziyyət gərgin olaraq qalır.      Şirvan şəhərinin Hacıqəhrəmanlı, Çılpaqlı və Bayramlı qəsəbələrinin bəzi yerlərində Kür məcrasından çıxıb. Şəhər İcra Hakimiyyətini başçısının müavini Şəfayət Əsgərovun bildirdiyinə görə, hazırda İsmət Qayıbov küçəsində sahil bərkitmə işləri aparılır. Bu ərazidə şəhər mərkəzindən 5-6 kilometrlik məsafədə olduğundan daha intensiv işlər görülür. Hacıqəhrəmanlı qəsəbəsi ərazisində yerləşən bəzi sənaye obyektlərini, o cümlədən Qaz doldurma Stansiyasının yerləşdiyi sahəni, İstilik Elektrik Stansiyası ərazisindən bir qədər aralıdakı əraziləri də su basıb. Ümumilikdə şəhər ərazisində 450 evə qrunt suları dolub. Sahil bərkitmə işlərinə və digər təxirəsalınmaz tədbirlərə 14 irihəcmli, 50 kiçik həcmli nasoslar, yanğınsöndürən maşınların su pompaları və işçi qüvvə cəlb edilib. Əlavə olaraq su vuran nasoslara ehtiyac duyulur.      Salyan rayonunda Kür çayının aşağı axınında suyun səviyyəsi təhlükəli həddə çatdığı üçün Salyan Rayon İcra Hakimiyyətinin, rayon Fövqəladə Hallar Komissiyasının, Fövqəladə Hallar Nazirliyinin (FHN) regional strukturlarının, idarə və müəssisələrin rəhbərlərinin iştirakı ilə müşavirə keçirilib. Yaranmış vəziyyətlə bağlı operativ qərargah yaradılması qərara alınıb. Hazırda əlaqədar qurumlarla yanaşı, Salyandakı digər idarə-müəssisələr bənd vurma işlərinə cəlb olunub. Çayın səviyyəsi isə qalxmaqda davam edir. Təkcə Salyan şəhərində qrunt suları basmış həyətlərin sayı 700-ə çatıb. Bir sıra evlərin sakinləri qohumlarının evlərinə köçmək məcburiyyətində qalıblar. Xüsusilə 3 tərəfdən Kür çayı ilə əhatə olunmuş Babazanlı yaşayış massivində ciddi problemlər yaranıb.      Sabirabad rayon İcra Hakimiyyəti başçısını birinci müavini, Fövqəladə Hallar Komissiyasının sədri Vəfadar Bağırovun APA-ya verdiyi məlumata görə, rayonun bir sıra kəndlərində böhran vəziyyəti yaşanır. Burada Kür çayının sahilində sahil bərkitmə işlərinə 42 "KaMAZ" markalı yük maşını, 18 buldozer, 24 ekskavator, 4 skreyper və kiçik həcmli yük maşınları cəlb edilib. Əvvəlki illərdə yaranmış analoji vəziyyətlə müqayisədə Kürün səviyyəsinin 80-90 santimetr artıq olduğu bildirilir. Rayonda ən gərgin vəziyyət Qasımbəyli kəndində və bu kəndlə sərhəd olan Saatlı rayonunun Novruzlu kəndlərində yaşanır. Sabirabad sakinlərinin bildirdiklərinə görə, rayonun Qaratoğay, Şıxsalahlı, Ətçələr, Həşimxanlı, Bulduğ, Minbaşı, Çağırğan, Xankeçən və digər sahil boyu kəndlərində qrunt suları ilə yanaşı bəndlərdən sızmalar yaşayış üçün təhlükə yaradıb.       Kəndlərin sakinləri evlərini tərk etməyə başlayıblar.