GünAzTv: Ermənistan işğal altındakı Azərbaycan torpaqlarının müəyyən bir qisminin azad edilməsi üçün rəsmi Bakıdan vaxt istəyir.Xarici İşlər Nazirinin müavini, prezidentin Dağlıq Qarabağ münaqişəsinin həlli üzrə xüsusi nümayəndəsi Araz Əzimov «1-ci kanal»a eksklüziv müsahibəsində belə deyib. O, Türkiyə ilə Ermənistan arasında sərhədlərin hansı şərtlərlə açılmasının mümkünlüyünə də aydınlıq gətirib. 

Türkiyə ilə Ermənistan arasında sərhədlər 1-ci mərhələdə Azərbaycanın işğal altında olan 5 rayonunun və Laçın yolunun azad edilməsi ilə açıla bilərdi. Bunu 1-ci kanala eksklüziv müsahibəsində açıqlayan Xarici İşlər nazirinin müavini, prezidentin Dağlıq Qarabağ münaqişəsinin həlli üzrə xüsusi nümayəndəsi Araz Əzimov bildirir ki, bu, rəsmi Bakının İrəvana xoş niyyətini də göstərə bilərdi. 

Xarici işlər nazirinin müavini Araz Əzimov: “Bu, bir növ Azərbaycanın buna kompramis ruhda baxılmasının nəticəsi ola bilərdi. Həm də Türkiyənin Ermənistanla əməkdaşlığının başlanması üçün əsas vasitə rolunu oynaya bilərdi. Həm də Türkiyənin Azərbaycanla, Ermənistanla üç tərəfli bir ticarət və yaxud başqa sahənin əməkdaşlığı üçün şərait yaradıla bilərdi. Ermənistan bu bu şeyləri rədd etməklə hər şeyi itirir. Belə şəraitdə Ermənistan hər şeyi itirə bilər. Sadəcə hansısa siyasi illuziyalara görə, prezident Sarkisiyan, yoxsa onun arxasında duran başqa bir kimsə onların siyasi baxışlarına, maraqlarına görə, Ermənistan və erməni xalqı yaxşı perspektivləri itirə bilər”. 

Araz Əzimov deyir ki, azərbaycanlıların Dağlıq Qarabağa qayıdaraq ermənilərlə bərabər əsaslarda yaşaması, müvəqqəti statusla təmin olunması, eləcə də Azərbaycan hökumətinin orada iqtisadi bərpa işlərinə başlaması üçün müvafiq şərait olmalıdır. Hazırda bunun mümkün olmadığını deyən xüsusi nümayəndə bildirir ki, orada azərbaycanın konstitutsiyası bərpa edilməlidir. Və həmin kostitusiya çərçivəsində yerli əhalinin razılığı ilə status müəyyənləşdirilməlidir. Lakin bu mərhələrlə həyata keçirilməlidir.

Xarici işlər nazirinin müavini Araz Əzimov: “Ağdam, Füzuli Cəbrayıl, Zəngilan, Qubadlı onlar belə azad edilməli, Laçın yolu açılmalıdır. Laçının və Kəlbəcərin azad edilməsi üçün Ermənistan tərəfdən vaxt istənilir. Bu vaxt müəyyənləşdirilməlidir. Buna dair həmsədrlərin təklifi var. Və azərbaycanlıların Qarabağa qayıtması da Laçının şimalı və Kəlbəcərin azad edilməsinin vaxtının müəyyənləşdirildiyi kimi bunun da vaxtı müəyyənləşdirilməlidir. Nə vaxt qayıdacaqlar. Qayıdanda isə bərabər statusla təmin oluacaqlar? 5 rayonun və Laçın yolunun azad edilməsi ilə bir sənəddə təsbit edilməlidir”. 

Münaqişənin həllində vasitəçilik edən ATƏT-in Minsk qrupunun həmsədr ölkələrinin dəyişdirilməsi ehtimalına gəlincə, Araz Əzimov dedi ki, hazırkı mərhələdə bu gündəmdə deyil.