GünAzTv: Bakıda keçirilən Dini Liderlərin Ümumdünya Sammitində Yekun Bəyannamə qəbul olunub.

Bəyannamədə bildirilir: “Biz, Dini Liderlərin Ümumdünya Sammitinin iştirakçıları – 32 ölkədən olan xristian, müsəlman, yəhudi, buddist və induist dinlərinin rəhbərləri və təmsilçiləri dövrümüzün aktual mövzularını, o cümlədən qloballaşmanın dinə və ənənəvi dəyərləri təsiri məsələsini müzakirə etmək üçün Bakıya toplaşmışıq.İqtisadiyyat, siyasət, hüquq və mədəniyyətin qloballaşması birmənalı proses deyil. Bu, istehsalın, ticarətin, elmin, təhsilin inkişafına, təhlükəsizlik və ətraf mühitin mühafizəsi sahələrində ümumi çağırışlara cavabların verilməsində az praktiki səmərə verməyib. Beynəlxalq əlaqələr inanclı insanlara müasir çoxmillətli və çoxdinli cəmiyyətlərdə öz hüquqlarını qorumağa imkan verir. Lakin qlobal proseslərin din sahəsinə təsiri bir çoxları tərəfindən tənqidlə qarşılanır”. Bəyannamədə bildirilir ki, insanın hətta dünya elitalarının xoşuna gəlməsə belə, öz dünyagörüşünü sərbəst şəkildə formalaşdırması, xalqlara isə kimsə “kifayət qədər tərəqqipərvər” hesab etməsə belə öz həyat tərzini qoruyub saxlamaq üçün imkan yaratmaq lazımdır. Sənəddə qeyd olunur ki, qloballaşma dövlətlərin, xalqların və fərdlərin təhlükəsizliyi üçün təhdidləri aradan qaldırmayıb: “Müasir dünyamızda ötən əsrlərdən miras qalan aclıq, sosial qeyri-bərabərlik, ətraf mühitin çirklənməsi, milli-dini zəmində silahlı münaqişələr kimi problemlər hələ də həllini tapmayıb. Əksinə bu problemlərə yeniləri əlavə olunub. Varlı ölkələr daha da varlanmaqda, kasıb ölkələr daha da kasıblamaqdadır. Ümumdünya gəlirlərinin qeyri-bərabər bölünməsi tənqidləri hər gün daha da artırır”.Sənədi imzalayan dini liderlər hesab edirlər ki, əvvəllər ayrı-ayrı regionları təhdid edən terrorizm artıq beynəlxalq xarakter almaqdadır və onunla mübarizə nəzərəçarpacaq dərəcədə çətinləşib: “Dini liderlərin dünyanı yalnız öz gücləri hesabına düzəldə biləcəyini düşünmək düzgün deyil. Onların çağırışları yalnız inanclı insanlara təsir edir. Buna görə də bir çox ölkələrdə nasist ideyaları qadağan olunduğu kimi, dinc insanlara qarşı zorakılığa haqq qazandıran dini-siyasi doktrinalar da qadağan edilməlidir”. Yekun Bəyannamədə qeyd olunur ki, bu gün dünya üçün ən böyük təhlükələrdən biri hər il milyonlarla insanın həyatına son qoyan narkomaniya problemidir: “Beynəlxalq narkokartellər terror təşkilatlarının prinsipi ilə fəaliyyət göstərərək öz əhatə dairələrini daim genişləndirir və insanların əzabı və ölümü üzərində milyardlarla dollar pul qazanırlar. Terrorçuluqla olduğu kimi narkotik maddələr ticarətinə qarşı da mübarizə ardıcıl, amansız xarakter daşımalı və bütün dünya ictimaiyyətinin gücü ilə aparılmalıdır”. Dünya dinlərinin liderləri Yekun Bəyannamədə işğalçılıq probleminə də yer ayırıblar: “Hər bir ölkənin ərazi bütövlüyü qorumalı, eyni zamanda hər bir xalq azad şəkildə inkişaf etməli, öz taleyi ilə bağlı bütün beynəlxalq qərarların qəbulunda iştirak etməlidir. Meydana çıxan münaqişələr ədalətli, bu münaqişəyə cəlb olunan bütün tərəflərin maraqları nəzərə alınmaqla, beynəlxalq birlik tərəfindən qəbul olunan norma və prinsiplər əsasında həllini tapmalıdır”.