GünAzTv: ABŞ  (Amerika Birləşmiş Ştatları) dövlət katibi İrana qarşı əməliyyatların hər an başlaya biləcəyini bəyan edib.

Son dövrlər dünya mediasında İrana qarşı müharibənin bu il ərzində reallaşa biləcəyinə dair xəbərlərin sayı yenidən intensivləşib. Bu dəfə Küveytin "Al-Dar" qəzetinin yazdığına görə, ABŞ-ın dövlət katibi Hillari Klinton Vaşinqtonun Yaxın Şərqdəki müttəfiqlərinə ciddi xəbərdarlıq edib. O, Vaşinqtonda keçirilmiş nüvə təhlükəsizliyi sammiti zamanı Misir prezidenti Hüsnü Mübarək və Səudiyyə Ərəbistanının kəşfiyyat naziri, şahzadə Murkin bin Abdul-Əzizə regionda hər an müharibənin başlana biləcəyinə dair xəbərdarlıq edib: "İranla İsrail arasında hər an müharibə başlana bilər".    Məlumata görə, o, müttəfiqlərinə ABŞ kəşfiyyatının əldə etdiyi materiallar haqda danışıb və bildirib ki, həmin sənədlər müharibənin qaçılmaz olduğunu göstərir.    Bu günlərdə Pakistanın ingilisdilli "Pakistan Times" qəzetinin dərc etdiyi məqalədə isə bildirilirdi ki, 2010-cu ilin iyul ayı İrana qarşı hərbi əməliyyatların başlanması üçün həlledici olacaq. Qəzetin yazdığına görə, Birləşmiş Ştatlar son bir neçə ay ərzində Qətərdə, Birləşmiş Ərəb Əmirliklərində, Küveytdə, Bəhreyndə və Səudiyyə Ərəbistanında "Patriot" zenit-raket sistemləri yerləşdirib. Bu sistemlər İsraildə yerləşdirilmiş vahid mərkəzdən idarə olunur. Eyni zamanda, ABŞ Fars körfəzinə ballistik raketlərdən müdafiə sistemlərilə təchiz edilmiş azı dörd kreyser göndərib.    Təxminən iki həftə əvvəl isə Senatdakı dinləmələr zamanı ABŞ ordusunun yüksək vəzifəli hərbçiləri bildiriblər ki, İran 1 il ərzində atom bombası istehsal etmək üçün lazım olan həcmdə zənginləşdirilmiş uran əldə edə bilər. Lakin hazırlanan bombanın tətbiq edilmə halına gətirilməsi üçün Tehranın daha 3 - 5 il əlavə vaxta ehtiyacı var. General Ceyms Kartrayt vurğulayıb ki, İran bombanın hazırlanması üçün uranın 90 faizə qədər zənginləşdirilməsi istiqamətində addımlamağa başlayıbsa, Tehranın özünün nüvə silahını yaratması və onun sınağını keçirməsilə bağlı əlavə vaxta ehtiyacı olacaq: "Sursat tətbiq olunmağa və partlamağa hazır olmalıdır. Bundan sonra onun barəsində tam şəkildə atom silahı olduğunu söyləmək mümkündür". Bununla yanaşı, ABŞ hərbi kəşfiyyat idarəsinin rəhbəri general Ronald Berces deyib ki, İranın "Natanz"dakı nüvə mərkəzində hazırlanan sentrifuqalar yüksək yox, az zənginləşdirilmiş uranın hazırlanmasında istifadə edilir. Bu isə silahın hazırlanması üçün zəruridir.    Belə bir vaxtda isə məlum olub ki, İran, nüvə proqramını dayandırması ilə bağlı beynəlxalq təzyiqlərə baxmayaraq, uran zənginləşdirilən yeni zavodun inşasına başlaya bilər.    Artıq prezident Mahmud Əhmədinejad zavod üçün seçilmiş yeri təsdiq edib. Prezidentin baş müşaviri Moctəba Səmareh Haşemi bildirib ki, tikinti işləri prezidentin göstərişilə başlayacaq.    Bundan başqa, artıq 3 gündür ki, İranın silahlı qüvvələri İran körfəzi və Hörmüz boğazında təhlükəsizliklə əlaqədar hərbi təlimlərə başlayıb. Elitar İnqilabi Qvardiyanın hərbi dəniz qüvvələri məsafədən idarə olunan yeni radardan yayına və düşmən gəmilərini məhv edə bilən qayığın müvəffəqiyyətlə sınaqdan keçirildiyini bildirib. İran bildirir ki, təlimlərdə raket daşıyan yüksək sürətli 300-dən artıq hərbi qayıq və raket iştirak edir.    Dünya neftinin 40 faizi Hörmüz boğazı vasitəsilə nəql edilir. İran, hücuma məruz qaldığı halda, Hörmüz boğazını bağlayacağını bildirib. Qeyd edək ki, hərbi təlimlər İranla Qərb ölkələri arasında gərginliyin artdığı vaxtda keçirilir. Məhz bu fonda ABŞ Müdafiə nazirliyinin rəsmiləri Vaşinqtonun diplomatiya və sanksiyaların İranın nüvə proqramını dayandırmasına çalışdığı bir vaxt İrana qarşı hərbi müdaxilə variantının istisna edilmədiyini bildirir. Görünür, ABŞ-ın müharibə hədələrinin ciddi olması İranı bir qədər yumşalmağa vadar edib.    Belə ki, İranın dövlət televiziyası ölkəsinin nüvə yanacağına dair BMT-nin dəstəklədiyi təkliflə bağlı həlledici və detallı danışıqlara başlayacağını bildirib. İranın xarici işlər naziri Mənuçehr Möttəki Beynəlxalq Atom Enerjisi Agentliyinin başçısı Yukiya Amano ilə görüşmək üçün artıq Vyanadadır. Cənab Möttəki İran televiziyasına müsahibəsi zamanı yanacaq mübadiləsi barədə razılığın çoxtərəfli etibar yaradılmasına gətirib çıxaracağını deyib. Nüvə mübadiləsinə əsasən, İranın aşağı səviyyədə zənginləşdirilmiş uranı tibbi sahələrdə istifadə ediləcək yanacağa çevirmək üçün xaricə göndərməsi nəzərdə tutulur. İran indiyə qədər Beynəlxalq Atom Enerjisi Agentliyinin irəli sürdüyü təklifin bəzi şərtlərinə etiraz edirdi. Iranın müttəfiqi olan Türkiyə də müharibənin başlamaması üçün fəaliyyətini gücləndirib. Ankara İran və BMT arasında nüvə proqramı ilə əlaqədar yaranan vəziyyətdən çıxış yolu təklif edib. Türkiyə xarici işlər naziri Əhməd Davudoğlu bildirib ki, Türkiyə uran mübadiləsi proqramında vasitəçi rolunu oynamağa hazırdır.baki-xəbər