GünAzTv: 24 apreldə Reportiyorların Azadlıq və Təhlükəsizlik İnstitutunun konfrans zalında “24 Aprel Bütöv Azərbaycan Gənclər Günüdür” mövzusunda tədbir keçirilib. Tədbirdə gənclər, ziyalılar, ictimai- siyasi xadimlər, QHT rəhbərləri və KİV nümayəndələri iştirak edib. Qaynar.info xəbər verir ki, Tədbiri giriş sözü ilə Mehriban Vəzir açaraq yığıncağın keçirilməsi səbəbləri, zərirəti və bu yöndə görülən işlərdən danışdı. O, Azərbaycanın bütövlüyünün təmin edilməsi istiqamətində gəncliyin üzərinə böyük vəzifə düşdüyünü qeyd edərək yalançı erməni soyqırım günündə belə bir əlamətdar günün qeyd olunmasının xüsusi əhəmiyyət daşıdığını bildirdi. M. Vəzir tədbirdə 3 məruzənin edilməsinin nəzərdə tutulduğunu bildirərək sözü çıxışçılara verdi. Toplantıda məruzə ilə çıxış edən Demokratik İslahatlar Uğrunda Cəmiyyətin (DİUC) həmsədri Oqtay Gülalıyev “24 Aprel Bütöv Azərbaycan Gənclər Günü” münasibəti ilə bütün Azərbaycan gənclərini təbrik edərək bildirdi ki, 1999- cu ildə Azərbaycan Milli Azadlıq Hərəkatının lideri Əbülfəz Elçibəyin təşəbbüsü və Bütöv Azərbaycan Gənclər Təşkilatının (BAGT) təşkilatçılığı ilə 40-a yaxın gənclər təşkilatının qərarına əsasən 24 Aprel-Bütöv Azərbaycan Gənclər günü elan edilib; “24 aprel- Bütöv Azərbaycan Gənclər günü yalançı erməni soyqırım gününə həm də bir cavabdır. Biz inanırıq ki, 21- ci əsrin bəlalarından olan, təkcə türk dünyasına qarşı deyil, bütün dünyaya meydan oxuyan, bəşəriyyəti qarşıdurmaya və gərginliyə sürüklüyən ermənilərin yalançı soyqırım iddialarının əssasız olduğunu GƏNCLİK sübuta yetirəcək və Azərbaycanın bütövlük məsələsini həll edəcək”.

Toplantıda məruzə ilə çıxış edən türkoloq alim Aydın Mədətoğlu Bütöv Azərbaycan ideyasının reallaşması istiqamətində aparılan mübarizədə gənclərin böyük qüvvə olduğunu bildirdi; “Gənclik qarşısı alınmaz gücdür. Sevindirici haldır ki, gənclərimizdə milli şüur oyanıb. Onlar təşkilatlanır və Azərbaycanın bütövlüyü uğrunda mübarizə aparırlar... Azərbaycanın Güneyində yaşayan soydaşlarımız düşüncə baxımdan oranı özlərinə vətən hesab edə bilərlər, amma reallıq baxımdan yox. Çünki Güney Azərbaycan bu gün İran adlanan dövlətin əsarəti altındadır, öz istiqlalını hələ əldə edə bilməyib. Dövlət fars dövlətidir. Hazırda qarşımızda duran ən mühüm məsələ Güney Azərbaycanın istiqlala qovuşmasıdır”.

Aydın Mədətoğlu Azərbaycanın bütövlüyünə nail olunması istiqamətində təşkilatlanma işləri ilə yanaşı milli kimlik və mübarizə ruhunun formalaşması üçün təbliğat- təşviqat vasitələrindən daha geniş şəkildə istifadə olunmasının vacibliyini bildirdi.Toplantıda növbəti məruzə Güney Azərbaycan İstiqlal Partiyasının ideoloji məsələlər üzrə məsulu Nəbi Soytürk tərəfindən edildi. O öz çıxışında Azərbaycanın Güneyində milli şüurun kifayət qədər formalaşdığını bildirdi. N. Soytürk öz fikrini əsaslandırmaq üçün qeyd etdi ki, bu gün Təbrizin “Traktor” futbol klubuna azərbaycanlıların böyük sevgi və maraqla dəstək verməsi, 10 minlərlə insanın bu komandanın oyunlarına seyr edərkən milli şüarlar səsləndirməsi, ən ucqar kəndlərdə belə “Traktor”un formasını geyməsi, onu dəstəkləməsi, eyni zamanda insanlarımızın öz ana dilinə göstərdiyi maraq bir daha göstərir ki, soydaşlarımızın milli şüur səviyyəsi əvvəlki illərlə müqayisədə xeyli artıb.Tədbirdə millət vəkili Pənah Hüseyn, politoloq İlqar Məmmədov, Yeddi Dövlət - Bir Millət Konseyi başqanı Azər Həsrət, DAK Gənclər Təşkilatının sədri Samir Turan, KXCP sədr müavini Bəybala Əbil, BAP sədri Elşad Musayev, jurnalist Sərdar Əlibəyli, BAB üzvü Mətanət Əliyeva və digərləri çıxış edərək “24 Aprel Bütöv Azərbaycan Gənclər Günü” nün qeyd olunmasının əhəmiyyətindən danışdılar. Onlar öz çıxışlarında Azərbaycanın bütövləşməsi yönümündə aparılan mübarizədən, görülən işlərdən söhbət açaraq öz təklif və tövsiyyələrini bildirdilər.Tədbirin sonunda Mehriban Vəzir və Araz Aslanlının GünAZTV- də Bütöv Azərbaycanla bağlı hazırladıqları video çarx və Əbülfəz Elçibəyin çıxışı olan kaset iştirakçılara nümayiş olundu. Toplantı Azərbaycan Respublikasının dövlət himni ilə bağlı elan olundu.//QayNar