GünAzTv: Bu gün GünAzTv-nin ad gündü. Yaranmasından nə az, nə də çox düz 5 il keçən bu televiziya tele-məkana öz imzasını şərəf və qürurla atanlardandı. O taylı, bu taylı Azərbaycanımızı birləşdirən, qovuşduran bir kanaldı, GünAzTv. Parçalanan bir xalqın tarixini araşdıran bir televiziyadı, Güney  Azərbaycan Televiziyası. Əzilən bir millətin, döyülən bir xalqın, işgəncələrə, edamlara məruz qalan   insanların haqq səsinin carçısıdı. İllərdir əlimiz çatmayan, ünümüz yetməyən yurdumuzun o biri tayıyla bizi vizual yaxınlaşdıran bir məkandır. Dili bir, dini bir, canı, qanı bir  qardaşların görüş yeridir.

Düz 5 il öncə sayın Əhməd bəy Obalının təşəbbüsü və səyi nəticəsində araya-ərsəyə gəlib bu televiziya... İlkin variantda bəlkə ən adi əyalət televiziyasından da zəif idi. Amma sonradan tele-məkanda sanki bir sıçrayışla yerini aldı Güney Azərbaycan Televiziyası. Kanallar içərisində sevildi, axtarıldı, arandı, yeri və məqamı bütün parlaqlığıyla göründü. Dünya Azərbaycanlılarının Milli Televiziyasına çevrildi. İran hakimiyyətinin bütün maneə və qadağalarına baxmayaraq, peyklərdə dəyişən ünvanları belə onu tamaşaçı itkisiylə qarşılaşdıra bilmədi.Çünki böyük bir sevgidən yaranmışdı. Vətən sevgisindən, yurd, el-oba, torpaq, millət, xalq məhəbbətindən pərvazlanmışdı... Sayın Əhməd bəy Obalının içinə, duyğularına sığmayan Böyük Azərbaycan arzusunun, sevgisinin məhsuluydu. Mühacirətdən Vətən sarı boylanan dünya azərbaycanlılarının birləşdiyi, dərdləşdiyi, mədəniyyətlərinin təbliğ və tərənnüm olunduğu bir yerdi...

Gün Az Tv bu gün dünyada yaşayan azərbaycanlıların açıq tribunasıdır.  24 saat fasiəsiz yayınlanan bu kanal Azərbaycanın Güneyinə ən son “Xəbərlər”i, “Ana dili”ni, “Musiqi dünyası”nı, “Muğam dərsi”ni, “Bacarıqlı əllər”i, “Rəqs dünyası”nı təqdim edir. Məhz onun bələdçiliyi ilə Arazın o tayında qalan mədəniyyətimiz  bu taya, bu taydakı ədəbiyyatımız, incəsənətimiz  isə o taya tanınır. Bu gün Güney Azərbaycanlılarının görən gözü, eşidən qulağıdı, Gün Az Tv. Bu gün o tay millətimizin, xalqımızın danışan dili, düşünən beynidi bu kanal...Təqib və təhqirlərə, həbs və edamlara etiraz səsinin ucaldığı bir yerdi...35 milyonluq bir xalqın maarifləndiyi bir televiziyadır.

Bu gün bu televiziyanın gördüyü işi bəlkə çox kanal görə bilməz?! Bu gün bu televiziyanın daşıdığı missiyanı bəlkə  çox televiziyalar daşıya   bilməz?! Bəlkə onun boynuna çəkdiyi məsuliyyətə çoxları çəkə də  bilməz?! Gün Az Tv bir əsrdən çoxdur ki, əsarətdə qalan bir xalqı istiqlaliyyətə, nicata səsləyir. Doğma ana dilinə, doğma Türk adına həsrət qalan bir xalqın 100 illərdən sonra gözlərini açmaq, içindəki millətçilik duyğularını oyatmaq asan başa gəlmir. İran hakimiyyətinin edam kötüyünə qoyulan başların hökmünü geri oxumaq, boyunlara keçən edam kəndirindən sıyırıb çıxarmağı bacarmaq   böyük güc və səbr istəyir...İllərdir öz tarixini deyil, farsın yazdığı tarixi öyrənən 35 milliyona həqiqəti anlatmaq üçün ilk növbədə onun etibarını qazanmaq  gərəkdir...Və qazandı da...Bu gün beyinlərdə bulanan tarixin o dolanbaclarına, o qaranlıq cığırlarına işıq tutmağa çalışır Gün Az Tv...Yaşı əsrlərlə ölçülən muğamımızı, tar-kamanımızı, xalça sənətimizi, memarlıq abidələrimizi, nəsrimizi, poeziyamızı dünyada yaşayan azərbaycanlılarımıza təqdim edir. Deyirlər, tarixdən böyük dərs yoxdur. Dəflərlə dəyişən əlifbamız, ayrı-ayrı əlyazmalara calanıb dünyanın dörd bir yanına yayılan ədəbi abidələrimiz tariximizi qəlizləşdirsə, təhrif etsə də,amma həqiqət kitabdan daha böyükdür. Bu gün o həqiqətə işıq tutanlardandı Güney Azərbaycan Televiziyası...İran hakimiyyətində boğulan millətimizi müstəqilliyə, azadlğa, milli kimliyə çağıran bir kanaldı...

Məşhur inqilabçı Şeyx Məhəmməd Xiyabani deyir ki:”Bir xalqın şərafəti üçün birinci onun müstəqil olmasıdır.Müstəqil olmayan bir xalqın əzm və hörməti yoxdur.Hər bir xalqın istiqlaliyyətini qoruyan onun mərdlik və şücaətidir”...Bəli xalıq müəqddaratını özü müəyənləşdirməlidir.Unutqanlıq, biganə və laqeyidlikdən kimliyini unudanların vay halına...Bu gün o kimliyin keşiyində dayanıb Gün Az Tv. Bu gün Milli dirçəlişin, oyanışın carçısıdı, Güney Azərbaycan televiziyası. Bu gün insan haqqlarının müdafiəçisidir...Bu gün əzilənlərin, ədalətsizliyə məruz qalanların arxasıdı, dayağıdı...Bu yolda əzm və iradəylə   yerini və mövqeyini layiqincə tutan bu kanala 5 yaşın mübarək deyir, başda sayın Əhəməd bəy Obalı olmaqla hər bir əməkdaşını  təbrik edirik.

                                                                                           Aygün Diridağlı...