GünAzTv: Davudoğlu Türkiyənin nüvə yanacağı mübadiləsi məsələsində üçüncü ölkə kimi vasitəçilik etməyə hazır olduğunu deyib.

Türkiyənin xarici işlər naziri Əhməd Davudoğlu aprelin 20-də Tehranda İran rəsmilərilə danışıqlar aparıb. Görüşdə İranın mübahisəli nüvə proqramı ətrafında fikir mübadiləsi aparılıb. Qeyd edək ki, ABŞ-ın müttəfiqi olan Türkiyənin İranla da yaxşı münasibətləri var. Ankara İranın nüvə proqramıyla bağlı diplomatik həll variantına üstünlük verir. ABŞ İrana qarşı dördüncü dəfə sanksiya qoyulmasını istəyir. Qərb İranın nüvə silahı hazırlayacağından ehtiyatlanır. İran isə nüvə proqramının dinc məqsədli olduğunu bildirir. Türkiyənin xarici işlər naziri Əhməd Davudoğlu Tehrandan əvvəl Bakıda səfərdə olub. İranın xarici işlər naziri Manuçöhr Müttəki bildirib ki, Tehran reaktoruna lazım olan yanacağın mübadiləsi tərəflər arasında etimad yaratmaq üçün əlverişli fürsət ola bilər. O, dünən türkiyəli həmkarı ilə keçirdiyi birgə mətbuat konfransında vurğulayıb: "Əgər Tehran reaktoruna lazım olan yanacağın mübadiləsi məsələsinin əsasında razılıq ciddi şəkildə əldə olunarsa, digər məsələlərlə bağlı müzakirələr aparmaq və qarşılıqlı etimad yaratmaq mümkündür". Müttəki "İran hələ də yanacağın öz ərazisində mübadiləsinə təkid edirmi" sualını cavablandırarkən belə deyib: "Fikrimcə, əgər tərəflərin yanacağın mübadilə formulu haqda ciddi istəkləri olarsa, yanacaq mübadiləsi hələ də tərəflər arasında qarşılıqlı etimadın yaranmasına şərait yarada bilər". Türkiyə XİN rəhbəri Əhməd Davudoğlu da bildirib ki, rəsmi Ankara İranın nüvə proqramının diplomatik yollarla həll olunacağına inanır və bu sahədə hər an və hər yerdə Tehrana kömək göstərməyə hazırdır. O deyib: "Əgər İran məsləhət görərsə, Türkiyə Tehran reaktoruna lazım olan yanacağın mübadiləsi prosesinə qoşulsun, biz bu əməkdaşlığa hazırıq". Diplomat əlavə edib: "Öz təkliflərimizi ABŞ və İran tərəflərinə artıq təqdim etmişik". Davudoğlu Türkiyənin nüvə yanacağı mübadiləsi məsələsində üçüncü ölkə kimi vasitəçilik etməyə hazır olduğunu deyib. Qərbin tələbinə görə, İran "Tehran" nüvə laboratoriyası reaktorunun yanacaqla təmin edilməsi üçün Rusiyaya 1200 kq 3,5 faizlik zənginləşdirilmiş uran verməklə, 20 faizlik zənginləşdirilmiş uran təhvil alsın. "Tehran" laboratoriyasındakı reaktoru 40 il bundan əvvəl ABŞ tikib və əsas funksiyası dərmanların istehsalı ilə məşğul olmaqdır. Sonuncu dəfə 1993-cü ildə İran Argentinadan 30 kq 19,75 faiz zənginləşdirilmiş uran almaqla, bu reaktoru yanacaqla təmin edib. ABŞ və Qərb İranı nüvə silahı yaratmağa çalışmaqda günahlandırıb. İran isə uranın zənginləşdirilməsindən məqsədin nüvə elektrik stansiyalarını yanacaqla təmin etmək olduğunu bildirib. xalqcebhesi