Professoru Qulam Rza Səbri Təbrizinin “Respublika” qəzetinə  MÜSAHİBƏSİ...

GünAzTv mətbuat mərkəzi Dünya Azərbaycanlıları Konqresinin fəxri sədri, Edinburq Universitetinin professoru Qulam Rza Səbri Təbrizinin “Respublika” qəzetinə verdiyi müsahibəni olduğu kimi təqdim edir:

Dünya azərbaycanlılarının II qurultayından sonra xarici ölkələrdəki diaspor təşkilatlarının fəaliyyəti genişləndirilmiş, əsas diqqət bir bayraq altında birləşməyə yönəldilmişdir. Soydaşlarımızın vahid ideya və məqsəd ətrafında birləşdirilməsi, mütəşəkkil və çevik diasporun, güclü lobbinin yaradılması azərbaycançılıq ideologiyasının uğurla həyata keçirilməsinə stimul yaratmışdır. Bu gün azərbaycançılıq ideologiyası ümummilli məna kəsb etməyə başlamış, bütöv bir xalqın milli inkişafının konseptual əsaslarını müəyyənləşdirən amilə çevrilmişdir.Son dövrdə dünyanın müxtəlif ölkələrində milli diasporumuzun formalaşdırıb, mütəşəkkil qüvvəyə çevrilməsi istiqamətində hansı işlər görülmüşdür? Biz bu məqsədlə, Dünya Azərbaycanlıları Əlaqələndirmə Mərkəzinin rəhbəri Edinburq Universitetinin professoru Qulam Rza Səbri Təbriziyə müraciət etdik. Müsahibəmiz bizi maraqlandıran məsələlərə aydınlıq gətirərək dedi: - Bu gün xarici ölkələrdə yaşayan azərbaycanlıların sürətlə təşkilatlanması prosesi müşahidə edilməkdədir. Vurğulamaq lazımdır ki, Əlaqələndirmə Şurası bu prosesə dəstək verir və onu daha da təkmilləşdirməyə, soydaşlarımızın diaspor quruculuğu sahəsində fəaliyyətini koordinasiya etməyə maksimum səy göstərir. Azərbaycan Respublikasının diaspor quruculuğu sahəsindəki dövlət siyasətinin başlıca qayəsi ümummilli lider Heydər Əliyevin müəllifi olduğu azərbaycançılıq ideologiyasının fundamental prinsiplərini həyata keçirməkdən ibarətdir. Heydər Əliyevin bir fikrini xatırlatmaq istərdim: “Azərbaycanlı hər yerdə yaşaya bilər, ancaq dinini, milli ənənələrini ununtmamalıdır. Onun qəlbi doğma Azərbaycanla bir vurmalıdır”. Əlaqələndirmə Şurası Mərkəzinin məqsədyönlü fəaliyyəti sayəsində son dövrdə mühüm addımlar atılmış, həmvətənlərimizin təşkilatlanması, azərbaycançılıq ideyalarını kerçəkləşdirilməsi üçün bir çox problemlərin həllinə nail olunmuşdur. Bu gün dünyada “qloballaşma” adlanan mürəkkəb bir proses başlanmışdır. Onun doğurduğu reallıqlar Azərbaycan diasporunun fəaliyyətinə də öz təsirini göstərməkdədir. İnteqrasiya prosesləri dünyanın müxtəlif regionlarında yaşayan həmvətənlərimizin daha sıx şəkildə birləşməsini zərurətə çevirmişdir. Başqa sözlə desək, indi azərbaycanlıların ideya-siyasi birliyi yalnız ölkəmizin milli maraqlarından irəli gələn məsələ deyildir, həm də müasir dünyada gedən ictimai-siyasi proseslərin tələbi ilə ortaya çıxan zərurətdir. Vurğulamaq lazımdır ki, Dünya Azərbaycanlıları Əlaqələndirmə Şurası Mərkəzinin təşəbbüsü ilə 2009-cu ildə soydaşlarımızın yaşadığı bir çox ölkələrdə yaddaqalan görüşlər keçirilmiş, xüsusilə, Azərbaycan həqiqətlərinin dünya xalqına çatdırılması istiqamətində geniş işlər aparılmışdır. Keçən ilin yanvar ayında Belçikanın Brüssel şəhərində Avropa Parlamenti üzvləri ilə 2 görüş keçirilmiş, Güney Azərbaycanda insan haqlarının bugünkü durumu, Azərbaycanın ermənilər tərəfindən işğal olunmuş əraziləri, o cümlədən, Xocalı soyqırımı ilə bağlı məsələlər müzakirə edilmiş, erməni vəhşiliyindən, onların tarixən türk xalqlarına qarşı olan düşmənçilik mövqeyindən söhbət açılmışdır. Görüş iştirakçılarına Xocalı faciəsini əks etdirən sənədlər çatdırılmışdır.Qeyd etmək lazımdır ki, keçən ilin iyun ayında Böyük Britaniyanın Lits, Məcçestr və Nyukasl şəhərlərində xaricdəki Azərbaycan diaspor təşkilatlarının rəhbərləri ilə görüşlər keçirilmiş və mühüm məsələlər müzakirə edilmişdir. 2009-cu ilin iyulunda Türkiyədə fəaliyyət göstərən İzmir-Azərbaycan Kültür Mərkəzində keçirilən tədbirdə Türkiyənin müxtəlif şəhərlərində yaşayan Azərbaycan türklərinin təşkilatlanması və soydaşlarımızın milli ideya ətrafında birləşməsindən söhbət açılmış, Bakı, İzmir, Təbriz şəhərlərinin dostluq gecələrinin (festival formasında) keçirilməsi qərara alınmışdır. Keçən il Dünya Azərbaycanlıları Əlaqələndirmə Şurası Mərkəzinin rəhbəri kimi, İngiltərənin Lits şəhərinin mərkəzi kitabxanasında Azərbaycan və türk diaspor fəalları, İngiltərədə yaşayan Azərbaycan və türk iş adamları ilə keçirilən görüş yüksək səviyyədə başa çatdı. Həmin tədbirdə Lits şəhərinin meri, universitet müəllimləri iştirak edirdilər. 2009-cu ilin sentyabrında Londonda nəşr olunan “Araz” qəzetinin təşəbbüsü ilə Üzeyir Hacıbəyovun doğum gününə həsr olunmuş tədbir keçirildi. Eyni zamanda, London-Azərbaycan evindən yayımlanan yeni ANAZ radiosunun fəaliyyətindən söhbət açıldı. Həmin radioda mütəmadi olaraq, Azərbaycan dilində xəbərlər və musiqi proqramları səsləndirilir. 2009-cu ilin sentyabrında Dünya Azərbaycanlıları Əlaqələndirmə Şurası Mərkəzinin təşəbbüsü ilə Dərbənddə görkəmli alim, şərqşünas Mirzə Kazım bəylə bağlı elmi-konfrans keçirilmişdir. Keçən ilin dekabrında Hollandiyanın paytaxtı Amsterdamda dünya diaspor təşkilatlarının rəhbərləri ilə keçirilən toplantıda 360-dan çox nümayəndə iştirak edirdi. Professor Qulam Rza Səbri Təbrizi sözünə davam edərək vurğuladı ki, 2010-cu ildə milli diasporumuzla bağlı səmərəli görüşlərin keçirilməsi nəzərdə tutulmuşdur. Bu ilin fevarl ayında Lits şəhərində Xocalı soyqırımı ilə bağlı keçirilən mərasimdə ermənilərin Xocalıda törətdikləri vəhşiliklərdən geniş söhbət açılmışdır. Həmçinin, Xocalı soyqırımı İngiltərənin lordlar palatasında müzakirə olundu və parlament binası qarşısında erməni vəhşiliyi ilə bağlı etiraz mitinqi keçirildi.Bu ilin mart ayında Novruz Bayramı ilə bağlı Dərbənddə keçirilən tədbir də yaddaqalan oldu. Əlavə edim ki, yaxın vaxtlarda Azərbaycan diaspor təşkilatları rəhbərlərinin Brüsseldə toplantısı keçiriləcəkdir. Söhbət apardı: Qədir Aslan“Respublika” qəzeti