“Azərbaycan güneydəki soydaşlarımıza praktiki dəstəyi reallaşdıra bilər”-Politoloq

SON XƏBƏRLƏR

“Azərbaycan güneydəki soydaşlarımıza praktiki dəstəyi reallaşdıra bilər”-Politoloq

2023.06.07, 12:45

Son vaxtlar İranın Azərbaycan Respublikasına qarşı təhdidləri müəyyən qədər səngisə də, Tehranın Azərbaycan siyasətində köklü dəyişiklik nəzərə çarpmır. Əfqanıstan sərhədində yaranmış gərginlik İranın başını qatan faktordur. Lakin molla rejimi istənilən vaxt Azərbaycan əleyhinə təhdidləri gücləndirə bilər.

Gunaz.tv

Politoloq Aqşin Kərimov Günaz.TV-yə açıqlamasında bildirib ki, İran Yaxın Şərqdə formalaşdırdığı ideoloji bazanın Azərbaycanda da bərqərar olması üçün müxtəlif variantlara əl ata bilər.

“İranın təhdid bəyanatlarına Azərbaycan ən uyğun məkanda və düzgün zamanda adekvat cavabları dövriyyəyə buraxır, bu, rəsmi Bakının Tehranın hədələrinə qarşı soyuqqanlı, təmkinli davranışının göstəricisidir.

Soyuqqanlılıq xarici siyasət prioritetlərində düzgün tərəfdaşlar axtarmaq üçün yaxşı tövrdür, İran hədə-qorxularını göylərə qaldırdıqca, Azərbaycan da həm təhdidlərə qarşı strateji müqavimət oxu yaradır, həm də tərəfdaşları və müttəfiqləri ilə koordinasiyalı hərəkət edir.

İranın keçirdiyi hərbi təlimlərə gəlincə, Azərbaycan buna adekvat cavablar verir və elit qüvvələrinin İranla sərhəd boyu ərazilərində təlimlərini keçirir. Bakının Tehrana qarşı addımlar seriyasının təbii ki, davamı gələcək, çünki İranın Azərbaycanla bağlı siyasətində dəyişiklik yoxdur.

Molla rejimi Azərbaycandakı dayaq məntəqələrini itirdikcə, onun kəşfiyyat şəbəkəsi ifşa edildikcə ən böyük zərbələri alır. İran təbii ki, dayanan deyil, hərçənd Azərbaycanla münasibətlərdə iqtisadi prioritetlərə ziyan gəlməyib”-deyə, politoloq bildirib.

Aqşin Kərimov hesab edir ki, Azərbaycan təhidlərinə qarşı daha etibarlı geopolitiq “müdafiə qalxanı” hazırlanmalıdır:

“Azərbaycan strateji müttəfiqi Türkiyə və Qərbdəki strateji tərəfdaşları ilə İran təhdidlərinin real ölçülərini göstərən strateji təhlil paketi hazırlasa, daha yaxşı olar.

Bu strateji paketin içərisində İranda yaşayan azərbaycanlılarla bağlı proqram da yer almalıdır, çünki mümkün regional qarışıqlıq zamanı Azərbaycan cənubdakı soydaşlarımızın hüquq və azadlıqlarına praktiki dəstək verməyi planlaşdırır.

Azərbaycan İrana onsuz da praqmatik təkliflər verir – pərdəarxasında belə bir mövqenin olduğunu düşünürəm. Amma İran Azərbaycan artan strateji qiyməti və güclənən regional rıçaqlarından dolayı qısqanclıq zəmininə düşdüyündən Bakıdan gələn təklifləri gözardı edə bilər.

Azərbaycan İrandakı azərbaycanlıların hüquqlarının qorunmasını hərəkat halına gətirmək çağırışı ilə qarşı-qarşıyadır və bu regional kontekst nəzərə alınanda elə də asan məsələ kimi görünmür”.

Ayxan