HƏMAS-ın oktyabrın 7-də İsrailə qarşı hücumlarından bir ildən çox vaxt keçdikdən sonra İsrail ordusu bu hücumların baş memarı hesab etdiyi Yəhya Sinvarın öldürüldüyünü elan edib. Yəhya Sinvar oktyabr 7-də İsrailə hücumlardan sonra İsrail ordusu tərəfindən ən çox axtarılan şəxs olaraq elan edilmişdi. İsrail ordusunun sözçüsü bu şəxsi ölü və ya diri ələ keçirməyənə qədər dayanmayacaqlarını elan etmişdi.

Yəhya Sinvarın öldürülməsi ilə bağlı təfərrüatlar ortaya çıxıb. "CNN" öz mənbələrinə istinadən xəbər verir ki, İsrail ordusu bir il ərzində Yəhya Sinvarı ələ keçirməyə bir neçə dəfə yaxınlaşıb. İsrail ordusu bu müddət ərzində Sinvarın bir neçə ailə üzvü ilə Qəzza tunelində gizləndiyi görüntüləri ələ keçirib. İsrail hərbçiləri daha əvvəl Sinvarın evini mühasirəyə alıb və onun doğulduğu Xan Yunis şəhərində bir neçə dəfə əməliyyat həyata keçiriblər. 

Bir il davam edən axtarışlar nəhayət çərşənbə günü Qəzzanın cənubundakı Rəfah şəhərində sona çatdı. İsrail ordusunun iki hərbçisinin iddialarına əsasən, İsrail qüvvələri adi hərbi əməliyyat zamanı ərazidə olublar. Onlar binanın yaxınlığında atəşə tutulublar. Əsgərlər tankla cavab atəşi açıblar, daha sonra isə ağır xəsarət almış binaya dron vasitəsilə baxış keçiriblər. Hərbçilər tərəfindən paylaşılan videoda Sinvarın son anları görünür: o, dağıntılarla əhatə olunmuş oturacaqda əyləşib, birbaşa dronun kamerasına baxır. Əlində tutduğu taxta parçası ilə dron istiqamətinə atmağa çalışır və video bu şəkildə bitir. 

Qoşunlar dağıntıları yoxlayanda cəsədlər arasında Sinvarın olduğunu anladılar. Adı açıqlanmayan ABŞ rəsmisinin dediyinə görə diş və digər biometrik məlumatlar sayəsində öldürülən şəxsin HƏMAS lideri olduğu ortaya çıxıb.

Cümə axşamı İsrail ordusunun başqa bir sözçüsü Sinvar öldürüldüyü zaman şimala qaçmağa çalışdığını iddia etdi. Mətbuat katibi bildirib ki, onun üzərində silah və 10 min dollar ekvivalentində İsrail şekeli çox pul tapılıb.

BUNDAN SONRA NƏ OLACAQ?

Bundan sonra nə baş verə biləcəyini və HƏMAS-ın necə cavab verə biləcəyini söyləmək hələ tez olsa da, Sinvarın öldürülməsi terror təşkilatına vurulan son zərbə hesab etmək olar. İsrailin HƏMAS-ı tamamilə məhv etmə əməliyyatı zamanı yüksək səviyyəli liderlərin bir-bir öldürüldüyü müşahidə edilir.

Haniyənin öldürülməsindən cəmi bir gün sonra İsrail HƏMAS-ın hərbi komandiri Məhəmmd Deifinin də öldürdüyünü elan etdi. ABŞ rəsmiləri hesab edir ki, Yəhya Sinvarın aradan qaldırılması ilə İsrail müharibəninin sona çatdırılması üçün şans əldə edib. 

ABŞ prezidenti Co Bayden cümə axşamı Netanyahu ilə telefon danışığı zamanı hər iki lider girovların azad edilməsi üçün imkanların olduğu və bu məqsədə çatmaq üçün birlikdə çalışacaqları barədə razılığa gəldiklərini bildirdi. Lakin Sinvarın qardaşının taleyi də daxil olmaqla çox detal naməlum olaraq qalır. Keçən ay CNN-ə yüksək rütbəli İsrail rəsmisi deyib ki, Məhəmməd Sinvar bu yaxınlarda HƏMAS-ın hərbi komandanı vəzifəsinə keçib. 

Məhəmməd bu həftə sağ qalmağı bacarsa, o, çox güman ki, qardaşının sərt danışıqlar strategiyasını davam etdirəcək. Ancaq aydın mənzərə ortaya çıxana qədər silahlı qrupun növbəti addımını bilmək çətin olacaq.

Şahin Elxanoğlu

GünazTV