Ermənistan Gürcüstanın daxili işlərinə qarışır Mübariz Əhmədoğlu: "Rusiya ilə Avropa arasındakı qaz münaqişəsi Azərbaycanın regiondakı rolunu daha da artırıb" QayNar: Bu gün Siyasi İnnovasiya və Texnologiya Mərkəzi (SİTM) yanvar ayında beynəlxalq və regional aləmdə baş verən ictimai-siyasi proseslərin ümumi yekunlarına dair hesabatını açıqlayıb. Hesabatı təqdim edən SİTM sədri Mübariz Əhmədoğlu əvvəlcə Rusiya ilə Avropa arasındakı qaz münaqişəsindən danışıb. Qeyd edib ki, iki dövlət arasındakı konflikt Avropanın enerji təchizatını ciddi təhlükə qarşısında qoydu: "Münaqişənin yaranma motivi, eləcə də Rusiyanın istifadə etdiyi arqumentlər iki versiya üzərində düşünməyə əsas verir. Birinci versiya problemin geosiyasi amillərdən qaynaqlanması ilə bağlıdır. Ehtimal olunur ki, Rusiya Avropaya və ABŞ-a öz gücünü göstərmək istəyir. İkinci versiya isə Rusiyanın son vaxtlar məsuliyyətsiz qərarlar qəbul etməsilə bağlıdır. Düzdür, münaqişə nəticəsində uduzan tərəf Ukrayna oldu. Amma müxtəlif parametrlər üzrə daha çox itirən isə Rusiyadır. Münaqişə nəticəsində Ukraynanın nüfuzuna ağır zərbə dəydi. Bunun qarşılığında isə "Qazprom" Avropa İttifaqı strukturlarında lobbiçilik lisenziyasını, eləcə də 2 milyard vəsait itirdi. Rusiya Avropada iş görmək və bu regiondan öz enerji sektoruna investisiya cəlb etmək imkanlarını itirdi. Kreml son hadisələr zamanı həm də xeyli sayda müttəfiq dövlətlə münasibətlərini korlamış oldu". SİTM sədri bildirib ki, ötən ay Mərkəzi Asiya regionunda da maraqlı hadisələr baş verib. Onun sözlərinə görə, D.Medvedyevin Mərkəzi Asiyaya ilk dörd səfərinin "marşrut"unun Öbəkistandan kənar keçməsi, Mərkəzi Asiyanın mərkəzində yerləşən Özbəkistanın ambisiyalı, hikkəli, qoca prezidenti İslam Kərimovu hədsiz qıcıqlandırdı: "İslam Kərimov Rusiyanı cəzalandırmaq üçün Özbəkistanı Avroasiya İqtisadi Əməkdaşlıq Təşkilatından çıxardı. Özbəkistan prezidentinin Rusiyaya qarşı belə təzyiq yolunu seçməsi səbəbsiz deyil. Çünki İslam Kərimov bir müddət öncə ABŞ-ı da belə "cəzalandırmışdı". Əndican hadisələrindən sonra Özbəkistanı kəskin tənqid edən ABŞ sonda İslam Kərimovla əvvəlki münasibətləri bərpa etmək üçün az qala yalvarırdı. Burdan isə belə qənaətə gəlmək olar ki, Özbəkistan hələ də Mərkəzi Asiyanın "açar dövlət"i olaraq qalır". Mətbuat konfransında M.Əhmədoğlu yanvar ayında Cənubi Qafqazda baş verən hadisələri də şərh edib. Bildirib ki, Avropanın enerji tələbatının ödənilməsində yaranan problemlər Azərbaycanın regiondakı rolunu daha da artırıb: "Rusiya ilə Ukrayna arasında yaranan tranzit problemləri Avropanı ciddi narahat edir. Vəziyyətdən çıxış üçün əsas alternativ variant Azərbaycan hesab olunur. Son vaxtlar Avropa dövlətlərinin Azərbaycana münasibətində müsbət dəyişikliklər müşahidə olunur". Sonda politoloq ötən ay Gürcüstan və Ermənistanda cərəyan edən hadisələrə də toxunub. M.Əhmədoğlu deyib ki, son vaxtlar Gürcüstan-Ermənistan münasibətləri gərginləşməkdə davam edir. Onun fikrincə, iki ölkə arasındakı gərginlik həm etnik, həm də dini sahəni əhatə edir: "Bu gərginliyin əsas mənbəyi Ermənistandır. Ermənistan Gürcüstanın daxili işlərinə qarışmaq üçün həm etnik, həm də dini amildən istifadə edir. Erməni Apostol Kilsəsinin (EAK) Gürcüstan ərazisində yeparxiyası, yəni nümayəndəliyi olduğu halda Ermənistanda Gürcü Pravoslav Kilsəsinin (GPK) yeparxiyası yoxdur. Ermənistan Gürcüstan ərazisində, ermənilərin kompakt yaşadığı Cavaxetiyada ikinci yeparxiya açmaq istəyir. Bununla yanaşı, ermənilər Gürcüstan ərazisindəki qeyri-gürcü mənşəli kilsələri də özününki hesab edir". T.İsmayılov, QayNar