“İSLAM DÜNYASINA ƏL UZADARAQ” Barak Obama prezidentliyinin ilk anlarından İslam dünyasına əlini uzadaraq, onlara rəğbətə əsaslanan dialoq aparmağı, o cümlədən anlaşılmazlıq və inamsızlığı aradan qaldırmaq üçün əməkdaşlıq təklif etmişdir. “Müsəlman aləmi üçün biz qarşılıqlı maraq və hörmət əsasında irəliyə aparan yeni yol axtarışındayıq”, - prezident Obama bu sözləri andiçmə mərasimində səsləndirmişdir. Yeni administrasiyanın ilk günlərindən etibarən prezident əməllərini dediklərilə uzlaşdırmağa başladı. O, dünyada mənfi rəmzə çevrilən və Kubada Quantanamo saxlama məntəqəsini bağlamaq üçün addımlar atmışdır. Əlavə olaraq, o, Amerikanın iki ən mötəbər dövlət xadimlərindən olan keçmiş senator Corc Mitçeli Yaxın Şərq üzrə, uzun illər diplomat kimi çalışan Riçard Holbruku isə Əfqanistan-Pakistan üzrə xüsusi səfir olmağa dəvət etmişdir. O elan etmişdir ki, prezident kimi fəaliyyətinin ilk 100 günü ərzində müsəlman ölkələrindən birinə səfər edəcək. Və müsəlman aləminə açıq ismarış olaraq, prezident Obama mətbuat üçün ilk müsahibəsini ABŞ-dakı əsas xəbərlər qurumlarına deyil, Əl-Ərəbiyyə telekanalına vermişdir. Müsahibəsində o, belə fikir söyləmişdir: “Mənim vəzifəm amerikalılara açıqlamaqdır ki, müsəlmanlar arasında müstəsna insanlar çoxdur və onlar öz həyatlarını yaşamaq və uşaqlarına daha yaxşı həyat qurmaq istəyindədirlər. Mənim işim müsəlman aləminə amerikalıların onların düşməni olmadığını çatdırmaqdır. Biz bəzi hallarda səhvlərə yol vermişik. Biz təkmil olmamışıq”. Amerika ilə İslam dünyası arasında körpü rolunu oynamaq üçün prezident Obama çox münasib şəxsdir. Afrika mənşəli atanın və kanzaslı ananın oğlu olaraq o, öz uşaqlığından bəhs edəndə tez-tez İndoneziyanı, dünyada ən çox müsəlman əhalisinə malik olan ölkəni xatırlayır. O, amerikalılara öz müsəlman qohumlarını, Şərqlə Qərbin, Cənubla Şimalın kəsişməsində olan irsini yada salır. Bu gün Birləşmiş Ştatlar fəxrlə yaşayan bir ölkədir. Doğrudan da amerikalılar özləri ilə fəxr edir, çünki ölkəni qurub-yaradan atalarımızın ali idealları və arzuları reallığa çox yaxınlaşıb. Bir millət olaraq, biz həmin o “daha təkmil birlik” istiqamətində, yəni hər bir oğlun, qızın prezident olmaq imkanını açan mərhələyə qədəm qoymuşuq. Köləlik və ayrı-seçkilik tariximizdə kədərli tərəflər kimi qalır, lakin bu hadisələri keçmişdə qoymaq naminə atdığımız addımlar bizim gücümüzün rəmzidir və sevincimizin səbəbidir. Bu sevincimizi Amerikanın sərhədlərindən uzaqlarda bölüşənlər də olub. Barak Obama ölkənin xarici siyasətində Amerikanın dəyərlərinə sadiq qalacağı haqda vəd vermişdir: “Ümumi müdafiəmizə gəldikdə isə biz təhlükəsizliklə ideallarımız arasında seçim etməyi yanlış hesab edirik. Qurub-yaradan atalarımız bizim təsəvvür etməkdə çətinlik çəkəcəyimiz bəlalarla üzləşiblər, qanunun aliliyi və insan hüquqlarını təmin etmək üçün xartiya tərtib ediblər, o xartiya ki, nəsillərin tökdüyü qanla genişləndirilib. Həmin ideallar hələ də dünyamıza işıq saçmaqdadır və biz onlardan rasionallıq xatirinə imtina etməyəcəyik. Və mən həmçinin ən böyük paytaxt şəhərlərindən atamın doğulduğu kiçik kəndə kimi, bu gün bizi izləyən bütün insanlara və hökumətlərə də üzümü tutub deyirəm: bilin ki, Amerika sülh və şərəfli həyat axtarışında olan hər bir xalqın, kişinin, qadının və uşağın dostudur. Və biz bir daha liderlik etməyə hazırıq”. Bu fikirləri də Barak Obama andiçmə mərasimində söyləmişdir. Amerika Birləşmiş Ştatları Azərbaycanla yanaşı çalışaraq, ekstremist və nifrət daşıyan ideologiyalarla mübarizə aparır. Kosovodan İraqa və Əfqanistana kimi bizim qoşunlar çətinliklərlə üzləşən xalqlara sülh və ədalət qurmaqda kömək edir. İslam Konfransı Təşkilatında müqəddəs İslamın adından ekstremist planlar naminə istifadə edənləri ifşa etmək üçün biz birgə mövqe nümayiş etdirmişik. Qəzzadan Kabilə qədər qızğın münaqişələr və ümumi maliyyə böhranı kimi dünyadakı çağırışların saysız-hesabsız olmasına baxmayaraq, biz birgə işləsək, inkişafa nail olacağıq. Bu, Amerikada yeni günə olan ümidlərdir. Enn DERSİ