ERMƏNİ LOBBİSİ TÜRKİYƏ-İSRAİL MÜNASİBƏTLƏRİNDƏ GƏRGİNLİKDƏN YARARLANMAQ ÜÇÜN HƏRƏKƏTƏ KEÇİB İndi daha çox “Türkiyə bundan nə qazanacaq” sualına cavab axtarılır Türkiyənin baş naziri Rəcəb Teyyub Ərdoğan prezident Şimon Peresin üzünə qarşı İsraili yamanlayan Davos çıxışından sonra ölkəsində və ərəb dünyasında əsl qəhrəmana çevrilib. Ancaq olayın üstündən günlər keçdikdən sonra “Türkiyə bundan nə qazanacaq” sualı da gündəmdə ağırlıq qazanmağa başlayıb. Eyforiya içində olanlar da var, İsraillə münasibətlərin gərginləşməsinin Türkiyənin xeyrinə olmadığını dilə gətirənlər də. İkincilər Türkiyə hökumətinin vaxt itirmədən İsraillə münasibətləri əvvəlki axara qaytarmaq üçün zəruri addımların atılmasını lazım bilirlər və bu səbəbsiz deyil. Pusquda dayanan erməni lobbisi hərəkətə keçib. Erməni lobbisi Davosdakı qalmaqaldan öz xeyri üçün maksimum yararlanmağa çalışır. Onlar bu istəklərini gizlətmirlər də. Erməni Milli və Strateji Araşdırmalar Mərkəzinin rəhbəri Riçard Qiraqosyan İrəvanda mətbuat konfransı düzənləyərək “yəhudi lobbisi Türkiyəyə dəstəyini geri çəkəcək” ifadəsini dilə gətirib. Türkiyə ilə İsrail arasındakı münasibətlərdə yaranan gərginliyin Ermənistanın xeyrinə olacağına eyham vuran Qiraqosyan ABŞ-da “erməni soyqırımın” tanınması üçün münbit şəraitin yetişdiyini irəli sürüb. İrəvandakı bu mətbuat konfransıyla eyni gündə ABŞ-dan maraqlı xəbər gəlib. Amerika Erməni Komitəsi (ANCA) və erməni əsilli ABŞ vətəndaşları yeni kampaniyaya start veriblər. Onlar ABŞ prezidenti Barak Obamanı və ştatlarından seçilən konqresmenləri məktub yağışına tutaraq “erməni soyqırımını” tanımalarını istəyiblər. Respublikaçı konqresmen və erməni dostluq qrupunun həmsədri Mark Krik Konqres və ölkə rəhbərliyinin “erməni soyqırımını” tanınmasına müsbət yanaşdıqlarını bildirib. “Hər zaman erməni soyqırımını gündəliyə gətirmək istədikdə Ağ evdən bizə bildirirdilər ki, ölkə müharibə içindədir, ona görə hələ zamanı deyil” deyən Mark Krik artıq bəhanə üçün əsas görmədiyini və hərəkətə keçmək zamanının yetişdiyini vurğulayıb. Erməni lobbisi və onun dəstəkçiləri “soyqırımı” Konqresə daşımaq üçün münasib zaman seçiblər. Bir tərəfdən ABŞ-da vəzifədə olan ermənipərəstlərin (başda prezident Barak Obama olmaqla vitse-prezident Cozef Bayden, dövlət katibi Hillari Klinton və Nümayəndələr Palatasının sədri Nensi Pelosi ilə Mərkəzi Kəşfiyyat İdarəsinin başçısı Leon Panettaya qədər çoxları “erməni soyqırımını tanıyacağıq” vədi verib) sayı artıb, digər tərəfdən erməni lobbisinin planlarını pozan yəhudi lobbisi Ərdoğandan üz döndərib. ABŞ-dakı erməni lobbisinin yəhudilərlə təmasa keçmələri haqda xəbərlər gəlir. Yəhudi lobbisinə “Türkiyəyə qarşı eyni mövqedən çıxış edək” ismarıcları ünvanlanır. Erməni lobbisi qısa müddətdə hədəfinə çatmaq arzusundadır. Zaman onları sıxır. Çünki Ankara da boş dayanmayıb. Türkiyəli rəsmilər və diplomatlar Ərdoğanın Davosdakı çıxışının nəticələrini yumşaltmağa çalışırlar. Ərdoğan və prezident Abdulla Gül İsraillə əvvəlkitək sıx münasibətlərdə maraqlı olduğunu söyləyir, türkiyəli diplomatlar ABŞ-dakı yəhudi lobbisi təmsilçiləriylə təmaslara hazırlaşırlar. Türkiyə Millət Məclisindən nümayəndə heyətinin də Amerikaya səfəri planlaşdırılır. Onlar da yəhudi lobbisinin təmsilçiləri və konqresmenlərlə görüşəcəklər. Erməni lobbisi məhz buna görə tələsir. Lobbi Ankaranı qabaqlamaq istəyir. «Atlas» Araşdırmalar Mərkəzi