HATƏMİ PREZİDENT SEÇKİLƏRİNƏ QATILIR

SON XƏBƏRLƏR

HATƏMİ PREZİDENT SEÇKİLƏRİNƏ QATILIR

2021.10.20, 07:36

Gunaz.tv

HATƏMİ PREZİDENT SEÇKİLƏRİNƏ QATILIR O, ölkədə kifayət qədər populyardır, ancaq ayətullahlar onun seçilməsinə çətin ki, imkan versinlər

İranda eks-prezident Məhəmməd Hatəmi prezident seçkilərinə qatılmaq qərarına gəlib. “Fars” agentliyinin məlumatına görə, 1997-2005-ci illərdə İran prezidenti olmuş Hatəmi artıq seçki qərargahının formalaşdırılması haqda tapşırıq verib. Onun qərargahına islahatçı qanaddan olan bir çox tanınmış siyasətçilərin daxil olacağı gözlənilir. Bildirilir ki, Hatəminin bu ilin yayında keçiriləcək prezident seçkilərinə qatılacağı hələ əvvəldən gözlənilirdi, ancaq o, yekun qərarını bir gün əvvəl elan edib. Hatəmi son vaxtlar prezident Mahmud Əhmədinejadın siyasətini tez-tez tənqid edirdi və onun hakimiyyəti dövründə xüsusilə iqtisadi sahədə pisləşən vəziyyəti xatırladırdı. Ekspertlər hesab edirlər ki, Hatəminin seçkilərə qatılması seçki kampaniyası zamanı əlavə intriqalar yaradacaq. Belə ki, onun prezident Əhmədinejada ciddi rəqib olacağı gözlənilir. Əhmədinejad hələlik rəsmən ikinci müddətə prezident olmaq niyyətini açıqlamayıb, ancaq onun belə qərar verəcəyinə şübhə yoxdur. Gözlənilir ki, Əhmədinejad da seçkilərə qatılacağı haqda qərarını yaxın günlərdə açıqlayacaq. Hatəmiyə gəldikdə isə o, prezidentliyi dövründə İranda kifayət qədər populyar idi. Lakin onun vəd etdiyi islahatların böyük hissəsi reallaşmadı. Bu isə islahatçılara ümidlərini bağlayan seçiciləri məyus edir. Məlumatlara görə, İrandakı prezident seçkilərində iştiraka həmçinin keçmiş daxili işlər naziri Mustafa Pur Məhəmmədi də hazırlaşır. Digər əsas namizədlərdən biri də İran parlamentinin keçmiş spikeri Mehdi Karrubidir. Ancaq Hatəminin hakimiyyəti dövründə onun vitse-prezidenti olmuş Məhəmməd Rza-Aref də seçkilərə qatılmağa hazırlaşır. Bu isə göstərir ki, islahatçıların düşərgəsində parçalanmalardan qaçmaq çətin olacaq. Hazırda islahatçılar İran parlamentində zəif təmsil olunublar, çünki seçkilər zamanı ayətullahlardan ibarət şura onların çoxunun namizədliyinin təsdiq olunmasına icazə verməyib. Mühafizəkarlar hesab edir ki, Hatəmi və onun başçılıq etdiyi islahatçı qüvvələr İranın milli maraqlarını kifayət qədər qorumayıb. Buna görə də Hatəminin seçkilərdə qalib gəlməsi ehtimalı indi çox aşağı hesab edilir. Hər şeydən əvvəl ayətullahlar onun seçilməsinə imkan verməzdi. Doğrudur, İranın dini rəhbərliyi Əhmədinejadın iqtisadi siyasətindən heç də razı deyil, ancaq buna baxmayaraq, xüsusən nüvə məsələsində onun göstərdiyi fəaliyyətlər dəstəklənir. İran Konstitusiyasına görə, prezident dövlətin ikinci şəxsi hesab olunur. Ali hakimiyyət isə dini liderə məxsusdur. Xəbər xidməti musavat

GUNAZ.TV

SON XƏBƏRLƏR