Ermənistan müəyyən manevrlərlə danışıqlar prosesini uzatmaq istəyir

SON XƏBƏRLƏR

Ermənistan müəyyən manevrlərlə danışıqlar prosesini uzatmaq istəyir

2021.10.20, 07:36

Gunaz.tv

“Ermənistan müəyyən manevrlərlə danışıqlar prosesini uzatmaq istəyir”

Novruz Məmmədov: “Ermənistan fəlakətli bir situasiya ilə üzləşəcək” “Müsahibələrində Sürix görüşünü şərh edən prezident İlham Əliyev bildirib ki, danışıqlar prosesində müəyyən irəliləyişlər var, amma bu irəliləyişlər kifayət qədər deyil. Məsələnin mahiyyəti bundan ibarətdir ki, münaqişənin həlli ildə bağlı danışıqlar prosesində tam razılaşma əldə olunmasa, detallar haqqında bir söz demək mümkün deyil”. Bu eksklüziv açıqlamanı APA-ya Prezidentin İcra Aparatının beynəlxalq əlaqələr şöbəsinin müdiri Novruz Məmmədov verib. Onun sözlərinə görə, Dağlıq Qarabağ münaqişəsinin nizamlanmasına dair aparılan danışıqların əsas məqsədi münaqişənin tam həllini ortaya qoymaqdır: “Yəni məqsəd Azərbaycanın ərazi bütövlüyü çərçivəsində Dağlıq Qarabağın statusunu müəyyənləşdirmək, qaçqınların hamısını öz doğma yurd-yuvalarına qaytarmaq, Azərbaycan torpaqlarını işğaldan azad etməkdir. Ona görə də tam razılaşma əldə olunmadığı üçün dəqiq bir şey demək mümkün deyil. Müəyyən mənada onu deyə bilərəm ki, Ermənistan rəhbərliyi yenə də müəyyən manevrlər, diplomatik addımlar ataraq, danışıqlar prosesini uzatmaq istəyir”. Novruz Məmmədov Ermənistan rəhbərliyinin Dağlıq Qarabağdakı separatçı rejimin rəhbərləri ilə görüşdən sonra söylədikləri “Dağlıq Qarabağın Azərbaycanın tərkib hissəsi olması mümkün deyil” fikirlərini belə şərh edib: “Ermənistanın müstəqillik dönəmində bütün rəhbərləri hakimiyyətə yalnız Dağlıq Qarabağ münaqişəsinin fövqündə, bu münaqişənin dalğasında gəliblər. Ona görə də onlar bir növ özlərini və təəssüf ki, ölkəni və xalqı da bu münaqişənin girovuna çeviriblər. Bu gün onların əsas məqsədlərindən biri bu danışıqlar prosesini uzadaraq, özlərinin hakimiyyətdə qalmaqlarını təmin etməkdir. Amma çox təəssüflər olsun ki, bu rəhbərlər son bir neçə il ərzində erməni xalqı və milləti üçün çox böyük fəlakətli bir gələcək hazırlayırlar. Ona görə ki, onlar indiki vəziyyətdən, ən azı ötən il baş verən proseslərdən dərs götürmürlər. Onlar başa düşmürlər ki, bu qəyyumluq əbədi deyil, ölkələrdə, regionlarda heç bir vaxt bir şey sabit qalmır, hər şey dəyişir. Amma bir gün bu qəyyumluq öz qüvvəsini itirsə, Ermənistan bir zamanlar Ter-Petrosyanın dediyi kimi, fəlakətli bir situasiya ilə üzləşəcək. O zaman Ermənistanın yalvarışlarına da heç kim diqqət yetirməyəcək. Amma çox təəssüf ki, hələlik Ermənistan rəhbərləri bunu dərk etsələr də, bu istiqamətdə addım ata bilmirlər. Ermənilər çox yaxşı bilirlər ki, bu 20 il ərzində heç bir ölkə, Azərbaycan torpaqlarında yaradılmış qondarma qurumu tanımayıb, bundan sonra da heç vaxt tanımayacaq. Ona görə də, onlar ölkə əhalisi qarşısında müəyyən bir divident toplamaq üçün belə cəfəng bəyanatlar verir, özlərini və ölkə əhalisini sakitləşdirirlər”.

GUNAZ.TV

SON XƏBƏRLƏR