"Abbasəli Həsənov səlahiyyətlərini aşıb" Vəfa Quluzadə: "Səfir öz işi ilə məşğul olmalıdır" -Bu dəfə mən hesab edirəm ki, səfir səhvə yol verərək siyasətə qarışdı. Siyasət onun işi deyil... ABŞ-da keçirilən prezident seçkiləri zamanı Barak Obamanın Cənubi Azərbaycanda milyonlarla azərbaycanlının hüquqlarının pozulması ilə bağlı fikirlər səsləndirəsi və hakimiyyətə gəldiyi təqdirdə bu məsələnin də diqqətində olacağını bəyan etməsi rəsmi Tehranda narahatçılıqla qarşılansa da, seçkilər dönəmində İranın "molla rejimi" bu məsələnin üstündən sükutla keçməyə çalışdı. Lakin Barak Obamanın prezident seçilməsi və artıq yeni komandanın formalaşdırılması istiqamətində fəaliyyətə başlaması onun prezident kimi işə başladıqdan sonra bu məsələnin üzərinə bir daha qayıdacağını istisna etmədiyindən İrandakı "molla rejimi" bu məsələyə müxtəlif istiqamətlərdən müdaxilə etməklə onu gündəmdən çıxarmağa çalışır. Azərbaycanın İrandakı səfiri Abbasəli Həsənovun son açıqlamasında Cənubi Azərbaycanla bağlı səsləndirdiyi fikirlər, xüsusilə də AXC hakimiyyəti dönəmində bu məsələyə həssas yanaşılmasını sərt tənqid etməsi diqqətdən qaçmadı. Onu da qeyd edək ki, Abbasəli Həsənov Azərbaycanın xarici siyasət kursunda Cənubi Azərbaycan məsələsinin olmadığını bəyan etməklə bir növ İran tərəfinin narahatçılığını sakitləşdirməyə çalışsa da, siyasi məsələlərlə bağlı açıqlama verməklə o, diplomatiya qaydalarını pozdu. Xəzər Araşdırmalar Fondunun prezidenti, politoloq Vəfa Quluzadə də səfirin öz səlahiyyətlərini aşdığı qənaətindədir. "Səfir öz işi ilə məşğul olmalıdır. Səfir siyasətçi deyil. Səfir bir diplomat kimi mərkəzdən gələn tapşırıqları yerinə yetirir. Amma bu dəfə mən hesab edirəm ki, səfir səhvə yol verərək siyasətə qarışdı. Siyasət onun işi deyil"- söyləyən politoloq bildirib ki, Azərbaycan xalqı parçalanmış xalqdır və parçalanmış xalqlar da bir gün birləşməlidir. "Bu da hər kəsə aydın məsələdir. Dünyada heç bir şey əbədi qalmır. Baxmayaraq ki, hamı deyirdi ki, Almaniyanın ayrılığı əbədidir, amma Almaniya birləşdi. Ona görə də mən düşünürəm ki, zamanı gəldikcə bütün parçalanmış xalqlar birləşəcək. Səfir isə belə məsələlər barədə danışmamalıdır. Səfir o vaxt bəyanatlar verə bilər ki, ona bu barədə mərkəzdən göstəriş verilsin. Mən inanmıram ki, mərkəzdən səfirə belə bir göstəriş verilə bilər". Politoloq həmçinin Barak Obamanın Cənubi Azərbaycan məsələsini qaldırmasına da toxunub. Onun fikrincə, Obamanın bu bəyanatından sonra Azərbaycanın İrandakı səfirinin bu ölkənin maraqlarına uyğun siyasi açıqlamalar verməsinin özü də kifayət qədər diqqətçəkən məqamdır. "Burada bir incəlik var. Azərbaycanın İrandakı səfiri uzun müddət İran səfirliyində tərcüməçi işləyib. Ola bilsin ki, ona o zamandan İran tərəfindən təsirlər var. Görürsünüzmü, bizim ABŞ-dakı, Almaniyadakı, Fransadakı səfirlərimizi. Onlar diplomatiya ilə məşğuldurlar. Hər səfir durub bir siyasi bəyanat versə, onda diplomatiya işlərini kim həyata keçirəcək? Dövlətçilikdə səfirin siyasətə qarışması yoxdur. Azərbaycanın İrandakı səfiri isə bu qaydaları pozub". Vüsalə Rafiqqızı sherg