“İRANDAKI SƏFİR GERİ ÇAĞIRILMALIDIR” Zəlimxan Məmmədli: “Abbasəli Həsənovun fikirləri yalnız Elçibəyin şəxsiyyətinə qarşı yönəlməyib” Azərbaycanın İrandakı səfiri Abbasəli Həsənovun açıqlamaları sərt reaksiyalar doğurub. Xəbər verildiyi kimi, diplomatın əvvəlcə İranın “Mehr” agentliyinə, sonra isə Azərbaycan mətbuatına açıqlamasında İran-Azərbaycan münasibətlərindəki problemlərə görə Elçibəy hakimiyyətini ittiham etməsi ciddi etirazlara səbəb olub. Qeyd edək ki, Elçibəy hakimiyyəti dönəmində Azərbaycanı İranda təmsil etmiş Nəsib Nəsiblidən sonra bu postu tutan Əliyar Səfərli də A.Həsənovu sərt tənqid edib. Ə.Səfərli “Abbasəli Həsənov əslində Azərbaycanın yox, İranın səfiridir” deyib. Ekspertlərin fikrincə, İrandakı səfir haqqında ölçü götürülməlidir. Lakin dünən Xarici İşlər Nazirliyindən səfirin dediklərinə münasibət öyrənə bilmədik. Klassik Azərbaycan Xalq Cəbhəsinin Ali Məclisinin sədri Zəlimxan Məmmədli isə bizimlə söhbətdə bildirdi ki, Azərbaycanı xaricdə təmsil edən şəxsin ilk növbədə milli problemlərə milli təəssübkeşlikdən yanaşması çox önəmlidir: “Azərbaycanın təmsilçilərinin diplomatik missiyasında Azərbaycan dövləti və xalqının maraqlarının təmin olunması əsas xətti təşkil etməlidir. Bu açıqlamaları verən səfirimizin dünyagörüşünün kifayət qədər yetərli olmadığı qənaətindəyəm. 35 milyonluq Azərbaycan türkünün səsi hər gün zindanlardan gəlir, insanlar təqib olunur, milli-mənəvi haqları əlindən alınır. Səfir isə hətta İranın bu cür davranışında Elçibəyi günahlandırır. Bunun özü, açığı, siyasi axmaqlıqdır”. Z.Məmmədli insan haqları məsələsinin heç bir ölkənin daxili işi olmadığını xatırlatdı: “İnsan haqqı heç bir dövlətin daxili işi ola bilməz, o, ümumbəşəri dəyərdir və bu dəyərlər qorunmalıdır. Bu baxımdan Elçibəy, təbii ki, 35 milyonluq Azərbaycan türkünün maraqlarının qorunmasına qarant olmaq istəyirdi və Güney Azərbaycandan olan milli mücahidləri açıq şəkildə dəstəkləyirdi. Bizim səfirliyimiz isə milli maraqlarımıza xidmət edənləri aşağılamaqla fars şovinizminə xidmət edir”. KXCP yetkilisi səfirin dediklərinə ciddi reaksiya verilməsini zəruri sayır: “Bu açıqlamaya Xarici İşlər Nazirliyi səviyyəsində mövqe bildirilməlidir”. Zəlimxan bəy eyni zamanda bu kimi insanların Elçibəyi ittiham etməyə heç bir mənəvi-hüquqi əsası olmadığını dedi: “Ona görə ki, Elçibəy əxlaqı, Elçibəy dünyagörüşü ilə bunlarınkı daban-dabana ziddir. Bunların Elçibəyi dərk eləməsi üçün ən azı mahiyyətcə türk olmaları lazımdır”. Z.Məmmədli milli düşərgə təmsilçilərinin A.Həsənovun geri çağırılması tələbini qoymasını da məntiqli sayır: “Abbasəli Həsənovun fikirləri yalnız Elçibəyin şəxsiyyətinə qarşı yönəlməyib. O, 35 milyonluq Azərbaycan türkünün istiqlal mübarizəsinə balta vurub. Elçibəy şəxsiyyətinə qarşı olan təzyiqlərin fəlsəfəsində milli azadlıq, bütövlük və istiqlal mübarizəsini boğmaq məqsədi durur. Bu baxımdan, təbii ki, belə insanların Azərbaycanı hər hansı formada təmsil etməsi qeyri-mümkün sayıla bilər. Belə olan təqdirdə onun geri çağırılması üçün prosesin başlanması tam məntiqlidir”. Cavid TURAN musavat