AKP hökuməti Türk Birliyinə zərbə vurur Türkiyə 16 ilə yaxındır ki, Ermənistanla sərhədlərini bağlayıb. Səbəb isə Ermənistan silahlı qüvvələrinin Azərbaycanın 20 faiz torpaqlarını işğal etməsi və hələ də bu işğalçılığından əl çəkməməsidir. Ötən 16 ildə Türkiyədə prezidentlər və hökumət başçıları bir-birini əvəzləyib, ancaq Azərbaycanın maraqlarını qurban verməyiblər, vədlərinə xilaf çıxmayıblar. Hadisələrin gedişatı göstərir ki, belə davam edərsə, Türkiyənin indiki hakimiyyəti, yəni AKP hökuməti Ermənistanla sərhədləri açacaq. Baxmayaraq ki, Türkiyənin rəsmiləri Ermənistanla qurulan əlqələr və aparılan danışıqlar zamanı ən başlıcası Azərbaycanın Dağlıq Qarabağ probleminə üstünlük verildiyini bildirirlər, gedişat isə başqa məqamların olduğunu diqtə edir. Arzu Şirinova Ekspertlər belə fikirdədirlər ki, artıq Türkiyənin indiki hakimiyyəti özlərinin dövlət maraqlarını (?) əsas götürürlər. Bu maraqlara görə isə, Avropa Birliyinə üzv olunmaq üçün zəmin hazırlanmalı, Ermənistanla sərhədlər açılmalı, iqtisadi əlaqələr qurulmalı, Cənubi Qafqazda Türkiyənin nüfuzu artırılmalı və s. xxx Bunun üçün Türkiyə Ermənistana doğru bir-birinin ardınca qarşılıqsız addımlar atmaqda davam edir. Türkiyənin baş naziri Rəcəb Tayyib Ərdoğanın dediyi kimi, AKP hakimiyyətə gələndən üzü bəri 70 min erməni miqrant Türkiyənin ayrı-ayrı şəhərlərində çalışır, ticari əlaqələr qurulub, hava reysləri fəaliyyyət göstərir. 70 milyonluq osmanlı türkünün başında duran prezident Abdulla Gül 3 milyon erməninin rəhbəri olan Serj Sərkisyanın futbol yarışını izləmək dəvətini qəbul edib onun hüzuruna gedib. Bunun ardınca artıq Ermənistanla diplomatiq əlaqələr qurulur. Eyni zamanda kommunikasiya xətlərinin və sərhədlərin açılması istiqamətində işlər getdiyi haqqında məlumatlar verilir. Türkiyə hakimiyyəti atdığı qarşılıqsız addımları "böyük siyasət" adlandırsa da, hiyləgər ermənilər türkün iradəsini qırdıqlarını, türkün siyasətini endiklərini güman edirlər. Bu gümanlar isə bu və digər açıqlamalarda özünü göstərir. xxx Xatırlayırsınızsa, bu ilin sentyabrın 2-də Dağlıq Qarabağdakı separatçı rejim yaranmasının 17-ci ildönümünü qeyd etdilər. Elə həmin gün Ermənistan prezidenti Serj Sərkisyan separatçılara və burada yaşayan əhaliyə təbrik məktubu göndədi. Məktubda Sərkisyan bildirirdi: "Bu "bayram" həm sizin, həm də müharibədə ölmüş ermənilərin birgə "bayramı"dır. Hörmətli arsaxlılar, siz bu sınaqdan uğurla çıxdınız və bu gün özünüzün azad dövlət quruculuğu, onu müdafiə etmə, iqtisadi və ictimai fəaliyyətinizlə bunu bir daha nümayiş etdirirsiniz". Məktubdakı bu fikirlər təsdiqləyir ki, Serj Sərkisyan heç vaxt erməni niyyətindən əl çəkməyəcək, Dağlıq Qarabağın ədalətli həllini danışıqlar mövzusuna çevirməyəcək, "soyqırım" iddasından isə imtina etməyəcək. Türkiyənin hazırda Ermənistanla bağlı apardığı siyasətin məğzinə erməni politoloqlar qiymət verib. Məsələn, Ruben Safrastyan bildirib ki, Türkiyə Ermənistanla əməkdaşlığı Azərbaycanla qardaşlıqdan üstün tutur: "Azərbaycan o ölkə deyil ki, Türkiyə ona görə milli maraqlarını qurban versin". Aleksandr İskəndəryan isə deyir ki, Türkiyə Cənubi Qafqaza girmək istəyir və ona görə də siyasətində dəyişikliklər edir: "Belə demək olarsa, qabaqlar Türkiyənin Qafqaz siyasəti çox primitiv olub. Ankarada düşünürdülər ki, Gürcüstanla qonşuluq, onunla ticarət etməliyik, Azərbaycan da qardaşlarımızdır, onları dəstəkləyəcəyik, ermənilər isə pisdirlər, onları təcrid edəcəyik. Bu, ciddi siyasət deyil". İskəndəryanın məntiqinə görə, Türkiyə Cənubi Qafqaza Ermənistanla əlaqələri qurmaqla girir. xxx Ermənilərin nə söyləməsindən asılı olmayaraq Türkiyədə Ermənistanla isti münasibətlər qurulmaqda davam edir. Daha doğrusu qurulan münasibətlərə yeni çalarlar qatılır. Xatırlayırsınızsa, Qarsda "Türkiyə-Ermənistan dostluğu" şərəfinə abidə ucaldılacağı barədə məlumat vermişdik. Eyni zamanda bildirmişdik ki, bir insanın ikiyə bölünmüş və onların arasında qanlı yaş axıdan göz fiqurunu əks etdirən heykəl Qars qalasının qarşısında inşa olunduğu üçün Ermənistandan da görünəcək. 135 metr hündürlükdə olacaq "İnsanlıq anıtı" adlanan abidənin müəllifi əslən türk olan Mehmet Aksoydur. Maraqlıdır ki, inşasına 350 min lirə xərclənən heyəkəlin ucaldılmasında Qars bələdiyyəsinin sədri Naif Əlibəyoğlu xüsusi təşəbbüs göstərib. Onu da qeyd edək ki, Azərbaycanın Qarsdakı baş konsulu Həsən Zeynalovun müdaxiləsindən sonra abidənin tikintisi hələlik dayandırılmışdı. Ancaq bir müddətdən sonra abidənin inşası davam etdirildi. Artıq bu abidə hazırdır. Bu barədə məlumat verən Həsən Zeynalov eyni zamanda əlavə edib ki, əvvəl Türkiyənin mövcud sərhədlərini tanıyana, ərazi tələbi və soyqırım iddialarından əl çəkənə, Dağlıq Qarabağı azad edənə qədər Ermənistanla masaya oturmamaqdan söhbət gedirdisə, bu gün artıq oturulur. Tarixi faktlara əsaslanaraq deyə bilərik ki, ermənilər elə təkcə Qarsda 100 minlərlə azəri türkünün qanını töküb. Qocaya, qadına, uşağa aman verməyərək onları diri-diri torpağa basdırıblar, başlarını kəsiblər, dərilərini soyublar. Ancaq bu gün Qars sakinlərindən bəziləri, hətta onlar arasında yaşlılar belə Türkiyə ilə Ermənistan sərhədlərinin açılmasını məqbul sayırlar. Səbəbini isə bu cür izah edirlər: "Burda nə pis iş var ki? Ticari əlaqələr qurular, insanlar sıxıntıdan qurtararlar". Deməli ticari əlaqələrə görə, bir millət başına gətirilən faciələri unutmalıdır? Və yaxud erməni ilə alış-verişə görə, türk digər türk qardaşının bu günə kimi çəkdiyi zülmləri-20 faiz torpağının işğal olunmasını, bir milyondan artıq qaçıqın və məcburi köçkünlərin acı talelərini, Xocalı soyqırımını və daha nələri yaddaşından silməlidir? Qarslılar görəsən ermənilərin hansı işlərinə rəğmən onlarla dostlaşmaq fikrinə düşüblər? Politoloq Qabil Hüseynlinin bilgisinə görə, Qars bələdiyyəsi milliyyətcə kürddür. O, hədsiz ermənipərəst və Türkiyənin maraqlarına o qədər də məhəl qoymayan birisidir. Uzun müddətdir ki, Türkiyə hökumətindən Qars-Gümrü dəmiryol xəttinin açılmasını tələb edir. Qars bələdiyyəsi hətta Bizans dövründən qalma abidələri təmir etdirərək onları erməni mədəniyyətinə aid etməyə çalışır. Türkiyənin ermənilərə qarşılıqsız münasibətləri bununla bitmir. Bir müddət əvvəl Türkiyənin Van gölünün Akdamar adasında erməni kilsəsi açıldı. Və bu açılış törəninə Türkiyənin Mədəniyyət və Turizm Nazirliyinin nümayəndələri də qatıldılar. Bunun ardınca Türkiyənin Mədəniyyət və Turizm Nazirliyinin hazırladığı "Türk dünyası milli marşları" audiodiskinin qapağındakı xəritədə Naxçıvan, Dağlıq Qarabağ, Kəlbəcər və Laçın Ermənistan torpaqları kimi göstərildi. Nazirliyin incəsənət bölməsinin rəhbər işçisi Bayram Bilge Toker Azərbaycan tərəfinin rəsmi etirazından sonra özlərini bu cür müdafiə etdi: "Bu qapağı hazırlayan dizayner erməni deyil. Hətta millətçiliyi ilə tanınan bir işçimizdir. Xəritədə xırdalıqlar o qədər də bilinmir. Bu, dizayner üçün xırdalıqları o qədər də əhəmiyyətli olmayan kiçik bir xəritədir. Coğrafi olaraq çəkilmiş bir xəritə deyil. Amma lazım gəlsə, xəritəni dəyişdirə bilərik". Türkiyə Mədəniyyət və Turizm Nazirliyinin əməkdaşının "əhəmiyyəti olmayan kiçik bir xəritə" adlandırdığı bu olaydan sabah ermənilər öz maraqları baxımından yetərincə istifadə edəcəklər. Bütün dünyaya bildirəcəklər ki, hətta Azərbaycanın qardaş adlandırdığı Türkiyədə nə Naxçıvan, nə Dağlıq Qarabağ, nə Kəlbəcər, nə də Laçın Azərbaycan ərazisi kimi tanınmır. Sonda erməni politoloq Ruben Safrastyanın vaxtilə söylədiklərini bir daha xatırladıram: "Türkiyə Ermənistanla əməkdaşlığı Azərbaycanla qardaşlıqdan üstün tutur. Azərbaycan o ölkə deyil ki, Türkiyə ona görə milli maraqlarını qurban versin". Bu gün Türkiyədə aparılan siyasət Böyük Mastafa Kamal Atatürkün təməlini qoyduğu siyasət deyil. Bu siyasət dindən siyasi məqsədləri üçün istifadə edən AKP hökumətinin siyasətidir ki, təməlsiz, prinsipsiz və bu gün üçün bərli-bəzəkli, sabaha vurulan zərbədir. Əgər qarşısı alınmasa, zərbələrin acılarını isə bütün Türk Dünyası yaşamalı olacaq.