Nüvə müharibəsi dünyanın qapısını döyür Rauf Mirqədirov: "İqtisadi böhranın yaşandığı bir vaxtda beynəlxalq münasibətlərdə avantürist meyllər artır" Pentaqon 2011-ci ilə qədər ABŞ ərazisinə kütləvi qırğın silahları ilə edilən mümkün hücumlara qarşı 20 min nəfərlik hərbi kontingent formalaşdırır. Pentaqon nümayəndəsi general Viktor Renuar deyib ki, bununla bağlı üç çevik qruplaşma yaradılacaq. Onlardan biri artıq hazırdır və Corciya ərazisində yerləşdirilib. Məlumata görə, ötən həftə müdafiə naziri Robert Geyts tabeçiliyindəki şəxslərə ölkənin silahlı qüvvələrinin ABŞ daxilində fəlakətli nəticələrə səbəb olacaq mümkün hücumlara qarşı hazırlığını yoxlamağı tapşırıb. Nazir deyib ki, konqresin ötən il yaratdığı komissiyanın gəldiyi nəticəyə görə, milli qvardiyanın və rezervistlərin sayı ABŞ-a qarşı mümkün nüvə, kimyəvi və bakteroloji hücumun nəticələrini aradan qaldırmağa kifayət deyil. Tural Qeyts tapşırıb ki, təcili olaraq ölkənin kütləvi qırğın silahlarından qorunması üçün tədbirlər planı hazırlansın. Məsələ ilə bağlı fikirlərini öyrəndiyimiz politoloq Rauf Mirqədirov ABŞ-ın belə addım atmasını təbii saydı. O, bu ölkənin nüvə müharibəsinə hazırlaşmadığını da bildirdi. Pentaqonun ABŞ-da xüsusi kontingenti yerləşdirməsi planı ehtiyat tədbirləridir və bu kimi addımlar çoxdan atılmalı idi: "Ümumiyyətlə, dünyada nüvə silahının mövcudluğu təhlükədir. Son hadisələr göstərdi ki, bu cür silahlara malik ölkələr öz məsuliyyətlərini kifayət qədər dərk etmirlər. Bir sıra hallarda bu dövlətlər hərbi avantüralara baş qoşurlar və bu da dünya üçün ciddi təhlükədir. Hər hansı hərbi avantüra zamanı heç də həmişə vaxtında dayanmaq mümkün olmur. Müharibənin özünün məntiqi var. Bu isə cavab və əks-cavab məntiqidir. Müharibə başlayanda cavab və əks-cavab prinsipi işə düşür və nəticə etibarilə doğrudan da münaqişəyə cəlb olunmuş dövlətlər bütün arsenallarından istifadə etmək məcburiyyətində qalır. Yəni bir anlıq təsəvvür edək ki, nüvə silahına malik ölkəyə hücum olur və o da bu təcavüzə cavab vermək məcburiyyətində qalır. Amma həmin ölkə artıq gözləmədiyi "qonağı" qapıda deyil, evinin içində qarşılayıb. Bu zamana həmin dövlət tamam məhv olmamaq üçün nüvə silahından istifadə etmək məcburiyyətində qalacaq ki, bu da faciədir. Əgər hücum edən dövlətin də nüvə silahı varsa onun əks-cavabı dünyanın məhvi ola bilər. Bu mənada nə qədər ki, nüvə silahı var bu silahdan istifadə təhlükəsi də qalacaq". Rauf Mirqədirovun sözlərinə görə, hətta nüvə dövlətləri onu da gözəl anlayırlar ki, bu silahdan istənilmədən də istifadə oluna bilər. Çünki mürəkkəb kompüter sistemlərilə işləyən bu silahların yerləşdiyi obyektlər adi texniki səhvdən böyük fəsadlar yaradar. Məsələnin digər tərəfi isə odur ki, müasir elmi texnologiyalar kifayət qədər ciddi inkişaf edir. Bunun nəticəsində də artıq daha çox dövlətlər nüvə silahına malik olmağa çalışırlar. Digər tərəfdən, bu silah təkcə dövlətlərin deyil, qeyri-dövlət qurumlarının da əlinə keçə bilər. Hətta terror təşkilatlarının əlinə keçən bu silahdan istifadə qlobal nüvə müharibəsinə də gətirib çıxarar: "Ümumiyyətlə, son dövrlərdə ABŞ-ın fəaliyyətinə və siyasətinə nəzər salsaq görərik ki, onlar məhz nüvə başlıqlı raketlərin hücumundan müdafiə sistemlərinin yerləşdirilməsindən geniş istifadə edirlər. Üçüncü mövqe rayonunun Avropada yerləşdirilməsi və onun ətrafında olan müdafiə sistemləri də bunun göstəricisidir. Bu mənada Pentaqonun 2001-ci ildən ABŞ ərazisində xüsusi kontingent formalaşdırması təəccüb doğurmamalıdır və bu nüvə müharibəsinə hazırlıq kimi qiymətləndirilməməlidir. Dünya dəyişir, nüvə silahlarına malik olmaq indi əvvəlkindən daha asan görünür. Ona görə də ABŞ gələcəkdə ciddi faciələrin baş verməməsi üçün qabaqlayıcı tədbirlərə əl atır. Kim deyə bilər ki, hansısa terror təşkilatı nüvə silahına malik ola bilməz və bunu Vaşinqtona yönəltməz? Nə qədər ki, bu silah ləğv olunmayıb və dünyada olan nüvə silahları üzərində tam nəzarət yoxdur sözsüz ki, ABŞ nüvə hücumu təhlükəsi ilə yaşayacaq. Xüsusən də indiki vəziyyəti nəzərə alsaq ABŞ-ın atdığı addımlarda haqlı olduğunu görərik. Yəni dünyanın siyasi arenasında ölkələr sanki etibarsızlıq, inamsızlıq və gözlənilməz addımlar atırlarmış kimi görünürlər". Politoloq kimsənin Pakistan və Hindistan kimi daxili və qarşılıqlı konfliktlər yaşayan dövlətlərin də nə vaxtsa nüvə silahına əl atmayacaqlarına təminat verə bilməyəcəyini dedi. Bu kimi proseslər də nəinki ABŞ-ı, digər ölkələri də nüvə hücumundan müdafiə sistemlərini quraşdırmağa vadar edir. İsrail nüvə silahına malik olduğunu rəsmən təsdiqləməsə də, bu ölkədə belə kütləvi qırğın silahının olduğu hamıya məlumdur. Nəzərə alsaq ki, Təl-Əvivin ərəb ölkələrilə işləri qaydasında getmir, o zaman nə vaxtsa yəhudilərin də bu silahın düyməsini basacağını demək olar. Hətta bir sıra terror təşkilatlarının zaman-zaman bu cür silahları əldə etməyə çalışması yaxın tariximizdə görünüb. Yaponiyada zəhərli qazlardan istifadə edən belə təşkilatlardan biri bu ölkədə metroda xeyli sayda insanın həyatına son qoydu. Digər tərəfdən, iqtisadi böhranın yaşandığı bir vaxtda beynəlxalq münasibətlərdə avantürist meyllər artır. Bəzi dövlətlər öz daxili problemlərini arxa plana çəkmək üçün partnyorları ilə münasibətləri kəskinləşdirməkdən belə çəkinmirlər. Bununla da həmin ölkələr xarici düşmən obrazını yaratmağa çalışır. Bunu ABŞ və Rusiyanın xarici siyasətində gördük. Bir sözlə, ABŞ dünyanın yeni düzənində olan siyasi hadisələrə baxıb özü üçün nəticələr çıxarır".