ABŞ-ın ermənipərəst damarı tərpənir Daniel Frid Ermənistanda Brayzanı danır, türk-erməni münasibətlərinin normallaşacağına ümid bəsləyir, Medvedyev İrəvana gəlir, işğalçı ölkədə NATO təlimi başlayır Ehtiyat edilən, gözlənilən baş verdi. Dağlıq Qarabağ münaqişəsinin həllində Azərbaycanın ərazi bütövlüyü prinsipinin əsas götürülməli olduğu yönündə ABŞ-ın vitse-prezidenti Riçard Çeyninin, ATƏT-in Minsk qrupunun amerikalı həmsədri Metyu Brayzanın bəyantları korrektə olunub. Ermənistanda səfərdə olan dövlət katibinin müavini Daniel Frid Metyu Brayzanın İrəvanın Azərbaycanın ərazi bütövlüyünü tanımasının zəruri olduğunu söyləmədiyini iddia edib. Baxmayaraq ki, amerikalı həmsədrin BBS radiosunun rus bölməsinə rus dilində verdiyi müsahibəyə istənilən şəxs indi də qulaq asa bilər. Daniel Frid deyib ki, ABŞ ərazi bütövlüyü prinsipini vacib sayır, hətta bu prinsipdən başlamaq barədə danışır, ancaq heç vaxt bəyanlanmayıb ki, bu, yeganə prinsipdir. Rəvan Məmmədli Başqa sözlə, ərazi bütövlüyü ilə xalqların öz müqəddəratını təyin etmə amerikalılar üçün bərabər hüquqlu prinsiplərdir. Münaqişənin həlli də bu iki prinsipin uyğunlaşdırılmasından keçir. Dövlət katibinin müavini erməniləri sakitləşdirməyə də çalışıb. Sözü də bu olub ki, Azərbaycan münaqişənin hərbi yola həllinin mümkünsüzlüyünü çox yaxşı başa düşür. O, Vaşinqtonun Qarabağ probleminin Minsk qrupunun mövcud formatında həllini dəstəklədiyini də söyləyib. Qeyd edək ki, Riçard Çeyninin və Metyu Brayzanın bəyanatlarını araşdıran Amerika Erməni Milli Komitəsi Daniel Fridin səfəri öncəsi bəyanat yaymışdı. Həmin bəyanatda bildirilirdi ki, ABŞ rəsmiləri tez-tez Dağlıq Qarabağ münaqişəsinin ərazi bütövlüyü prinsipi əsasında həll edilməli olduğunu vurğulamağa başlayıblar, xalqların öz müqəddəratını təyinetmə prinsipi unudulur. Bəyanatda buna etiraz bildirilirdi. Daniel Frid və onun hökməti də göründüyü kimi ermənilərin ürəyini daha qırmamamağa üstünlük verib. Daniel Frid Ermənistan-Türkiyə münasibətlərinin normallaşmaya heç vaxt indiki qədər yaxın olmadığını da söyləyib. Diplomat ümid bəsləyir ki, irəliləyiş davam edəcək və türk-erməni münasibətləri normallaşacaq. O, Ermənistanın özünün müəyyənləşdirdiyi çərçivədə NATO ilə etdiyi əməkdaşlıqdan da Vaşinqtonun razı qaldığını dilə gətirib. Qeyd edək ki, Ermənistanda birgə NATO təlimi də keçirilir. Təlimə "Haydelberq" bazasının komandir müavini, ABŞ Silahlı Qüvvələrinin təmsilçisi, general-leytnant Con Qardner rəhbərlik edir. Oktyabrın 19-da İrəvana NATO-nun Mərkəzi Asiya və Cənubi Qafqaz üzrə xüsusi nümayəndəsi Robert Simonsun başçılığıyla nümayəndə heyəti də gəlib. Məqsəd Fərdi Tərəfdaşlıq Planıyla bağlı məsələləri müzakirə etməkdir. Nümayəndə heyəti hüquq müdafiəçilərindən tutmuş prezidentə qədər çoxsaylı görüşlər keçiriblər. O da NATO-nun birgə təliminə baxıb. Maraqlı məqam isə odur ki, Daniel Frid yenicə İrəvandan ayrıldığı, NATO rəsmilərinin Ermənistan paytaxtında olduğu bir vaxtda Rusiya prezidenti Dmitri Medvedyev də bu ölkəyə təşrif buyurub. Bu, 2008-ci il ərzində Rusiya və Ermənistan prezidentlərinin sayca beşinci görüşüdür. Bütün bunlar isə göstərir ki, Cənubi Qafqaz uğrunda Qərbə Rusiyanın mübarizəsi kəskinləşir və mübarizə hədəflərindən biri də Ermənistandır. Moskva da Cənubi Qafqazdakı yeganə forpostunu itirməmək üçün Ermənistan prezidenti Serj Sərkisyana bütün mərhələlərdə təlimatlar vermək və onun bu təlimatları necə yerinə yetirdiyini yoxlamağa çalışır. Maraqlıdır ki, Dmitri Medvedyevin İrəvana səfərindən əvvəl "geopolitica.ru" analitik informasiya saytı Rusiya prezidentini İrəvanda xoşagəlməz sürprizlər gözlədiyini yazıb. Xəbərdə deyilir ki, Rusiya prezidenti Dmitri Medvedyevin Ermənistan silahlı qüvvələrinin Dağlıq Qarabağdakı hissələrinin rusiyalı sülhməramlılarla əvəzlənməsi barədə gizli təklifi Ermənistan prezidenti Serj Sarkisyanı qorxuya salıb və Serj Sarkisyan Ağ Evlə təcili siyasi məsləhətləşmələrə başlayıb. Saytın məlumatına görə, Rusiya Federal Müdafiə Xidməti İrəvanda Rusiya prezidentinin qorunması üçün presendentsiz tədbirlər görüb. Bu xidmətin əməkdaşları prezidenti yalnız fövqəladə səfərlər zamanı, məsələn, planetin "qaynar nöqtələri"nə səfərlərdə müşaiyət edir. Əgər saytın məlumatları həqiqəti əks etdirirsə, deməli, Rusiya Azərbaycan üçün Cənubi Osetiya və Abxaziya ssenarisinin başqa bir formasını "yazmaq" istəyir. Bu isə bir daha Moskvanın Dağlıq Qarabağ münaqişəsinin həlli ilə bağlı təklif etdiyi variantları Bakının ehtiyatla nəzərdən keçirməsi gərəkliyini göstərir.