"İran gepolitik rəqiblərini qorxutmağa çalışır" İran Hərbi Hava Qüvvələri Şərqi Azərbaycan əyalətindəki təlimlərin ikinci mərhələsinə başlayıb. Eyni vaxtda ölkənin müxtəlif aerodromlardan havaya qalxan təyyarələr hava döyüşlərinin müxtəlif variantlarını həyata keçiriblər. Təbriz yaxınlığındakı manevrlərə yüzdən çox müxtəlif tipli təyyarə qatılıb. İsrail mənbələri havada yanacaq doldurmaqla 1200 km məsafəyə uçuşun təşkili barədə məlumat yayıb. Bu İranla İsaril arasında hava məsafəsinə bərabərdir. Politoloq Rauf Mirqədirov Qərbin Tehranla dil tapmaq yolunda çabaladığı bir vaxtda hərbi hava təlimlərinin keçirilməsinin maraqlı məqam olduğunu vurğuladı: "İran vaxtaşırı gepolitik rəqiblərini qorxutmağa çalışır. Tural Guya, Tehran analoqu olmayan yeni silahı sınaqdan keçirir. Bu cür təlimlər keçirən İranın yeni əzələ nümayişinin şahidi olacağıq". Politoloqun sözlərinə görə, indi regionda qəribə bir situasiya yaranıb: "Hamıya məlumdur ki, İran qaz ehtiyatlarına görə dünyanın aparıcı ölkələrindəndir. Bu ehtiyatların Avropa bazarına çıxarılması Avropanın, hətta ABŞ-ın da maraqlarına cavab verir. Çünki, Rusiyanın "qaz şantajı"nın qarşısını almaq üçün bu çox ciddi faktordur". Hətta "Nabucco" layihəsində də Tehranın iştirakı məsələsinin tez-tez hallandığını deyən Rauf Mirqədirova görə, İran qazından istifadə son bir neçə ildə aktual mövzuya çevrilib: "Bu faktor Qərbdə Tehranla dil tapmaq meyllərini gücləndirir. Regionda baş verənlər də İran faktoruna münasibəti dəyişib. Hətta bu ölkə Qafqazdakı situasiyaya təsir edən qüvvəyə çevrilə bilər. Çünki Rusiya İrana qarşı münasibətdə ikili siyasət nümayiş etdirir. Ruslar Qərbə açıq mesaj verirlər ki, "əgər, bizi həddindən artıq sıxsanız, İranla hərbi- siyasi bir blok yaradacağıq". Kremlin hədələrində Tehrana hava hücümundan müdafiə komplekslərinin satışı da yer alır. Digər tərəfdən, Rusiya rəsmiləri dəfələrlə ABŞ-a eyham vururlar ki, güzəştlər edilərsə, İran məsələsində Qərblə dil tapmağa hazırdılar. Bu faktor Tehranı da müəyyən qədər çevik siyasət yürütməyə vadar edir. Çünki Tehranda çox gözəl başa düşürlər ki, Rusiya o qədər də etibarlı müttəfiq deyil". Politoloqun sözlərinə görə, indi İrana qarşı hər hansı bir hərbi əməliyyatlar keçirilərsə, Cənubi Qafqaz dövlətləri də bu münaqişəyə cəlb ediləcək: "Gürcüstan ABŞ-ın ən yaxın müttəfiqi olduğu üçün bu münaqişəyə cəlb olunacaq. Azərbaycan isə belə addımı zərurətdən ata bilər. Güney Azərbaycanda, ümumiyyətlə İranda 30 milyon azərbaycanlı yaşayır. Hər hansı hərbi situasiya soydaşlarımızın taleyini sual altına qoyacaq. Belə amilləri İran nəzərə alır. Bəlkə də buna görə də Cənubi Qafqaza yaxın ərazidə hərbi təlimlər keçirir. Amma Tehranın bu hərbi təlimləri məhz Təbriz yaxınlığında keçirməsini Azərbaycan türklərinə qarşı addım kimi qiymətləndirmək olmaz. Düşünmürəm ki, bu təlimlər birbaşa olaraq Cənubi Azərbaycanda gedən proseslərlə bağlıdır və ya geniş miqyaslı təlimlər yerli əhali arasında qorxu yaratmağa hesablanıb. Nəzərə almaq lazımdır ki, ordunun çox böyük hissəsi azərbaycanlılardan ibarətdir. Hətta ordu rəhbərliyinin də demək olar ki, yarısı bu millətə mənsubdur. Bu gün Cənubi Azərbaycanda rəsmi Tehran üçün hansısa problematik proseslərin getdiyi nəzərə çarpmır ki, oraya ordunu yönəldib insanlarımızı qorxutsunlar. Bəzi ciddi problemlər var. Amma bunu hərbi müstəvidə həll etmək rəsmi Tehran üçün ideal variant deyil".