“RUSİYA QƏRBİ AZƏRBAYCANDAN SIXIŞDIRA BİLMƏYƏCƏK” Qabil Hüseynli: “Hakimiyyət Kremlin oyunlarına qoşulmamalı, Qərbin təhlükəsizlik təkliflərini qəbul etməlidir” Avropa Azərbaycanda keçirilən seçkilərdən dərhal sonra diqqəti saxtakarlıq məsələlərinə deyil, hakimiyyətin siyasi kursuna yönəldib. Artıq Qərb mətbuatının gündəmində ölkənin Rusiya ilə münasibətlərinə dair məqalələrə geniş yer verilir. Almaniyanın “Handelsblatt” qəzetində bununla bağlı geniş məqalə dərc olunub. Qərb diplomatına istinad edən mətbu orqan yazır ki, Kreml son vaxtlar Azərbaycan iqtidarına, konkret olaraq İlham Əliyevə görünməmiş təzyiqlər edir. Qərb diplomatı qəzetə bildirib ki, Qərbin Azərbaycanda həyata keçirdiyi erenji layihələri təhlükə qarşısındadır. Sitat: “Əgər biz həqiqətən Azərbaycanın qayğısına qalmasaq, bir ilə Bakı-Tiflis-Ceyhan kəməri bağlanacaq, bütün Azərbaycan qazı Rusiyanın əlinə keçəcək”. Bəs yerli ekspertlər nə düşünür? Doğurdanmı Rusiya Azərbaycan hakimiyyətinə təzyiqlər göstərməklə ölkəni tamamilə öz nəzarətinə ala, Qərbin layihələrinin üstündən xətt çəkə bilər? Mövzu ətrafında söhbət etdiyimiz politoloq, Müsavat başqanının müavini Qabil Hüseynli bildirdi ki, Kreml Azərbaycana doğrudan da müəyyən təzyiqlər göstərir: “Amma bu təzyiqlərin hər şeyi dəyişə biləcəyi qənaətinə gəlmək sadəlövhlük olar. Çünki Qərbin iri şirkətləri Xəzər dənizi ekvatoriyasına 50 milyard dollara yaxın sərmayə yatırıb. Buraya həmçinin BTC-nin tikintisi ilə bağlı xərclər də daxildir. Üstəlik dənizin ən dərin növqtəsindən neft çıxarmaq üçün texnologiyanı, həmçinin onun hissələrinin yerli şəraitdə istehsalını bura gətirib. Eyni zamanda bu texnologiyaya qulluq etmək üçün mühəndis-texnik heyəti də Azərbaycana gətirilib. Qərb sərmayə qoyduğu regionda, eləcə də mühüm enerji daşıyıcılarının yerləşdiyi bölgədə öz maraqlarını qorumağa qadirdir. Rusiya nə qədər səy göstərsə də, Azərbaycan rəhbərliyinə təzyiqlər etsə də, bunlar hər şeyi alt-üst etmək üçün yetərli deyil. Çünki həm Dik Çeyninin, həm də ondan sonra Dövlət Departamentinin sədrinin birinci müavininin Azərbaycana səfərləri zamanı ölkənin təhlükəsizliyi ilə bağlı konkret təklifləri olub. Bu təkliflər həm Azərbaycanın enerji daşıyıcıları, həm də bütövlükdə suverenliyi ilə bağlı tədbirləri özündə ehtiva edir. İndi seçim Azərbaycanındır”. Q.Hüseynliyə görə, xarici mətbuatda yayılan müxtəlif xəbərlər bizi çaşdırmamalıdır: “Hətta belə iformasiyalar da yayılır ki, Rusiyanın 58-ci ordusu Qarabağa girəcək. Bütün bunlar Ermənistanın Rusiya ilə birlikdə Azərbaycanın suverenliyinə qurduğu plandır. Azərbaycan rəhbərliyi ayıq olmalı, siyasi orientirləri dəqiq bilməlidir, Rusiyanın oyunlarına düşməməlidir. O zaman Bakı-Tiflis-Ceyhan da çalışacaq, Bakı-Ərzurum layihəsi də işləyəcək, üstəlik Bakı-Tiflis-Qars qaz kəməri də işə düşəcək. Həmçinin ”Nabukko" da daxil olmaqla bütün iri layihələr çalışacaq. Ona görə də Rusiyanın bu ekspansiyasına qarşı, məncə, tək Azərbaycanın siyasi rəhbərliyi deyil, bütün Azərbaycan xalqı öz üzərinə düşən vəzifələri yerinə yetirməlidir". Rusiyanın konkret hansı təzyiqləri göstərmək imkanları olmasına gəlincə, politoloq söylədi ki, Kremllə bağlı, sadəcə, formalaşmış mif var: “Reallıqda onun Azərbaycana təzyiq göstərmək imkanları geniş deyil. Bu məsələdə qorxub-ürkməyə heç bir əsas yoxdur. Rusiya indiyədək edə biləcəklərinin hamısını edib. Bundan sonra edə biləcəklərinin qarşısını almaq üçün isə Azərbaycan xarici siyasət prioritetlərini düzgün müəyyənləşdirməli və təhlükəni dəf etmək üçün ona edilən təhlükəsizlik təkliflərini qəbul etməlidir”. Elşad MƏMMƏDLİ musavat