İLHAM ƏLİYEV TÜRKİYƏYƏ GEDƏCƏK “Turkish Daily News”: “Abdullah Gülün İrəvan səfərindən sonra Azərbaycanda məyusluq yaranmışdı” İkinci müddətə prezident olan İlham Əliyevin tezliklə Türkiyəyə səfəri gözlənilir. Bu barədə “Turkish Daily News” qəzeti məlumat yayıb. Bildirilir ki, Əliyev seçkilərdən sonra ilk xarici səfərini Ankaraya etməklə Türkiyə prezidenti Abdullah Gülün İrəvana səfəri ilə bağlı Azərbaycanın bu ölkə ilə münasibətlərinin pozulmadığını göstərməyə çalışacaq. “Lakin bu mövqe türk-erməni yaxınlaşmasından məyus olan sadə insanların fikirlərinə təsir etmir” deyə qəzet yazıb. Məqalədə deyilir ki, Azərbaycanda prezident seçkiləri İlham Əliyevin asan və gözlənilən qələbəsi ilə nəticələnib. Lakin beynəlxalq müşahidəçilər müxalifətin boykot etdiyi seçkiləri tənqid ediblər. “Ona qarşı seçkilərdə 6 rəqib var idi, lakin alternativ namizədləri tanıyanlar az idi. Seçkiləri izləmək üçün Türkiyədən hakim Ədalət və İnkişaf Partiyasını, CHP və MHP-ni təmsil edən 6 millət vəkili də Bakıda olub. Mərmərə Qrupu tərəfindən təşkil olunmuş bu missiya seçkilərin şəffaflığını tərifləyib.” Bildirilir ki, Abdullah Gülün İrəvana səfərindən sonra Ankara ilə Bakı arasında müəyyən problemlər yaranmışdı. Belə vəziyyətdə Türkiyədən gələn nümayəndə heyətinin seçkiləri tərifləməsi və İlham Əliyevi təbrik etməsi münasibətləri düzəltmək üçün atılan birinci addım hesab oluna bilər. İkinci müsbət addım isə Əliyevin yenidən seçildikdən sonra ilk səfərini Ankaraya etmək qərarıdır. Lakin bu jestlər Ankara ilə İrəvan arasındakı futbol diplomatiyasından sonra yaranmış emosional problemləri aradan qaldırmaq üçün kifayət deyil. ”Biz səhv edəndə liderimiz Heydər Əliyev əvvəlcə diqqətlə özümüzü necə müdafiə etdiyimizi dinləyirdi, sonra isə bağışlayırdı. Ancaq o, xəyanəti heç vaxt bağışlamırdı", - deyə Azərbaycan nazirlərindən biri qəzetə Ankara-Bakı münasibətlərini şərh edərkən deyib. Qəzet yazır ki, bu sözlərdən çıxan nəticəyə görə, Ankara İrəvanla münasibətlər qurmaqla səhvə yol verib, ancaq hələ Azərbaycanın maraqlarını satmayıb. “Biz öz torpaqlarımızı itirmişik. Türkiyə siyasətinə yenidən baxmaq üçün daha böyük iş görə bilər. Ermənistanla münasibətlər qurmağın yaxşı, yaxud pis olduğuna Türkiyə özü qərar verməlidir”, - deyə adı açıqlanmayan Azərbaycan rəsmisi bildirib. Qəzetin əməkdaşı qeyd edir ki, Bakı küçələrində insanlar Abdullah Gülün İrəvana səfərindən məyusluqlarını gizlətmirdilər, ancaq onlar əlavə edirdilər ki, Türkiyə böyük ölkədir və öz siyasəti var. Məqalədə deyilir ki, Azərbaycanda avtoritar idarəçilik və demokratiya arasında ləngiyən Azərbaycanda Türkiyəni böyük qardaş kimi görənlər və ona etibar etmək istəyənlər az deyil. Bildirilir ki, azərbaycanlılar Qarabağın faktiki olaraq Rusiya tərəfindən işğal edildiyinə inanırlar. “Rusiyanın Gürcüstana müdaxiləsindən və onun iki bölgəsinin müstəqilliyini tanımasından sonra Birləşmiş Ştatlar Dağlıq Qarabağ münaqişəsinin nizamlanması üçün səyləri artırıb. Bu səylərin Azərbaycandakı seçkilərin ardınca daha da güclənəcəyi gözlənilir. Biz Azərbaycanın dövlət nazirindən ”münaqişənin tezliklə həllinə imkan varmı" deyə soruşanda o bizə zarafatla cavab verdi: “Bu problem yalnız o vaxt həll oluna bilər ki, biz Ermənistanı satın alaq. Diplomatik mənbələr deyirlər ki, bu məsələ bu və ya başqa formada Minsk Qrupu çərçivəsində aparılan danışıqlarda müzakirə olunur. Belə ki, rəsmi Bakı qaçqınların qayıtmasının əvəzində Dağlıq Qarabağa böyük həcmdə investisiyalar qoymağı və bölgənin iqtisadi müstəqilliyinə şərait yaratmağı təklif edir. Müşahidəçilər qeyd edirlər ki, Ankaranın mövqeyi danışıqların bu mərhələsində mühüm ola və Türkiyənin Ermənistanla dialoqu prosesə kömək edə bilər”. F.Məmmədov musavat